Naluwas sa Akong Igsoon
Ang tagsulat nagpuyo sa Idaho, USA.
Dihang ang akong igsoon nga si Tanner nag-12 anyos na, gidapit nako siya nga magsugod og tambong sa templo uban nako. Wala kami masayud nga nagkinahanglan kaayo kami sa matag usa nga suporta sa misunod nga katuigan.
Hapit na ko mag-12 anyos dihang ang Twin Falls Idaho Temple gipahinungod. Nadasig kaayo ko dihang ang magulang nako nga babaye nangutana nako sa unang higayon kon gusto ba kong magsugod og adto sa templo kanunay uban niya ug sa iyang higala.
Nalipay ko dihang ang akong manghud nga si Tanner nag-12 anyos na human sa tulo ka tuig tungod kay sa katapusan madapit na nako siya nga motambong sa templo kuyog nako.
Sa among pag-adto matag buntag, magtinabangay mi aron makabangon ug kon kapoy mi mangomedya si Tanner aron mangmata mi ug mangadto. Human sa among pag-adto sa templo, mogahin mi og panahon nga mag-istorya mahitungod sa among gibati sa templo ug unsay among hunahuna mahitungod niini.
Ang pag-adto sa templo uban ni Tanner nahimong espirituhanong butang sa akong semana. Pinaagi sa kanunay namong pag-adto sa templo nahimo ming mas maayong higala, nga maoy nakalig-on nako labaw kay sa akong mahunahuna kon dunay mga pagsulay nga moabut kanako. Ang duha namo ka magulang nga babaye mibiya sa balay para moeskwela sa kolehiyo ug ang among ward bag-o lang nabahin, si Tanner na lang ug ako ang pipila sa aktibong batan-on sa among ward.
Kaming duha ni Tanner migahin og mga oras sa pag-adto ug pagdapit sa dili kaayo aktibong mga batan-on aron moadto sa Simbahan ug sa Mutual. Sa kasagaran daw walay paglaum ang paningkamot kay walay bisan usa ang moabut bisan unsa kadaghang babaye ang gisulayan nako sa pakighigala.
Ang among mga ginikanan naningkamot nga motabang. Mohatag sila namo og pagpamatuod kon kami mawad-an sa kadasig, ug ila ming pasultihon sa among mga kasagmuyo kon mouli mi nga may kahiubos. Bisan pa, wala dayon modaghan ang among mga higala sa simbahan, ug ang pag-adto nga ako ra ang batan-ong babaye didto mas nagkaanam og kalisud. Ang among pag-adto sa templo dili na kanunay tungod sa busy namong iskedyul sa eskwelahan.
Migahin kog daghang oras sa pagbasa sa akong mga kasulatan ug pagpangamuyo sa Ginoo nga tabangan kong malig-on. Nagsubo ko ug naluya—naluya sa pag-inusara, naluya sa akong paningkamot nga walay nahimong kalainan, naluya sa panglimbasug sa espiritwal ug sa emosyonal.
Atol niining panahona, nagtrabaho ko isip lifeguard sa swimming pool sa siyudad. Mas ganahan ko didto kay sa simbahan kay ang mga kauban nako sa trabaho akong mga higala ug kanunayng malipay nga makakita nako. Usa ka adlaw nakahukom ko nga dili na mobalik og tambong sa Mutual kay mas makalingaw ang trabaho ug mas makatabang nako sa pinansyal.
Wala sa akong hunahuna nga dako kining butanga hangtud nga akong namatikdan nga nagkaubos ang akong mga sumbanan. Wala koy gisulti mahitungod sa pagpamalikas sa akong mga higala, ug usa ka adlaw nakalitan ko nga sa kalit nakapamalikas ko nga kini wala gyud nako mabuhat sukad. Mitan-aw gani ko og dili angay nga salida usa ka gabii sa usa ka party kauban sa akong mga higala nga mga lifeguard. Lain ang akong gibati ug naglibug ko kon unsay akong gibuhat.
Sa laing bahin ang akong mga ginikanan misulti nako kon unsa ka subo si Tanner sukad nga mihunong ko sa pag-adto og Mutual. Matag semana mangutana siya nako, “Ate, moadto ka ba sa Mutual unyang gabii?” Kada uli niya sa balay gikan sa Mutual, modiretso lang siya sa iyang kwarto ug mobasa sa iyang mga kasulatan sulod sa taas nga oras. Dili na kaayo siya makig-istorya, ug kon mangutana ko kon OK ba siya, igo ra siyang moingon nga, “Dili” ug dayon molakaw.
Usa ka adlaw miuli siya nga naghilak tungod kay gibati niya nga nag-inusara.
Diha ko nakahukom nga kinahanglan ko nga mobalik. Bahala na og lisud para nako nga mag-inusara; si Tanner nagkinahanglan nako.
Mitambong si Tanner og family history course sa simbahan, ug nakahukom ko nga kinahanglan kong mokuha niini uban niya. Gusto namong sugdan og balik ang pag-adto sa templo nga mas kanunay, ug karon makapangita na mi og mga pangalan nga kami ra.
Nalingaw mi sa pagtambong sa klase matag Dominggo. Human sa pagsimba, mag-search mi og mga pangalan. Ang pinakanindot nga butang sa pagdala sa among kaugalingong mga ngalan sa templo mao nga kaming duha ang nakapangita niini, ug ang mas maayo, nakasuporta kami sa usag usa sa simbahan ug gani nalipay sa simbahan tungod kay kami naghimo sa buhat sa Ginoo.
Ang kakugi ni Tanner sa pagtambong sa Mutual sa simbahan usa ka impluwensyal kaayo nga ehemplo ngari nako. Duna koy pagpamatuod sa ebanghelyo, apan siya nakatabang nako nga makabaton og pagpamatuod nga makatambong og mga miting sa simbahan ug sa mga kalihokan.
Kaming duha mihupay sa usag usa ug migamit sa among pagpamatuod bahin sa templo aron matabangan ang usag usa nga malig-on sa Simbahan. Ang gidaghanon sa mga batan-on nga mitambong sa simbahan ug sa Mutual wala gyud kaayo modaghan, apan si Tanner ug ako nahimong lig-on ug mas nakahimo sa pagpas-an sa among palas-anon samtang nagtinabangay kami nga makapadayon.
Nalipay kaayo ko nga siya akong gidapit nga mokuyog nako ngadto sa templo. Samtang nakasiguro ko nga kini nakatabang nako, nahibalo ko nga kini miluwas nako.