Mga panabut gikan sa Doktrina ug mga Pakigsaad bahin sa Amahan ug sa Anak

Ni Norman W. Gardner

Mga Seminary ug Institute

Kini nga basahon sa mga pagpadayag nagpakita sa nawala nga mga kamatuoran bahin sa Dios nga Kapangulohan ug unsaon nato pagpuyo pag-usab uban sa Manluluwas ug sa Langitnong Amahan.

Imahe

First Vision

Unang Panan-awon, ni Walter Rane; background © iStock/Thinkstockz

Ang Pagpahiuli sa ebanghelyo nakahatag sa kalibutan og mas dakong kahibalo kabahin sa kinaiya sa Dios nga Kapangulohan ug sa Ilang mga katuyoan. Uban niini nga kahibalo, ang atong hugot nga pagtuo Kanila motubo ug ang atong tinguha sa paghupot sa Ilang mga kasugoan molambo.

Sa piho nga paagi, ang Doktrina ug mga Pakigsaad nagtabang kanato sa pagkat-on kabahin kang Jesukristo tungod kay kini nagtudlo og gamhanang mga kamatuoran kalabut sa “Iyang pagkabalaan, Iyang kahalangdon, Iyang pagkahingpit, Iyang gugma, ug ang Iyang gahum sa pagtubos” (pasiuna sa Doktrina ug mga Pakigsaad). Kini nga basahon sa bag-ong pagpadayag naglakip sa imbitasyon sa Ginoo sa “pagkat-on kanako, ug paminaw sa akong mga pulong” (D&P 19:23). Kini makapalawom sa atong pagsabut diha Kaniya, unsa ang atong ralasyon diha Kaniya, unsa ang Iyang nahimo alang sa atong katubsanan, ug unsa ang Iyang gipaabut diri kanato.

Sa Doktrina ug mga Pakigsaad, makadungog kita sa tingog ni Jesukristo

Si Joseph Smith nakadawat og daghang mga pagpadayag gikan sa Manluluwas.

Ang Doktrina ug mga Pakigsaad dili karaan nga kasulatan apan naglangkob og mga pagpadayag nga gihatag ngadto kang Joseph Smith ug sa iyang mga sumusunod sa atong bag-ong kalibutan. Ang balaang tingog ni Jesukristo madungog nga nagsulti isip mao ang representante sa Amahan.¹ Ang tingog mismo ni Ginoong Jesukristo girekord sa kasagaran diha sa Doktrina ug mga Pakigsaad kay sa diha sa Bag-ong Tugon, Basahon ni Mormon, ug Perlas nga Labing Bililhon nga giusa.²

D&P 18:33–35 “Ako, si Jesukristo, imong Ginoo ug imong Dios, nakapamulong niini. Kini nga mga pulong dili sa mga tawo … , apan gikan kanako; … kini mao ang akong tingog nga namulong kanila nganha kaninyo.”

Ang Doktrina ug mga Pakigsaad naglangkob sa mga istorya niadtong nakakita sa Dios

Joseph Smith ug Oliver Cowdery nakakita ni Jesukristo sa Kirtland Temple.

Isip resulta sa Unang Panan-awon niadtong 1820, ang batan-ong si Joseph Smith nakakuha og labing unang kahibalo sa pagkaanaa sa Amahan ug sa Anak. Ang Doktrina ug mga Pakigsaad nagrekord og dugang nga mga hitabo sa dihang ang Propeta ug ang uban nakakita sa Amahan ug sa Anak sa mga panan-awon o personal nga mga pagpakita. Kini nga mga istorya nagsilbi nga modernong mga saksi alang kanato nga Sila buhi ug nga Sila midumala sa Pagpahiuli sa ebanghelyo.

D&P 76:19–23 Ang Amahan ug ang Anak nakit-an sa panan-awon niadtong Pebrero 1832.
D&P 137:1–3 Ang Amahan ug ang Anak nakit-an sa panan-awon niadtong Enero 1836.
D&P 110:2–4 Ang halangdon nga Jehovah, si Jesukristo, mipakita niadtong Abril 1836.

