Ang Katuyoan sa Relief Society

Imahe

Woman helping older man

Ang katuyoan sa Relief Society mao ang “pag-andam sa mga babaye alang sa mga panalangin sa mahangturon nga kinabuhi,” miingon si Linda K. Burton, Kinatibuk-ang Presidente sa Relief Society.¹ Pinaagi sa hugot nga pagtuo, pamilya, ug kahupayan nga kita makaatiman sa atong “importanteng bahin sa buluhaton.”²

Ang Relief Society “mao ang temporal ug espirituhanon nga buhat,” miingon si Carole M. Stephens, Unang Magtatambag sa Kinatibuk-ang Kapangulohan sa Relief Society. “Mao kana ang gibuhat sa mga babaye sa panahon sa Manluluwas, ug mao kana ang ipadayon nato sa pagbuhat.”³

Sa atong pagtan-aw sa babayeng Samarianhon sa atabay, kinsa mibiya sa iyang banga ug midagan aron sa pagsulti sa uban nga si Jesus mao ang propeta (tan-awa sa Juan 4:6–42), o ngadto kang Febe, kinsa malipayong mialagad sa uban sa iyang tibuok kinabuhi (tan-awa sa Mga Taga-Roma 16:1–2), atong makita ang mga ehemplo sa mga babaye sa panahon sa Manluluwas kinsa nagbuhat og aktibong bahin sa pagduol kang Kristo. Siya kadtong kinsa miabli sa atong agianan ngadto sa kinabuhing dayon (tan-awa sa Juan 3:16).

Kon atong tan-awon ang atong igsoong mga babaye nga pioneer sa Nauvoo, Illinois, kinsa nagkapundok sa panimalay ni Sarah Kimball niadtong 1842 aron sa pagporma sa ilang kaugalingong organisasyon, atong makita ang plano sa Dios sa pag-establisar sa Relief Society ug pagsunod sa mga baruganan sa priesthood. Human misulat si Eliza R. Snow og konstitusyon, si Propeta Joseph Smith miribyu niini. Siya nakakita nga ang Simbahan wala gayud maorganisar sa hingpit hangtud nga ang mga kababayen-an naorganisar. Siya miingon nga ang Ginoo midawat sa ilang halad apan aduna pay mas maayo. “Akong i-organisar ang mga babaye ubos sa priesthood subay sa sumbanan sa priesthood,” siya miingon.⁴

“Ang Relief Society dili lamang usa ka laing pundok sa mga babaye nga naningkamot sa paghimo og maayo dinhi sa kalibutan. Lahi kadto. Kadto ‘butang nga mas maayo’ tungod kay kadto giorganisar ubos sa awtoridad sa priesthood. Ang pag-organisar niini usa ka gikinahanglan nga lakang sa pagpadayon sa buhat sa Dios dinhi sa yuta.”⁵

Imahe

Relief Society seal