Nakagamot diha ni Kristo

“Ug si Jesus migula nga sinul-oban sa purongpurong nga mga sampinit ug sa kupo nga mapula. Ug si Pilato miingon kanila, Tan-awa, ania ra ang tawo!

“Sa pagkakita kaniya sa mga sacerdote nga punoan ug sa mga polis, sila misinggit nga nanag-ingon, Ilansang mo siya sa krus! Ilansang mo siya sa krus! Si Pilato miingon kanila, Kuhaa ninyo siya ug kamoy maglansang kaniya sa krus, kay wala akoy nakitang ikasumbong batok kaniya” (Juan 19:5–6).

Bisan kon importante kaayo ang sumpay sa istorya, ug importante gayud kini, mohunong ko sa mga pulong ni Pilato nga “Tan-awa, ania ra ang tawo!”

Ang hangyo ni Pilato sukwahi kaayo. Ang lawas ni Jesus nianang higayuna nagusbat, wala pay tawo hangtud niana, o sukad, ug walay si bisan kinsa nga lalaki o babaye kinsa mas angayan pang “tan-awon.” Ang Iyang kinabuhi hingpit. Siya walay sama. Walay tawo nga nabuhi sama sa Iyang pagpakabuhi. Walay laing makahimo niana. Nagbaton Siya sa matag hiyas sa hingpit nga matang niini.

Ang Manluluwas adunay tanang gahum sa pagkontrolar sa kaugalingon. Ang Iyang mga pagbati hingpit, sama sa Iyang mga hunahuna. Ang Iyang panabut walay kinutuban. Siya lamang ang tinud-anay nga takus nga sud-ungon—gikan sa matag anggulo—ug sa pagsusi, pagsukod, ug pagsimba. Walay pagtan-aw ngadto sa iyang hunahuna, kasingkasing, ug mga pagbati ang makasagmuyo. Bisan kon ang Iyang panagway wala magpakita niini kaniadto, apan si Jesus ang hingpit nga ehemplo sa abunda nga kinabuhi.

Busa, dili ang Iyang panagway nianang higayon sa pag-antus nga angay natong unahon sa paghinumdom ug una sa tanan. (tan-awa sa Isaias 53:2). Kon unsa Siya sa sulod nianang gisakit nga lawas mao ang labing importante alang kanatong tanan. Kon unsa Siya mao ang nakahimong posible sa unsay Iyang nahimo. Ang Iyang kahalangdon kon unsa Siya mao ang pagdapit sa atong pagtagad.

Ang angay natong makita samtang kita “nagtan-aw sa tawo” mao ang Iyang naglambo nga kadaugan batok sa mga pwersa sa dautan, bisan kon dili kini makita nga kadaugan kaniadto. Kadtong Iyang hingpit nga kakalma taliwala sa labing pintas nga unos nga maantus sa usa ka tawo. Ang tanang dautang himan nga naimbento sa kaaway gigamit o pagagamiton batok Kaniya. Iyang gilupig ug gibuntog kining tanan. Siya mibarug sa atubangan ni Pilato sa hingpit nga kalinaw ug kakalma.

Ang Iyang kagamhanan batok sa pisikal nga mga elemento sa kalibutan ug sa tawhanong mga kahimtang namatud-an lapas pa sa pagduha-duha. Namandoan Niya ang dautan nga mga espiritu. Naayo Niya ang masakiton ug nahatagan og panan-aw ang buta ug pandungog ang bungol. Napahiuli Niya ang patay ngadto sa pagkabuhi, lakip ang mga bata nabalik ngadto sa ilang mga ginikanan. Nabasa Niya ang mga hunahuna ug mga pagbati sa tanan. Napasaylo Niya ang mga sala ug milimpyo sa mga sanlahon. Nadala Niya ang palas-anon sa mga sala, kasakit, balatian, ug mga kapakyasan sa tanang katawhan sa gabii sa wala pa kining sitwasyon uban ni Pilato. Sukwahi kaayo, giantus pa gani Niya ang mga sala niadtong nagdagmal Kaniya nga diha gayung higayuna.

“Tan-awa ang tawo” gayud. Siya ang Anak sa buhi nga Dios. Siya ang panig-ingnan sa kinabuhi, ang Usa nga gipadala aron mopakita sa agianan ug aron mahimo nga Dalan. Siya “ang dalan, ang kamatuoran, ug ang kinabuhi”. (Juan 14:6) alang kanatong tanan. Uban niadtong tulo ka mga pulong, “tan-awa ang tawo,” si Pilato wala masayud ug wala tuyoa nga mipahayag sa yanong pormula aron makab-ot ang labing taas nga mga katuyoan sa kinabuhi.

