Nabunyagan ko pagka 2012 ug nagtambong sa branch sa Ipoméia Brazil District. Sukad 2014, kanunay gayud akong nagbuhat sa family history. Nagsugod kini sa imbitasyon gikan kang Elder Neil L. Andersen sa Korum sa Napulog Duha ka mga Apostoles sa RootsTech sa pagbuhat og mga bunyag alang sa akong kaugalingong mga pangalan sa pamilya. Gibati ko gayud nga masaligon sa pagbuhat sa family history, nasayud nga kon ako “manuktok,” kini “pagaablihan” (tan-awa sa Mateo 7:7).

Karon ako adunay daghang mga henerasyon, mga litrato, mga dokumento, ug, labing importante, daghang mga istorya sa pamilya, nga makapatingala. Sa pag-angkon niini nga impormasyon, misulat ako og libro nga may mga litrato ug mga petsa gikan sa akong family history. Kini nga proyekto nakatabang kanako sa pagkontak sa akong dili miyembro nga mga sakop sa pamilya ug mihatag kanako og kahigayunan sa pagpakigbahin sa akong pagpamatuod nga ang mga pamilya mahimong mahangturon.

Kini nga buhat nakatabang kanako sa pagbarug sa balaan nga mga dapit, sa pagpabiling aktibo sa Simbahan, ug pagdawat sa tawag nga magmisyon sa pag-alagad sa Ginoo.

Ako adunay pagpamatuod nga ang buhat sa kaluwasan nga gibuhat niini nga Simbahan sa duha ka bahin sa tabil tinuod ug dinasig sa atong Langitnong Amahan. Sa wala pa ang akong misyon, ako adunay kahigayunan sa pagbunyag sa akong mga katigulangan, ug karon isip misyonaryo ako adunay kahigayunan sa pagbunyag sa mga tawo nga buhi ug gustong mousab sa ilang kinabuhi sa kahangturan.