Unsa ang Atong Gituohan
Kita Nagtuo nga ang Simbahan Mopuno sa Yuta
Dihay unom lamang ka mga miyembro sa Simbahan sa dihang naorganisar kini niadtong 1830 sa gamay nga lungsod sa New York, USA. Sukad niadto ang Simbahan mitubo ngadto sa labaw sa 15.5 ka milyon ka mga miyembro nga dunay mga ward ug branch sa kapin sa 150 ka mga nasud. Kini nga pagtubo mao ang katumanan sa panagna sa Daang Tugon nga ang Simbahan mopuno sa tibuok yuta (tan-awa sa Daniel 2:31–45). Ang Simbahan—ang gingharian sa Dios sa yuta—gihulagway nga usa ka bato “gisapsap nga walay kamot” (Daniel 2:45), nagpadayag nga kini usa ka balaan, dili hinimo sa tawo, nga trabaho.
Bisan ang impluwensya sa Simbahan mipuno sa yuta, ang mga miyembro niini gamay ra gihapon. Si Nephi nakakita niini ug misulat sa atong panahon, “Ug nahinabo nga ako nakakita sa simbahan sa Kordero sa Dios, ug ang iyang gidaghanon diyutay ra, tungod sa mga pagkadautan (1 Nephi 14:12). Samtang ang panahon sa Ikaduhang Pag-anhi ni Jesukristo nagkaduol, ang kalibutan magkadautan, ug “mag-anam og ka dili popular ang mamahimong usa ka Santos sa Ulahing mga Adlaw.”1
Apan si Nephi nakakita “nga ang simbahan sa Kordero, kinsa mao ang mga Santos sa Dios, diha usab sa ibabaw sa tibuok yuta” (1 Nephi 14:12). Ang mga ward ug mga branch makita sa tibuok kalibutan, ang kinatibuk-ang komperensya gihubad sa labaw sa 90 ka pinulongan, ug hapit 75,000 ka full-time nga misyonaryo ang nagpakigbahin sa ebanghelyo sa 418 ka mga misyon. Ang ebanghelyo gisangyaw sa tibuok kalibutan pinaagi sa social media ug mga website sama sa Mormon.org ug LDS.org.
Kini nga mga paningkamot importante ug malukpanon apan sa kasagaran hilom nga naglihok. “Kini nga buhat sa Ginoo mahinungdanon ug kahibulongan, apan kini nagpaingon sa unahan nga sa tinud-anay wala mamatikdi hapit sa daghang politikal, kultura ug edukasyonal nga mga lider sa katawhan. Kini nagpalambo og nagkahiusang kasingkasing ug pamilya sa matag higayon, sa hilum ug sa kaligdong, ang sagradong mensahe nagpanalangin sa mga tawo bisan asa.”2
Kini nga bato nga gipanagna dugay na kaayo sa tinuod nagligid, ug kon kita mohimo sa atong bahin, ang ebanghelyo magpadayon sa pagkatap ug mopuno sa tibuok yuta (tan-awa sa Daniel 2:31–45).
Unsay atong mahimo sa pagtabang nga ang ebanghelyo magpadayon sa tibuok kalibutan?
-
Ang pagtuman sa mga sugo ug pagpalig-on sa atong mga pagpamatuod makahatag nato og pundasyon sa pagtabang sa pagsangyaw sa ebanghelyo.
-
Ang pagtudlo sa atong mga pamilya sa ebanghelyo makapalig-on kanila nga magpuyo nga matinud-anon sa kalibutan nga nagtudlo kanila og lain.
-
Ang pagtuman sa atong mga calling makatabang sa paglig-on sa Simbahan sa atong lokal nga mga dapit.
-
Makatabang kita sa pagsangyaw sa ebanghelyo pinaagi sa yano nga paghisgot niini ngadto sa mga tawo.
-
Sa templo makapahigayon kita og mga ordinansa alang niadtong kinsa namatay nga wala makadungog sa ebanghelyo niini nga kinabuhi.