Sa dihang nangutana si Pilato sa mga Hudeo sa pagtan-aw sa Manluluwas, siya mitudlo kanila ug ngari kanato ngadto sa Usa, ang bugtong anak, kinsa makapahimo sa atong mga kaugalingon nga abunda ug ang atong “hingpit nga kaluwasan.”¹ Mao nga anaa ang sugo nga “Tan-awa nga ikaw mohangad ngadto sa Dios ug magpakabuhi” (Alma 37:47).

Ang angay natong hinumduman kon kita motan-aw Kaniya mao nga tungod Kaniya, ug sa tanan Niyang nabuhat ug sa tanan kon unsa Siya kanhi ug karon, kita usab magmadaugon. Makabuntog usab kita. Mahimo kitang magpuyo nga abunda taliwala sa mga pagsulay. Kon kita mopili sa “pagtan-aw” Kaniya ug modawat ug mogamit sa Iyang makaluwas nga ebanghelyo, Siya moluwas kanato. Siya moluwas kanato gikan sa mga epekto sa atong napukan nga kahimtang ug kahuyang, ug moluwas kanato gikan sa sala, gikan sa espirituhanong pagkaubos, ug gikan sa katapusan, mahangturong kapakyasan. Siya molimpyo, molunsay, mopanindot, ug sa katapusan mohingpit kanato. Siya mohatag kanato og hingpit nga kalipay ug kalinaw. Siya ang yawe ngadto sa abunda nga kinabuhi.

Imahe

acorn

Ang akong asawa, si Kathy, ug ako nagpuyo diha sa bungtod. Usa ka matang sa kahoy—ang scrub nga tugas—mitubo didto. Dili sama sa dagkong mga tugas, ang scrub nga tugas dili gayud managko, apan gahi kini ug maanindot.

Pipila ka tuig ang milabay mibutang kami og dako nga kaang sa dalan padulong sa pultahan sa among balay. Gitanum namo ang mabulukon nga mga bulak diha sa kaang, nga nahimutang ubos sa mga sanga sa kahoy sa scrub nga tugas. Sa dihang nausab ang panahon ug misugod na ang tinglarag, ang pipila ka mga liso, o mga acorn, nangahulog diha sa kaang.

Usa ka adlaw sa tinglarag nakamatngon ko nga ang pipila ka mga liso nanurok na. Wala mi laing gusto kundili ang mga bulak diha sa kaang, busa gisugdan nako sa pagpang-ibut ang mga nanurok diha sa yuta sa kaang. Sa akong katingala, ang gitas-on sa mga gamot miabut na og katulo o kaupat kapilo kay sa imong makita sa ibabaw sa yuta.

Didto sa Utah, USA, init ang summer, nga dunay ginagmayng pag-ulan, ug bugnaw sa tingtugnaw, inubanan sa hangin ug snow. Apan ang lintunganay sa mga gamot sa scrub nga tugas dali rang milapos sa yuta. Tungod niini mas daghang mga gamot ang makasuyop og umog ug sustansya sa gikan sa yuta. Ang lawom nga mga gamot lig-on nga mikapot sa mga kahoy nga makapugong niini ug lig-on diha sa hangin, magsugod sa gagmay pa kaayo kini. Ang lawom nga mga gamot makapasayon sa pagkabuhi sa mga scrub nga tugas. Samtang ang mga nanurok motubo ngadto sa ilang hingpit nga gitas-on niini, ang mga gamot niini padayon sa pag-amuma, pagpanalipod, ug pagsustiner niini.

Makakuha kita og usa ka leksyon gikan sa scrub nga tugas. Kitang tanan adunay mga kasinatian nga sama sa kainit sa summer ug kabugnaw sa tingtugnaw. Aduna kitay mga sayon ug malisud nga mga panahon, kalampusan ug kapakyasan, panahon sa kapiskay ug balatian, mga panahon sa kalipay ug mga higayon sa kasubo. Ang kinabuhi wala mag-urong. Dili kini sayon.

