Celestial nga mga Higayon

Usa ka adlaw, ang akong mga lider sa Young Women mitudlo kanamo kabahin sa espesyal nga mga higayon sa dihang tinuod gayud nga mobati ka sa Espiritu ug mobati nga duol sa Dios. Ilang gitawag kini og “celestial nga mga higayon,” usa ka yano nga mga pulong nga sayon ra hinumduman. Alang kanako, nasayud gayud ako unsa kining “celestial nga higayon”; nabati ko kini sa una, sama sa higayon kon mobati ka og gamay kaayo o makatilaw man lang og unsaang kinabuhi sa celestial nga gingharian. Ug daghan kaayo ko niini nga mga higayon!

Human ang among mga lider mihatag sa ideya, nanggawas mi. Ang adlaw misanag sa mga kahoy. Mipiyong kami. Gibati nako nga ang adlaw diha sa akong nawong samtang ang init nga hangin mihuyop. Ang mga langgam nagkanta-kanta ug ang mga kahoy nagsayaw-sayaw sa kahanginan samtang kami nagtagamtam sa mga hinimo sa Dios. Usa kadto ka celestial nga higayon.

Laing panahon nga akong naangkon nga usa ka celestial nga higayon mao kadtong human nabunyagan ang akong suod nga higala. Sa among paglakaw balik sa chapel alang sa pagtiwas sa tulumanon, iya kong gigunitan ug nag-istorya mi bahin sa katalagsaon nga kami managhigala ug sa kanunay managhigala—bisan ngadto sa kahangturan. Dili ko gayud kadto kalimtan. Nadasig ko, nalipay ug mapasalamaton!

Mga usa ka tuig human niadto, gibati na usab namo kadtong sama nga kalipay samtang nagbarug kami sa bunyaganan ug nagtan-aw sa iyang mama nga bunyagan. Naa gayud ang kaanindot sa palibut.

Tingali ang pinakanindot nga dapit nga maangkon kini nga mga kasinatian mao sa sulod sa balay sa Ginoo. Sa unang higayon nga ako misulod sa templo, napanalanginan ako nga makatambong kauban sa akong mga ginikanan ug akong igsoon nga babaye. Gibunyagan ko alang sa akong lola sa tuhod, ug mibati ko nga nalipay siya.

Ang mga celestial nga mga higayon mahitabo bisan asa ug bisan kanus-a—samtang maminaw sa musika o atol sa family home evening o sa eskwelahan. Nahinumdom ko sa usa ka family home evening diin ang tanan dili makahunong og katawa! Usa kadto sa akong paborito nga mga higayon.

Kini nga celestial nga mga higayon milig-on sa akong pagpamatuod ug nakatabang kanako sa pag-angkon og dugang nga diwa sa pagpasalamat. Nakatudlo kini kanako og mahinungdanon nga mga leksyon. Ilabi na, nakapalipay kini kanako ug nakapadasig bahin sa ebanghelyo! Nasayud ko nga kon mopadayon ko sa pagsunod sa ebanghelyo, tanang kanindot, kalipay, kalinaw, ug gugma nga akong mabati sa matag celestial nga higayon mahimong usa ka butang nga mabati gayud nako—sa mas dako nga sukod—didto sa celestial nga gingharian.