Pag-adjust sa Akong mga Prayoridad

Igo lang kong nakasugod sa among family blog, nakamatngon ko nga nagamit diay nako hapit tanan nakong libring panahon sa pag-update niini ug naghunahuna kon unsaon paghimo niini nga mas mamugnaon o epektibo. Migahin sab ko og dakong panahon sa pagbasa sa ubang mga blog.

Sulod sa pipila ka semana, ang pag-blog nahimo nang prayoridad nga mipuli sa akong inadlaw nga pagtuon sa kasulatan ug ubang mga pagbasa. Dili na ko maka-concentrate samtang nagtuon, dili na ko gustong mobasa sa ingon kadaghan, ug akong gibati ang kakulang sa Esipitu sa akong kinabuhi. Gamay ra ang akong pailub sa akong mga anak, ug ang panahon nga unta akong igahin uban kanila, akong gigahin diha sa computer.

Dili sa ingon nga dili husto ang pag-blog, total, usa man kini sa dakong paagi nga makakonektar sa pamilya ug mga higala. Apan sukad nga akong nabati nga ang akong gitutukan nalayo na gikan sa mga butang nga makahatag nako og usa ka lig-ong pundasyon, nasayud ko nga kinahanglan aduna koy usbon.

Misugod ko sa pag-angkon sa akong kaugalingon nga wala na nako kinahanglana nga mag-blog sa matag adlaw ug usab wala na nako kinahanglana ang pagsusi sa mga blog sa ubang tawo. Mihukom ko nga makagahin pa gihapon ko og oras sa computer apan inig kahuman lang nako sa akong pagtuon sa kasulatan ug uban nga pagbasa. Sa dihang nahimo na nako ang importanting mga butang, wala nay dakong panahon para mag-blog, apan Ok ra. Nabawi nako ang dakong panahon—panahon nga karon akong gigahin sa pag-amuma ug pagpakigdula sa akong mga anak, pagbasa, ug pagtuon.

Human lang sa pipila ka adlaw nga pag-adjust sa mga prayoridad, nabantayan nako nga gibati nako ang Espiritu nga mas abunda na sa akong kinabuhi pag-usab.

Nakahibalo ko nga samtang ako naghimo sa akong prayoridad sa matag adlaw sa paghimo sa unsay makabenipisyo kanako sa espirituhanon nga paagi, mobati ko sa Espiritu nga magkadugang sa matag adlaw. Nasayud ko nga ang paggahin og panahon sa pagtuon sa mga kasulatan, pagbasa sa mga magasin sa Simbahan ug ubang maayo nga mga basahon, ug sa pahunahuna mahitungod sa mga butang nga importante sa espirituhanong paagi nakatabang nako nga mahimong mas maayong asawa, mas maayong inahan, ug mas maayong miyembro sa Simbahan sa Ginoo.