Pagpunting sa Sentro

Motira unâ ug dayon drowingon ang target mahimong mura og binuang, apan usahay kita sa atong kaugalingon mopakita niana nga kinaiya sa ubang kahimtang sa kinabuhi.

Isip mga miyembro sa Simbahan, kita usahay adunay kalagmitan nga manubra ang atong pagdapig sa mga programa sa ebanghelyo, mga isyu, ug bisan mga doktrina nga daw makapaikag, mahinungdanon, o makalingaw kanato. Matintal ta nga modrowing og mga target palibut niini, mopatuo kanato nga kita nagpunting sa pinakaimportante nga bahin sa ebanghelyo.

Sayon kini buhaton.

Sa tibuok kasaysayan sa kalibutan nakadawat kita og maayo kaayo nga tambag ug inspirasyon gikan sa mga propeta sa Dios. Nakadawat usab kita og direksyon ug katin-awan gikan sa nagkalain-laing mga publikasyon, mga handbook, ug mga manwal sa Simbahan. Makapili dayon kita sa atong paborito nga hilisgutan sa ebanghelyo, maka-drowing og bull’s-eye palibut niini, ug mangatarungan nga ato nang nailhan ang pinaka importante nga bahin sa ebanghelyo.

Dili kini talagsaong problema sa atong panahon. Sa karaang panahon, ang relihiyusong mga lider migahin og dako kaayong panahon sa pag-catalog, pag-rank, ug pag-debate asa sa mga gatusan ka mga sugo ang labing importante.

Usa ka adlaw usa ka grupo sa relihiyusong mga eskolar misulay sa paglakip sa Manluluwas ngadto sa kontrobersiya. Ila Siyang gipangutana unsay Iyang hunahuna sa isyu aron sila magkasinabut.

“Magtutudlo,” nangutana sila Kaniya, “unsa man ang dakong sugo sa kasugoan?”

Nasayud kitang tanan giunsa pagtubag ni Jesus: “Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan.

“Mao kana ang dako ug ang unang sugo.

“Ug ang ikaduha sulosama ra nga mao kini, Higugmaa ang imong silingan sama sa imong kaugalingon.

“Niining duha ka mga sugo nagasukad ang tibuok nga kasugoan ug ang mga propeta.”¹

Bantayi ang katapusang sentence: “Niining duha ka mga sugo nagasukad ang tibuok kasugoan ug ang mga propeta.”

Wala lamang gipakita kanato sa Manluluwas ang target, apan Iya usab nga gipaila ang bull’s-eye.

Isip mga miyembro sa Simbahan, kita mipakigsaad sa pagdala ngari sa atong kaugalingon sa pangalan ni Jesukristo. Ang nasabtan nga bahin niana nga pakigsaad mao ang panabut nga kita maningkamot sa pagkat-on kabahin sa Dios, sa paghigugma Kaniya, sa pagpalambo sa atong pagtuo Kaniya, sa pagtahud Kaniya, sa pagsubay sa Iyang dalan, ug sa pagbarug nga makanunayon isip Iyang mga saksi.

Kon magkat-on pa kita og dugang kabahin sa Dios ug mobati sa Iyang gugma alang kanato, mas makaamgo kita nga ang walay kinutuban nga sakripisyo ni Jesukristo usa ka balaanong gasa sa Dios. Ug ang gugma sa Dios nagdasig kanato sa pagsubay sa agianan sa tinuod nga paghinulsol, nga modala ngadto sa milagro sa kapasayloan. Kini nga proseso nagtudlo kanato sa pag-angkon og mas dakong gugma ug kalooy alang niadtong anaa sa atong palibut. Kita makakat-on sa pagtan-aw lapas pa sa pagtawag og ngalan alang sa usa ka tawo. Kita makalikay sa tintasyon sa pag-akusar o paghusga sa uban sa ilang mga sala, mga kahuyang, mga sipyat, mga opinyong politika, mga relihiyusong tinuohan, mga nasyunalidad, o kolor sa panit.

Kita mokonsiderar sa matag usa nga atong makita isip anak sa atong Langitnong Amahan—atong igsoon.

Kita makatabang sa uban pinaagi sa panabut ug paghigugma—bisan niadtong kinsa lisud higugmaon. Kita magbangutan uban niadtong nagbangutan ug mohupay niadtong nanginahanglan sa kahupayan.²

Ug kita moila nga wala na kinahanglana ang mabudlay pa bahin sa eksakto nga target sa ebanghelyo.

Ang duha ka nag-unang mga sugo mao ang target. Niining duha ka mga sugo nagasukad ang tibuok nga kasugoan ug ang mga propeta.³ Sa atong pagdawat niini, ang tanang mga maayong butang masabtan ra.

Kon ang atong primerong gi-focus, gihunahuna, ug gipaningkamutan nakasentro sa pagpalambo sa atong gugma alang sa Labing Gamhanan nga Dios ug paghatag sa atong kasingkasing sa uban, mahibaloan nato nga atong nakit-an ang eksaktong target ug nagpunting kita sa bull’s-eye—nga mamahimong tinuod nga mga disipulo ni Jesukristo.