Ang kinabuhi susama ra usab sa laing mga paagi. Kitang tanan gilibutan sa kultura ug mga tradisyon sa atong lumad nga mga komunidad ug kanasuran. Pipila niadtong mga impluwensya mga maayo, ug ang uban ngil-ad. Ang uban mobayaw nato, ang uban mopakunhod ug makapaubos nato. Ang atong mga panimalay mahimong mapanalanginan sa kahayag sa ebanghelyo o madaut sa kapakyas sa pagsunod sa mga sugo sa Dios. Ang mga ehemplo sa mga higala mahimong maayo kaayo o ngil-ad kaayo. Walay usa kanato nga nasayud asa gayud kita dad-on sa kinabuhi. Dili kita hingpit nga makatag-an sa atong umaabut nga panglawas o katigayunan. Dili kita makapanagna sa impluwensya sa gubat o kahimtang sa panahon. Ang nagkadaiyang mga kahimtang nga dili nato makontrolar nagmugna og mga hagit alang kanatong tanan.

Apan dili sama sa mga kahoy, makapili kita nga tuyuon sa pagpalambo ang espirituhanong estraktura nga mga gamot sa atong kinabuhi. Makahukom kita kon asa molintunganay ug unsa ka lawom ang pagdulot niini ngadto sa yuta. Ang inadlaw natong mga desisyon naghimo og gagmay, hapit dili mamatikdan nga mga kalainan diha sa mga gamot sa atong hugot nga pagtuo, nga ang epekto mahimong pundasyon.

Imahe

seedlings and roots

Tungod kay wala kita masayud kanus-a o sa unsang paagi moabut ang atong kaugalingong mga hagit, o unsa ka dugay molungtad ang atong personal nga mga panahon sa tingtugnaw o ting-init, kinahanglang ipalawum gayud nato ang atong mga gamot kutob sa mahimo ngadto sa bugtong matuod nga tinubdan sa pag-amuma alang sa atong mga kalag, si Ginoong Jesukristo. Gusto Niya nga ang atong kinabuhi abunda. Nagdapit Siya nato sa pagduol ngadto Kaniya. Siya miingon, “Pagkat-on kanako, ug paminaw sa akong mga pulong; lakaw diha sa kaaghup sa akong Espiritu, ug ikaw makabaton og kalinaw ngari kanako” (D&P 19:23).

Nagpalig-on kita sa kalag sa pagsagubang sa mga unos sa atong kinabuhi pinaagi sa pagkat-on Kaniya. Nagkat-on kita pinaagi sa pagtuon ug pinaagi sa pag-ampo. Nagkat-on kita pinaagi sa pagtan-aw sa matarung nga mga ehemplo. Nagkat-on kita samtang nag-alagad kita sa uban aron sa pag-alagad Kaniya (tan-awa sa Mateo 25:40). Nagkat-on kita samtang nagtinguha kita sa pagsunod Kaniya sa bisan unsang paagi nga atong mahimo.

Ang pagpaminaw nagpasabut sa pagpatalinghug, dili lamang sa pagkadungog. Maminaw kita Kaniya diha sa pribado nga pagtuon sa mga kasulatan. Maminaw kita diha sa miting sa sakrament ug diha sa templo. Makadungog kita Kaniya sa “malinawon nga diyutayng tingog” (1 Mga Hari 19:12). Maminaw kita Kaniya diha sa tingog sa buhing mga propeta ug mga apostoles.

Ang mainampingong pagpaminaw nagpahinumdom kanato nga ang “tawo mabuhi dili sa tinapay lamang, kondili sa matag pulong nga magagula sa ba-ba sa Dios” (Mateo 4:4). Nagpalig-on kita sa atong mga gamot uban sa anam-anam, usa ka lakang sa matag higayon nga paglambo. Samtang kita maminaw, kita nagsunod sa dalan nga Iyang gilakawan. Siya mao ang dalan nga modala ngadto sa abunda nga kinabuhi, ug Siya ang kahayag nga nagdan-ag niini (tan-awa sa Juan 8:12).

Walay sekreto, walay ikatingala sa unsay atong mahimo ug angay buhaton sa pagpalambo sa atong mga gamot: kita motuman sa mga sugo sa Dios. Ang atong abilidad sa pagbuhat sa Iyang kabubut-on motubo samtang nagbuhat kita sa Iyang kabubut-on. Kini nahimong mas sayon kay kita nagtubo diha sa konbiksyon ug pagtuo. Kon kita matinud-anon magpadayon sa paggamit sa mga sukaranan sa ebanghelyo sa atong kinabuhi, ang Ginoo mopanalangin kanato og dugang nga kalig-on sa kaugalingon.