Ang Doktrina ug mga Pakigsaad nagtabang kanato nga makat-on kabahin sa Dios nga Amahan

Samtang gibato hangtud mamatay, si Stephen nakakita sa Amahan ug sa Anak.

Si Propeta Joseph Smith mitudlo: “Kon kita makasabut sa kinaiya sa Dios, ug nasayud unsaon sa pagduol ngadto Kaniya, Iyang buksan ang mga kalangitan ngari kanato. … Kon kita andam na nga moduol ngadto Kaniya, Siya andam nga moduol ngari kanato.”³ Ang Doktrina ug mga Pakigsaad nagtabang kanato nga maduol sa Langitnong Amahan pinaagi sa pagtudlo kabahin sa Iyang kinaiya, mga hiyas, ug mga katuyoan.

D&P 20:12, 17–18 ang Dios Amahan walay kinutuban ug dili mausab.
D&P 76:20, 23 Ang Amahan ug ang Anak managbulag ug managlahi nga mga binuhat.
D&P 93:3–5 Ang Amahan ug ang Anak usa ra.
D&P 130:22 Ang Amahan ug ang Anak adunay mga lawas nga unod ug mga bukog.
D&P 138:3–4 Ang Langitnong Amahan nahigugma sa Iyang mga anak, mao nga Iyang gipadala ang Iyang Anak aron sa pagluwas sa katawhan.

Ang Doktrina ug mga Pakigsaad nagtabang kanato nga makat-on kabahin kang Jesukristo

Si Jehovah (si Jesukristo) misulti ngadto kang Moises nag-atubangay.

Si Jesukristo mao ang Unang natawo sa tanang espiritu nga mga anak sa Langitnong Amahan. Sa kinabuhi sa wala pa dinhi sa kalibutan, si Jesus nakabaton sa tanang kahibalo ug gahum ug mirepresentar sa Amahan isip ang Tiglalang sa mga kalibutan. Pinaagi sa Iyang balaan nga gahum, si Ginoong Jesukristo mao ang tinubdan sa kahayag ug kinabuhi alang sa tanan Niyang mga nilalang. Ang Doktrina ug mga Pakigsaad nagpatin-aw sa kadaghanan sa Iyang mga tahas sa plano sa Amahan.

D&P 93:21 Si Jesukristo mao ang Unang natawo sa tanang espiritu nga mga anak sa Dios.
D&P 38:1–3 Si Jesukristo nakabaton sa tanang kahibalo ug gahum sa wala pa mabuhat ang kalibutan.
D&P 76:24 Si Jesukristo mirepresentar sa Amahan isip ang Tiglalang sa mga kalibutan.
D&P 88:6–13 Si Jesukristo mao ang tinubdan sa kahayag ug kinabuhi alang sa tanan Niyang mga nilalang.
D&P 45:11; 136:21, 22 Si Jesukristo mao ang halangdon nga Jehovah sa Daan nga Tugon.
D&P 43:34 Si Jesukristo mao ang Manluluwas sa kalibutan.
D&P 18:11–13; 20:21–25 Si Jesukristo nag-antus, nalansang, namatay, ug nabanhaw pag-usab.
D&P 29:10–12 Si Jesukristo misaad nga mobalik sa yuta uban sa gahum ug himaya.

Ang Doktrina ug mga Pakigsaad nagtabang kanato nga makat-on unsa ang gipaabut kanato sa Amahan ug sa Anak

Pinaagi sa bag-ong pagpadayag, atong makat-unan unsaon nga mamahimong mas mahisama sa Amahan ug sa Anak.

Labaw pa sa bisan unsa nga libro sa kasulatan, ang Doktrina ug mga Pakigsaad nakapahimo niini nga yano kon unsa ang mahangturon nga kinabuhi: ang pagbalik og puyo uban sa Amahan ug sa Anak, makadawat sa tanan nga iya sa Amahan, ug mamahimo nga sama Kanila. Nagsulti usab kini kanato giunsa ni Jesukristo, pinaagi sa Iyang Pag-ula, paghimo nga posible ug unsa ang atong gikinahanglan nga buhaton aron mapatuman ang mga rekisito nga Iyang gihatag. Agig dugang, atong makat-unan sa Doktrina ug mga Pakigsaad unsa ang gipasabut sa pagsunod sa ehemplo ni Jesukristo, sanglit, sama kanato, si Jesukristo wala makadawat sa kahingpitan sa sinugdanan apan nakaangkon og grasya ug dugang pa nga grasya hangtud nga Siya nakadawat sa tanang gahum ug himaya.

