Ang Pagpangandam Alang sa Iyang Kaugmaon
Ang ideya, usa ka trampoline, ug ang tinguha nga makatabang sa uban nagdasig sa 11-anyos nga batang babaye ngadto sa talagsaong mga leksyon mahitungod sa self-reliance ug pagserbisyo.
Kadaghanan sa nag-edad og 11 busy na sa eskwelahan, sa buluhaton sa balay, ug mga kalihokan kauban sa mga higala. Apan si Alexandra C. nga nga gikan sa estado sa Durango, Mexico, lahi nga 11-anyos. Agig dugang sa tanang normal nga mga butang nga buhaton sa mga batan-on sama niana nga edad, si Alexandra makakwarta na gikan sa kaugalingon niyang negosyo ug makaserbisyo sa iyang komunidad.
Nan, giunsa kaha sa usa ka batang babaye sa pagsugod og kaugalingon niyang kompanya?
Nagsugod sa usa ka Ideya
Nagsugod kini dihang si Alexandra nakadungog bahin sa klase nga gitanyag sa Simbahan nga makatabang sa mga tawo nga mahimong self-reliant. Ang grupo sagad nga para sa nanag-edad og 18 pataas, apan si Alexandra determinadong moapil. Ganahan siya sa ideya nga makakat-on unsaon nga makatrabaho o makasugod og kaugalingong negosyo.
Posible kaha nga siya nga usa ka bata nga naa pa sa elementarya, wala lang mohulma sa kaugalingon niyang kaugmaon apan mitabang usab og mga tawo kinsa mas naglisud pa kay kaniya? Bisan pa sa tanan, kadaghanan sa mga miyembro sa Simbahan nga iyang nailhan sa iyang balangay dunay gamay ra nga edukasyon ug gamayng kapanguhaan.
Miapil si Alexandra sa grupo nga gitawag og “Starting and Growing My Business [Pagsugod ug Pagpalambo sa Akong Negosyo],” usa sa tulo ka mga hilisgutan nga gitanyag. Imbis tudloan sa usa ka magtutudlo, ang grupo pangulohan kini sa usa ka facilitator—usa ka kaubanang miyembro sa grupo nga mogiya sa ubang mga miyembro hangtud mahuman ang kurso ug moawhag og diskusyon. Si Alexandra makigkita sa iyang grupo matag semana sulod sa tulo ka bulan.
Dihang nakat-unan ni Alexandra kon unsaon nga mahimong self-reliant sa temporal ug sa espiritwal, gisugdan niya ang pagsusi kon unsay panginahanglan sa iyang dapit. Iyang namatikdan nga walay igong pangkalingawan nga kalihokan para sa mga bata sa iyang lungsod, mao nga nagtigom siya og kwarta ug nagpalit og gamayng trampoline. Si Alexandra mibutang sa trampoline sa usa ka publikong dapit ug gipaabangan kini, gamit ang mga ideya nga iyang nakat-unan mahitungod sa pagpamaligya ug sa pinansyal nga iyang kurso.
Ang trampoline nahimong popular sa iyang komunidad.
Mga Panalangin sa Pagserbisyo ug Pagkugi sa Trabaho
Gisugdan sab ni Alexandra ang paggamit sa iyang mga kahanas sa uban pang mga paagi. Tungod kay mipakita siya og talagsaong pagrespeto sa tanang sakop sa iyang grupo ug mi-follow up sa tanan niyang mga pasalig, si Alexandra gisaligan nga mo-facilitate og bag-ong grupo—sa posisyon nga sagad huptan sa tawo nga 18 anyos o pataas.
Dihang nahimo nga facilitator si Alexandra, siya ang pinakabata sa unom ka mga partisipante sa iyang grupo. Mainampingon niyang gitun-an ang mga materyal sa dili pa magmiting ang grupo aron mahibalo siya unsaon nga mas makatabang siya sa kaubang mga sakop sa grupo. Tinuoray niyang gituman ang iyang bag-ong tahas. “Mabalaka siya kon ang iyang grupo dili moabut sa oras o kon ang video dili mosalida,” miingon ang iyang papa, si David.
Nakakat-on si Alexandra unsaon sa pagbalanse ang iyang homework, ang negosyo nga trampoline, ug ang pagka-facilitator sa maayo kaayong paagi. Ug sa iyang hunahuna igo gayud ang balus sa paghimo niini. “Gipanalanginan ako sa Dios dihang gihimo ko niya nga facilitator,” miingon siya. Alang niya, ang usa ka panalangin mao ang pagkat-on unsaon sa paghigugma ang imong giserbisyuhan.
Kana nga paghigugma misangput nga tabangan niya ang iyang grupo uban sa tinuod nga tinguha nga sila molampus. Sama pananglit, sa matag higayon nga magkita sila, ang mga sakop sa grupo mohimo og sinemana nga mga komitment nga gamiton unsay ilang gitun-an sa ilang mga negosyo ug dayon tudloan ang ilang mga pamilya sa mga baruganan sa ebanghelyo nga ilang nakat-unan. Kon ang mga partisipante sa grupo ni Alexandra dili makakab-ot sa ilang mga tumong o dili makatambong sa klase, iya kining bisitahan ngadto sa ilang mga balay aron masusi kon maayo ba sila ug awhagon sila sa paghimo sa ilang mga pasalig. “Ganahan kong mobisita sa mga sakop sa akong grupo,” miingon siya.
Midugang ang papa ni Alexandra, “Natingala ko nga magtan-aw sa akong gamayng anak sa dako kaayo niyang pagbati mahitungod sa kaayohan sa mga tawo nga nanginahanglan. Dako kaayo ang iyang pagbati sa iyang mga giserbisyuhan.”
Karon nga usa ka Beehive sa Young Women, si Alexandra dunay mga plano nga padak-an ang iyang negosyo nga trampoline ngadto sa silingan nga komunidad. Sa pagkat-on nga mahimong mas self-reliant ug pagtabang sa uban sa paghimo sa ingon, miingon siya nga nagsugod na siya og kakita sa mga kausaban sa iyang kaugalingon ug sa bag-o niyang mga higala sa iyang grupo. “Ang akong pagpamatuod kang Kristo milambo,” miingon si Alexandra. “Gibati nako ang kasigurado sa akong kaugalingon, ug gusto kong moserbisyo.”
Nakaingon si Alexandra niana gumikan niini nga training nga kurso, mas nakaila na siya kon si kinsa gayud siya ug unsaon niya sa pagserbisyo. “Akong nahibaloan nga akong mapalambo ang akong kaugalingon. Ug ganahan kong makakita sa tanang sakop sa grupo nga maglambo. Nahibalo ko nga mas maayo na sila karon, ang ilang mga negosyo molambo. Nasayud ko nga ang Dios mitawag og propeta ug nga ang self-reliance nga training usa ka pagpadayag gikan Kaniya.”
Para ni Alexandra, ang iyang pagpamatuod, kaugalingong bili, ug pagserbisyo sa uban mga butang nga takus buhaton.