Ang takus, mahunahunaong pagsimba naghimo og importante nga kontribusyon sa kalawmon sa atong espirituhanong mga gamot. Ang matinahurong pagtambong sa miting sa sakrament ug pag-ambit sa sakrament uban sa tinuod nga katuyoan naghimo sa adlaw nga Igpapahulay nga labaw pa kay sa lain na sab nga Dominggo. Dili gayud kita makapalawom sa atong mga gamot gawas kon kita “kanunay mohinumdom Kaniya” (D&P 20:77, 79). Kon kita mangandam sa atong kaugalingon sa wala pa ang atong mga miting, ang adlaw nga Igpapahulay mahimong usa ka nindot nga kasinatian alang kanato. Samtang kita mamalandong sa atong panginahanglan sa pagpasaylo ug sa panalangin nga makabaton kanunay sa Iyang Espiritu nga maanaa kanato, kita magsugod sa pagkakita sa chapel ingon nga usa ka sangtuwaryo ug sa sakrament isip panahon sa pagkabalaan.

Tungod niana nga rason, adunay pipila ka mga butang nga kanunay natong dad-on kon moadto kita sa simbahan. Ang labing usa niini mao ang usa ka masulub-on nga kasingkasing ug mahinulsulon nga espiritu. Kinahanglang moadto kita nga andam nga magtinguha ug mobati sa mga panalangin sa Pag-ula sa Manluluwas. Sa samang paagi, kinahanglang kanunay natong ibilin sa panimalay ang pipila ka mga butang. Ang mga hunahuna sa sport, trabaho, kalingawan, ug pagpamalit kinahanglang ihiklin diha sa atong mga panimalay nga pagatagdon lamang sa ubang adlaw gawas sa adlaw nga Igpapahulay. Ang tinuod nga pagsimba nagpasiugda og tinuod nga pagkakabig. Kini makatabang nga ipalawum og maayo ang mga gamot sa atong hugot nga pagtuo, diin kita makakaplag og usa ka espirituhanong tigumanan, nga “diha sa sulod [kanato] usa ka tubod sa tubig nga magatubo ngadto sa pagkakinabuhing dayon” (Juan 4:14).

Si Pablo misulat:

“Busa, maingon sa inyong pagdawat kaniadto kang Kristo Jesus ang Ginoo, padayon kamo sa pagkinabuhi diha kaniya:

“Nga mga pinagamot ug pinatubo diha kaniya ug linig-on diha sa pagtuo, ingon nga niini gitudloan kamo” (Mga Taga Colosas 2:6–7).

Kon dili nato masinati ang pipila ka personal nga mga unos ug pipila ka hulaw, ang atong mga gamot walay kahigayunan nga malig-on. Sukwahi lang, ang kahapsay sa kinabuhi usa mismo ka pagsulay—ug lisud nga pagsulay. Ang pagkawalay problema makapahuyang kanato kon dili kita mag-amping. Mahimong kita dili “magbantay sa [atong mga kaugalingon], ug sa [atong] mga hunahuna, ug sa [atong] mga pulong, ug sa [atong] mga buhat, ug magbantay sa mga sugo sa Dios, ug magpadayon diha sa hugot nga pagtuo” (Mosiah 4:30) kon walay pagsulay nga mopaluhod kanato ug molihok diha sa atong mga kasingkasing.

Ang kinabuhi adunay paagi sa pagdala og mga kasakit kanatong tanan, bisan kon atong gibuhat ang atong labing maayo. Gawas kon mohimo kita og ngil-ad nga mga pagpili, nga kanunayng mosangput sa trahedya, kita kasagaran dili makapili kon kanus-a o sa unsang paagi ang mga problema sa kinabuhi moabut kanato. Apan sigurado nga makahukom kita kada adlaw kon unsaon nato sa pagpangandam alang kanila. Sa ingon ang pahinumdom ni Josue: “Magpili kamo niining adlawa kon kinsa ang inyong alagaron” (Josue 24:15).

Ania pay lain nga ehemplo.

“Sumulod kamo agi sa pultahan nga masigpit; kay daku ang pultahan ug sangkad ang dalan nga padulong sa kapildihan, ug daghan ang nagasulod agi niini:

“Kay masigpit ang pultahan ug hiktin ang dalan nga padulong sa kinabuhi, ug diyutay ra ang mga nakatultol niini.” (Mateo 7:13–14).

Dili kita angay nga matingala kon mag-antus kita og kapakyasan sa hugot nga pagtuo kon kita maglakaw diha sa mga daplin sa higpit ug pig-ot nga dalan. Ang unsay atong buhaton ug dili buhaton importante gayud tungod kay ang mga buhat adunay mga sangputanan, ug ingon man ang walay buhaton. Kon kita dili magtagad sa ginagmay, inadlaw, balik-balik apan mahinungdanong mga buhat sa pagtuo, atong gipahuyang ang atong mga gamot. Paglabay sa panahon hinay-hinay kitang nagpalayo sa Dios.

