Panarbaho: Usa ka Dakong Pagtuo, Diyutay nga mga Gamit sa Balay

Imahe

sparsley furnished apartment

Paghulagway pinaagi ni Allen Garns

Sa dihang ang akong asawa ug ako nagminyo, wala koy trabaho. Diyutay ra ang among mga gamit sa balay, apan kami adunay dakong gugma ug dakong pagtuo.

Sa dihang sa katapusan nakatrabaho na ko, nagkinahanglan kini nga motrabaho ko matag hapon sa Dominggo. Misaad ko sa Ginoo nga dili ko motrabaho sa Iyang adlaw. Apan ako gihapon ang responsable sa pagsangkap alang sa akong pamilya. Bisan pa niana, ang saad nga akong gihimo wala mawala sa akong hunahuna.

Ang tubag miabut sa sunod Dominggo samtang nagkanta og “Welcome, Welcome, Sabbath Morning” (Hymns, nu. 280) ug nakaamgo sa importansya sa adlawng Igpapahulay. Human masayud nga dili ko makahangyo og bag-ong iskedyul, miundang ko sa akong trabaho. Mipadayon mi sa among kinabuhi, nagtuo nga ang Ginoo moatiman kanamo. Ang akong asawa mitrabaho aron sa pagsuporta kanamo, ug nakabaton mi sa among unang anak nga babaye, si Saria. Sa laing bahin, mieskwela ko og electronic mechanics, gamit ang Perpetual Education Fund. Apan wala gihapon ko makatrabaho.

Ang akong asawa kinahanglang mobalik sa pagtrabaho tulo ka bulan human matawo si Saria, apan si Saria mingawon kaayo niya. Nag-ampo mi aron masayud unsay buhaton ug nakahukom nga moundang siya sa pagtrabaho. Daw dili kini maalamon, apan gibati namo nga kini ang angay namong buhaton. Kami adunay upat ka bulan nga insurance alang sa pagkawalay trabaho aron makapangita ko og trabaho, ug sa tukma nga panahon nakakita ko og temporaryo nga trabaho.

Sa dihang natawo ang among ikaduhang anak nga babaye, si Amanda, sa katapusan nakaangkon ko og teknikal nga apprenticeship, apan nagpabiling lisud ang among kahimtang. Diyutay ra gihapon ang among mga gamit sa balay ug walay permanenteng trabaho. Kaduha ko mikuha sa professional self-sufficiency course nga gitanyag sa Simbahan. Gibuhat nako ang akong labing maayo, bisan kon ang gamay nakong kinitaan dili makaigo sa nag-una namong mga panginahanglan.

Kinse ka bulan human ko nagsugod sa akong apprenticeship, nadawat ko sa akong trabaho karon. Usa ako karon ka technician sa electrical energy measurement sa usa ka dakong shopping center. Nagtrabaho ko sa Lunes hangtud Biyernes, nga akong gikonsiderar nga usa ka milagro niini nga industriya. Ang tanan nakong mga kaubanan nagtrabaho matag Dominggo ug sa mga holiday. Kami adunay health insurance ug mga gamit sa balay! Nasayud ko nga ang Ginoo ug ang Perpetual Education Fund nakahimo niini nga posible alang kanako. Nasayud ako nga kon atong buhaton ang atong bahin, ang Ginoo kanunay nga mobuhat sa Iyang bahin, ug makahimo kita nga magpabilin nga makabarug sa kaugalingon.