Mga Tubag gikan sa mga Lider sa Simbahan
Unsaon sa Pagpabiling Takus
Ni Presidente Thomas S. Monson
Gikan sa Abril 2011 nga pakigpulong sa kinatibuk-ang komperensya.
Ako nabuhi og igong gidugayon aron masaksihan ang daghang kausaban sa mga moral sa katilingban. Diin kanhi ang mga sumbanan sa Simbahan ug ang mga sumbanan sa katilingban hapit nagparehas, karon aduna nay halapad nga bal-ang tali kanato, ug kini nagkalapad pa gayud.
Daghang mga salida sa sine ug sa telebisyon ang nagpakita sa kinaiya nga direktang nahisupak sa mga balaod sa Dios. Ayaw ipaubos ang inyong kaugalingon sa pasumbingay ug dayag nga kalaw-ay. nga kanunayng makita diha. Ang mga lyric sa mga kanta karon anaa na sa samang kategoriya. Ang pagpanamastamas nagpasulabi og maayo sa atong palibut karon wala gayud unta tuguti sa una. Ako mo-awhag kaninyo nga ayaw pagsulti o pagbuhat og bisan unsa nga dili ninyo ikapasigarbo.
Pagpalayo gayud gikan sa pornograpiya. Ayaw itugot ang inyong kaugalingon nga motan-aw niini, bisan kanus-a. Kini namatud-an nga makaadik nga lisud kaayong buntugon. Likayi ang alkohol ug tabako o bisan unsa nga mga druga, mga makaadik usab nga lisud gayud ninyo kining lupigon.
Unsa man ang mopanalipod kaninyo gikan sa sala ug dautan nga naglibut kaninyo? Ako moingon nga ang usa ka lig-on nga pagpamatuod sa atong Manluluwas ug sa Iyang ebanghelyo makatabang kaninyo nga maluwas sa kakuyaw. Kon wala pa ninyo nabasa ang Basahon ni Mormon, basaha kini. Kon inyo kining buhaton nga mainampuon ug uban sa tim-os nga tinguha nga makahibalo sa kamatuoran, ang Espiritu Santo mopadayag sa kamatuoran niini diha kaninyo. Kon kini tinuod—ug kini tinuod gayud—nan si Joseph Smith usa ka propeta nga nakakita sa Dios nga Amahan ug sa Iyang Anak, nga si Jesukristo. Ang Simbahan tinuod. Kon kamo wala pay pagpamatuod niining mga butanga, buhata kanang gikinahanglan aron makabaton niini. Mahinungdanon alang kaninyo nga adunay inyong kaugalingon nga pagpamatuod, kay ang mga pagpamatuod sa uban igo lang nga moabag kaninyo. Sa higayon nga kini maangkon, ang pagpamatuod kinahanglan nga lig-onon ug bag-ohon pinaagi sa pagkamasulundon sa mga sugo sa Dios ug pinaagi sa kanunay nga pag-ampo ug pagtuon sa kasulatan. Tambong sa simbahan. Tambong sa seminary.
Kon adunay bisan unsa nga dili tarung sa inyong kinabuhi, kamo adunay paagi sa pagbuntog niini. Hunonga ang bisan unsa nga dili matarung. Pakigsulti sa inyong bishop. Bisan unsa ang problema, masulbad kini pinaagi sa tukmang paghinulsol. Kamo mamahimong limpyo pag-usab (tan-awa ang D&P 58:42).
Ang Manluluwas sa katawhan mihulagway sa Iyang kaugalingon nga anaa sa kalibutan apan dili iya sa kalibutan. Kita usab mahimong anaa sa kalibutan apan dili iya sa kalibutan samtang atong isalikway ang sayop nga mga konsepto ug sayop nga mga pagtulun-an. Magpabiling matinuoron nianang gisugo sa Dios.