Lima ka mga Saad sa Pag-ampo
Ang tagsulat nagpuyo sa Utah, USA.
Mihatag ang Langitnong Amahan sa pag-ampo isip paagi sa pagpakigsulti direkta ngadto Kaniya aron sa pagpasalamat, pagpangayo og mga panalangin, ug pagtubo sa espirituhanong paagi. Usahay kining tanan nagkinahanglan lang sa pagduko sa ulo, gikyugpos nga mga bukton, ug pipila ka yano ug sinsero nga mga pulong. Nindot, no? Ania ang llima ka lain-laing mga saad o mga panalangin nga atong madawat kon kita mag-ampo:
1 Kalig-on sa Pagbuntog
Isip mga tawo, mabati nato ang kahuyang sa daghang mga paagi—sa pisikal, emosyunal, espiritwal, ug sa hunahuna. Makigbisog kita sa pagpaningkamot nga makalahutay sa lumba o pagpasar sa test o pagbatok sa tintasyon o gani sa pagbati sa Espiritu. Apan ang pag-ampo makahatag nato sa kalig-on nga atong gikinahanglan sa pagbuntog sa bisan unsa nga ihatag sa kinabuhi kanato.
Sama sa gisulti ni Nephi, “Ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila” (1 Nephi 3:7). Ang Ginoo makahatag nato sa kalig-on aron sa pagtuman sa bisan unsa nga maayong butang nga atong gipaningkamutan nga buhaton kon kini Iyang kabubut-on.
Pag-ampo alang sa kalig-on sa pagbuntog sa tintasyon. Pag-ampo alang sa kalig-on sa pagtutok ug pagmabungahon sa pagtuon alang sa usa ka test. Pag-ampo alang sa kalig-on sa pagdagan ug dili maluya. Pag-ampo alang sa kalig-on, ug Siya mopalig-on kaninyo.
Mga paghulagway pinaagi ni Clayton Thompson
2 Pagpasaylo
Bisan og nindot nga hunahunaon nga kita hingpit, apan dili kita hingpit. Makahimo kita og mga sayop, ug kana kabahin lamang sa kinabuhi. Apan ang Ginoo mihatag og paagi sa pagtarung niini: ang gahum sa Pag-ula ni Jesukristo. Ug ang usa ka paagi ngadto sa Iyang gahum mao ang pag-ampo.
Kon kita mangayo og pasaylo pinaagi sa pag-ampo, mapasaylo kita sa atong mga sala pinaagi sa Pag-ula sa Manluluwas. Bisan og ang dagkong mga sala nagkinahanglan sa tabang sa usa ka bishop o branch president, ang personal ug sinsero nga pag-ampo sa kanunay mao ang usa sa unang mga lakang sa kapasayloan—bisan og kita naghangyo sa Langitnong Amahan sa pagpasaylo nato o sa pagtabang nato sa pagpasaylo sa uban. Gani motabang Siya nato nga makat-on unsaon sa pagpasaylo sa atong kaugalingon.
3 Kahibalo ug Giya
Ang personal nga pagpadayag tingali usa sa unang gisaad nga panalangin sa pag-ampo nga inyong gihunahuna, ilabi na sa bag-ong tema sa Mutual nga inyong gihunahuna. Si Joseph Smith wala makahibalo kon asa nga simbahan ang apilan, mao nga miluhod siya didto sa Sagrado nga Kakahoyan, nangutana ug nakadawat sa tubag—sa usa ka nindot kaayo nga paagi.
Apan ang pagpadayag dili lang alang sa mga propeta, ug kini dili kinahanglan nga talagsaon kaayo nga kasinatian. Kon si bisan kinsa nato ang nakulangan og kaalam sa bisan unsa, kita makahimo ug kinahanglan nga mangutana sa Dios. Motubag Siya, bisan usahay dili sa paagi nga atong gipaabut. Ang Ginoo motubag sa atong mga pangutana ug motabang og giya sa atong kinabuhi, apan kinahangalan nga mangayo kita pag-una!
4 Tinguha sa Pagbuhat sa Kabubut-on sa Ginoo
Tingali mas lisud ang pagtan-aw niini isip usa ka panalangin—tungod kay, sa tinuod lang, usahay gusto kita sa mga butang alang sa atong kaugalingon nga dili maoy gusto sa Ginoo alang nato. Apan kon kita mag-ampo nga makabig sa tinud-anay ug sa pagbaton og tinguha sa pagbuhat sa kabubut-on sa Ginoo, makamatikod kita og butang nga talagsaon: unsay atong gusto nga sugdan nga mas maparehas sa unsay Iyang gusto.
Kining kausaban sa kasingkasing dili mahitabo dayon. Si Elder David A. Bednar sa Korum sa Napulog Duha ka mga Apostoles miingon “Kasagaran ang pagkakabig padayon nga proseso ug dili usa lang ka hitabo nga moresulta gikan sa gamhanan o dramatikong kasinatian. Pagtulun-an human sa usa ka pagtulun-an ug lagda human sa usa ka lagda, hinay-hinay ug hapit dili gani mabantayan, ang atong mga motibo, mga hunahuna, mga pulong, ug mga binuhatan mahiangay sa kabubut-on sa Dios” (“Nakabig ngadto sa Ginoo,” Liahona, Nob. 2012, 108).
5 Kalinaw
Usa sa mga panalangin nga gisaad nato kon kita mag-ampo mao ang kalinaw ug kahupayan pinaagi sa Espiritu Santo. Human sa tanan, Siya gitawag nga Maghuhupay. Salig lang nga ang kalinaw moabut bisan sa malisud nga mga panahon. Hinumdumi ang saad sa Ginoo sa Juan 14:27: “Kaninyo ibilin ko ang kalinaw, kaninyo ihatag ko ang akong kalinaw: hatagan ko kamo niini dili sama sa hinatagan sa kalibutan. Kinahanglan dili magkaguol ang inyong kasingkasing, ni magtalaw.” Ang kalinaw moabut gayud kon kita mangayo.
Ang pag-ampo mao ang direkta nga paagi sa pagpakigsulti sa atong mahigugmaong Amahan. Gamita kini ug tuguti Siya nga mopanalangin kaninyo tungod niini. Apan human makadawat niini nga mga panalangin gikan sa sinsero nga pag-ampo, hinumdumi ang pagpadayag sa inyong kinasingkasing nga pasalamat pinaagi sa—nakatag-an mo—usa ka pag-ampo.