Ang Gamayng Botelya sa Kahilum
Ang tagsulat nagpuyo sa Utah, USA.
Nganong gihatagan man ni Lolo si Gage og walay sulod nga botelya?
“Kaninyo ibilin ko ang kalinaw, kaninyo ihatag ko ang akong kalinaw” (Juan 14:27).
Gitutukan ni Gage ang walay sulod nga karaang botelya ug iyang gigunitan. Gamay kini ug may pagka-green, nga dunay sungsong nga tabon. Si Lolo Russel mihatag niini ngadto niya human siya gibunyagan.
“Unsa man na?” Nangutana si Gage. “Nasayud kong botelya na—apan wala man nay sulod.”
“Ah, puno kini,” miingon si Lolo.
Giuyog ni Gage ang botelya. “Ah, para nako wala gyud ni sulod.”
Mikatawa si Lolo. Iyang gitangtang ang sungsong ug gipaduol ang gamayng botelya sa dunggan ni Gage. “Madungog ba nimo?” mihunghong siya.
“Ang unsa?” Mihunghong sab si Gage.
Mipahiyom si Lolo. “Ang kahilum,” miingon siya. Dayon gisungsungan niyag balik ang botelya. “Sa kalibutan karon, ang kahilum ingon og lisud nang pangitaon. Sama kini sa medisina, ug ang matag tu-lu niini sama kabililhon sa bulawan.”
Salamat miingon si Gage ug gidala ang lahi nga gasa sa iyang Lolo sa iyang pagpauli. Apan wala kadto niya kaayo hunahunaa.
Mga semana ang milabay, ang tiyo ni Gage nga si Vince namatay. Human sa lubong, daghang paryente nagdasok atubangan sa kwarto sa balay nila ni Gage sa pag-istoryahanay. Miadto si Gage sa iyang kwarto ug gisirad-an ang pultahan. Madungog niya og gamay ang mga tingog sa iyang ginikanan ug mga paryente sa ubos.
Nakita ni Gage ang karaang green nga botelya sa lamesa ug iya kining gipunit. Iya kining gigunitan. Miingon si Lolo nga ang kahilum sama sa usa ka medisina. Gusto si Gage nga makaangkon og kalinaw ug kahupayan human sa lubong ni Tiyo Vince.
Gitangtang ni Gage ang sungsong sa botelya ug gituwad kini ibabaw sa iyang ulo, nagpakaaron ingnon nga mabubuan siya og gamayng kahilum. Nahibalo siya nga ang botelya dili gayud puno sa kahilum. Apan nahibalo siya nga nagkinahanglan siya og hilum nga panahon aron mobati sa kaduol sa Dios.
Nabatyagan niya nga milugmaw ang mga luha sa iyang mga mata. Wala na si Tiyo Vince—wala nay mga komedya, wala nay makiglayug-layog kaniya. Nasakitan ang kasingkasing ni Gage nga wala na siya.
Dayon diha sa kahilum, gibati ni Gage ang kainit nga nagsugod sa iyang kasingkasing ug nahupay ang kasakit. Iyang nahinumduman nga si Tiyo Vince dili mawala sa hangtud; mibalhin lang siya ngadto sa laing kalibutan. Tungod kang Jesukristo ug sa plano sa kaluwasan, ang tanan mabuhi sa hangtud. Nahibalo si Gage nga ugma damlag iyang makita og usab ang iyang Tiyo Vince.
Dihang gigunitan niya ang botelya, gibati ni Gage ang kalinaw sa kahiladman. Nahibalo siya nga tungod kadto sa Espiritu Santo ug dili sa botelya. Ang botelya nagpahinumdom lamang kaniya sa paghilum aron mabati niya ang Espiritu Santo. Iyang gisungsungan og balik ang botelya ug gibutang sa lamesa.
Mibalik siya ngadto sa atubangang kwarto aron moipon sa iyang pamilya. Mahimo ra niyang madala ang kalinaw ug kahupayan sa Espiritu Santo diha sa iyang kahiladman bisan mogawas siya sa hilum niya nga kwarto.