Mensahe sa Visiting Teaching
Nag-uban sa Pag-alima sa Pamilya
Tun-i sa mainampuong paagi kini nga materyal ug tinguhaa nga masayud unsay angay nga ipakigbahin. Sa unsang paagi nga ang pagsabut sa “Ang Pamilya: Usa ka Pamahayag ngadto sa Kalibutan” mopalambo sa imong hugot nga pagtuo sa Dios ug mopanalangin niadtong imong giamumahan pinaagi sa visiting teaching? Alang sa dugang nga impormasyon, adto sa reliefsociety.lds.org.
Hugot nga Pagtuo, Pamilya, Kahupayan
Ang “bana ug asawa adunay ligdong nga kapangakohan sa paghigugma ug pag-amuma sa usag usa ug alang sa ilang mga anak.”1 “Ang panimalay kinahanglang mahimong dapit diin makat-unan nato ang gugma ug pagserbisyo,” miingon si Presidente Russell M. Nelson, Presidente sa Korum sa Napulog Duha ka mga Apostoles.
“Ang atong Langitnong Amahan gusto nga ang mga bana ug mga asawa magmatinud-anon sa usag usa ug sa pagtagad ug pagtratar sa ilang mga anak isip panulundon gikan sa Ginoo.”2
Diha sa Basahon ni Mormon, miingon si Jacob nga ang gugma sa mga bana ngadto sa mga asawa, ug ang gugma sa mga asawa ngadto sa mga bana, ug ang ilang gugma para sa ilang mga anak mao ang ubang rason nganong ang mga Lamanite sa usa ka panahon mas matarung kay sa mga Nephite (tan-awa sa Jacob 3:7).
Usa sa pinakamaayong paagi nga madapit ang paghigugmaay ug paghiusa sa atong panimalay mao ang mabination nga pagsultihanay sa mga sakop sa atong pamilya. Ang mabinationg pagsultihanay magdala sa Espiritu Santo. Si Sister Linda K. Burton, kinatibuk-ang presidente sa Relief Society, mihangyo nga atong hunahunaon nga: “Kapila man natong tuyoon ang paglitok sa ‘maayong pulong atong gamiton’?”3
Dugang nga mga Kasulatan
Mga Taga-Roma 12:10; Mosiah 4:15; Doktrina ug mga Pakigsaad 25:5
Buhi nga mga Sugilanon
Si Elder D. Todd Christofferson sa Korum sa Napulog Duha ka mga Apostoles mipakigbahin og usa ka kasinatian sa iyang pagkabata nga nasilsil diha kaniya ang kaimportante sa paghigugma sa pamilya. Dihang siya ug ang iyang mga igsoon puro lalaki, ang ilang mama gioperahan tungod sa kanser diin sakit kaayo para niya ang paggamit sa tuo niya nga kamot. Tungod kay mga lalaki ang iyang pamilya, daghan kaayo og plansahunon, apan sa pagpamalansa sa iyang mama, siya sa kasagaran mohunong ug mosulod sa kwarto sa paghilak hangtud nga mawala na ang sakit.
Dihang nabantayan sa papa ni Elder Christofferson ang nahitabo, sekreto siyang nag-antus nga dili maniudto hapit usa ka tuig aron makatigom og kwarta aron makapalit og makina nga makapasayon sa pagpamalansa. Tungod sa iyang gugma ngadto sa iyang asawa, iyang napakita ang usa ka ehemplo sa pag-alima sa pamilya para sa iyang mga anak nga puro lalaki. Gumikan niining malumo nga inter-aksyon, miingon si Elder Christofferson, “wala ko masayud sa gihimo nga sakripisyo sa akong amahan para sa akong mama niadtong higayuna, apan karon nga nasayud na ko, nakaingon ko sa kaugalingon, ‘Katalagsaon nga Amahan.’”4