Sa ingon, ang atong pagpakigsulti sa usag usa, ang mga libro ug artikulo nga atong gibasa, ang mga salida sa tv ug sinehan nga atong gitan-aw, ang mga butang nga wala nato basaha ug tan-awa, ang mga komedya nga atong gisulti o gipili nga dili paminawon, o atong sublion, tanan nagpakita kon asa kita sa higpit ug pig-ot nga dalan—sa tunga ba o sa daplin. Dili kita makaangkon nga nag-amuma sa atong mga gamot kon ang atong mga gipangbuhat ug wala buhata nga mga butang dili makahimo nato nga mas maayo nga mga Santos. Ang kahilwasan makaplagan lamang diha sa tunga-tunga sa higpit ug pig-ot nga dalan.

Imahe

tree and Christ

Walay mas maayo nga sumbanan sa kinabuhi bisan asa, walay mas siguradong paagi sa pagkakaplag og kalinaw ug sa dalan padulong sa unahan, kay sa pagsunod ni Ginoong Jesukristo. Ang Iyang ngalan mao lamang ang bugtong ngalan gihatag ubos sa langit nga adunay gahum sa paghimo sa atong mga kinabuhi nga mas langitnon (tan-awa sa 2 Nephi 31:21; Moises 6:52). Walay laing tawo nga mahimo natong “tan-awon” nga adunay makaluwas, makabag-o, makapausab nga gahum sa Manluluwas.

Mga pulong ni Judas makuha sa dili kapugngan nga kahaw-ang sa kinabuhi nga sa katapusan moputos niadtong ni bisan kinsa o bisan unsa gawas sa Manluluwas: “mga panganud nga walay dalang ulan, nga ginataral sa hangin; kini sila larag nga mga kahoy nga walay mga bunga, makaduha pil-a ang pagkapatay, nangaibot” (Judas 1:12).

Ang atong mga kalag kinahanglang nakagamot og maayo kang Kristo nga kita makahimo sa paglahutay sa bisan unsang hagit, mobuntog sa bisan unsa nga kasakit, makasagubang sa bisan unsang pag-ataki sa atong hugot nga pagtuo, ug mamahimong sama sa mga kahoy nga tugas—lig-on, dili matarug, ug makanunayon. Kana nga matang sa pagkagamot molungtad og dugay ug molahutay sa matag kaaway, bisan ang mga labing maliputon, dili makita, ug mga malimbungon.

Atong nakat-unan gikan ni Helaman kon sa unsang paagi ang saad sa sama sa bato nga kalig-on mag-agad sa atong pagpalambo sa atong mga kinabuhi sa Manunubos, “usa ka tukuranan diin kon ang mga tawo magtukod dili sila mapukan” (Helaman 5:12). Gipasabut ni Isaias sa pipila lang ka mga pulong kon unsay gipasabut nga nakagamot diha ni Ginoong Jesukristo ug sa pagpabunga diha sa atong mga kalag sa mga kinaiya sa Manluluwas. Siya misulat “Ug ang Ginoo magamando kanimo sa kanunay ug mobusog sa imong kalag sa mga dapit nga mamala, ug magapalig-on sa imong mga bukog ug ikaw mahisama sa usa ka pinatubigan nga tanaman, ug sama sa usa ka tubod sa tubig, kansang mga tubig walay paghubas” (Isaias 58:11).

Ang Manluluwas, si Jesukristo, mao ang panig-ingnan sa matag hiyas. Siya lamang ang bugtong hingpit nga tawo nga sukad nabuhi. Miula Siya sa atong mga sala. Pinaagi sa Iyang Pag-ula mamahimo kitang mga babaye ug lalaki ni Kristo. Malimpyohan kita, mausab, mamaayo, ug malunsay. Ang atong mga kalag mahimong mga butang sa katahum.

Hinaut nga kita “motan-aw sa tawo” nga mas hingpit. Hinaut nga mas mainampoon kita sa pagsundog Kaniya. Hinaut nga mas madasigon kita sa pagsunod Kaniya. Hinaut nga atong ipalawom pag-ayo ang atong mga gamot sa yuta sa kaluwasan hangtud nga kita makapahulay diha Kaniya, ang lig-ong sukaranan sa atong Manunubos. Hinaut nga anam-anam natong matagamtam ang panalangin sa abunda nga kinabuhi nga Iyang gitanyag.