D&P 1:32; 19:16–19; 58:42–43; 95:1–2 Ang Manluluwas mohatag og kapasayloan niadtong kinsa maghinulsol.
D&P 20:37, 41, 72–74; tan-awa usab sa 33:11 Ang Dios nga Kapangulohan nagdapit niadtong kinsa motuo sa pagdawat sa bunyag ug sa Espiritu Santo.
D&P 84:19–21 Pinaagi sa mga ordinansa sa Melchizedek Priesthood, ang gahum sa pagkadiosnon gipakita.
D&P 93:12–14, 16–17 Si Jesukristo nakadawat og grasya ug dugang pa nga grasya hangtud nga Siya nakadawat og kahingpitan.
D&P 20:30–31 Ang Manluluwas naghatag og grasya niadtong kinsa naghigugma ug nag-alagad Kaniya.
D&P 35:2; 50:40–43 Mahimo kitang usa uban sa Amahan ug Anak.
D&P 93:19–20 Makadawat kita sa kahimayaan ug kahingpitan sa Amahan.

Ang Doktrina ug mga Pakigsaad naghatag og sundanan sa pag-angkon og espirituhanon nga kahibalo

Ang pagtuon ug pag-ampo makabutyag sa espirituhanon nga kasayuran.

Agig dugang sa pagtudlo ug pagpamatuod sa Amahan ug Anak, ang Doktrina ug mga Pakigsaad naghatag og sundanan alang sa pag-angkon og espirituhanon nga kahibalo kabahin sa tanan nga mga sakop sa Dios nga Kapangulohan pinaagi sa tabang sa Espiritu Santo: pagtuon sa pulong sa Ginoo, paghangyo og panabut sa Langitnong Amahan, ug pagpakita og hugot nga pagtuo kang Jesukristo pinaagi sa pagsunod sa Iyang mga sugo.

Ang kahayag ug kamatuoran gisaad alang niadtong kinsa nagpuyo sumala sa tanan nga mga pulong sa Ginoo. Mahinungdanon ang pagkat-on sa mga detalye kabahin sa kinaiya sa Dios nga Kapangulohan ug sa Ilang mga katuyoan. Kini nga kahibalo makapahimo sa makugihon nga pagpangita og espirituhanong pagsabut ug kombiksyon sa kamatuoran. Kini nga kahibalo mopanghimatuod kanato nga ang Langitnong Amahan ug si Jesukristo nakaila kanato sa personal, nga Sila nahigugma kanato, ug nga Sila nagtinguha sa pagpanalangin kanato og mahangturon nga kinabuhi.

D&P 6:5; 76:5–10, 114–118 Ang Langitnong Amahan gusto nga kita mangayo og kahibalo ug mosaad sa pagpakigbahin niini.
D&P 84:43–48 Ang Amahan motudlo kanato kon makugihon kitang mosunod sa Iyang mga pulong.
D&P 88:118 Pangitaa ang pagtulun-an pinaagi sa pagtuon ug pinaagi sa hugot nga pagtuo.

Panapos

Si Joseph Smith mipadayag sa kinaiya ug mga katuyoan sa Amahan ug sa Anak.

Ang Doktrina ug mga Pakigsaad nagtabang kanato nga maduol sa Langitnong Amahan ug sa Iyang Bugtong nga Anak, pinaagi sa pagpadayag sa Ilang kinaiya, ug Ilang mga katuyoan. Si Propeta Joseph Smith mihatag og summary ngano nga kita makasalig sa Dios: “Ang mga katuyoan sa atong Dios mahinungdanon, ang Iyang gugma dili matugkad, ang Iyang kaalam walay utlanan, ug ang Iyang gahum walay kinutuban; busa, ang mga Santos adunay rason sa pagmaya ug paglipay, sa kahibalo nga ‘kining Dios mao ang atong Dios sa mga katuigan nga walay katapusan’ (Salmo 48:14).”⁴