Tai mwaninga n Tataro ibukin Erik
E maeka te tia korokaraki i Nevada, USA.
“Ni kabane aomata a inaomata n rinei maiuia are a tangiria” (Kuna n taromauri, nambwa 240).
Ana utu Kari a katorobubua irarikin te kaintekateka ibukin te tataro n utu. Ni kabane a booti baia ma te karinerine. Baba e tuanga tarin Kari ae uarereke, Liv, bwa e na tataro.
“Tai mwaninga ni karabwa Tamara are i Karawa ibukin mwaitin ara kakabwaia,” e kauringnga Baba.
“Ao tai mwaninga n tataro ibukin Erik,” e reitia Mama. Mama e kauringiia n tainako bwa a na tataro ibukin Erik.
Erik bon tarin Kari ae ikawai riki nakoina. Imwain nakona nakon te Iuniwetiri, ngaia ma Kari a rang iraorao. E rang uringii bwaai aika kaunga ake a tataneiai ni karaoi ngkana a ikotaki .
Ngkanne tabeua namwakaina n nako, Erik e tuanga Mama ao Baba bwa e aki tangiria ni kan riki bwa kain te Ekaretia. Kari ma ana utu a rang mimi man nanokaawaki. Ikanne ao a tataro ibukin Erik ni katoa tairiki. N tabetai a tataro bwa e na namakina te Tamnei ae e Raoiroi ao n tangiria ni kan okira te Ekaretia. Baba e tataro bwa e na kaitiakaki ana iango Erik bwa e na karaoi rinerine aika raraoi. Mama n tabetai e tataro bwa temanna ae e onimakinna e kona ni buokia ni karekea te kawai ae eti. Imwiin aia tataro ni kabane, Kari e a moanna n un. E aera Tamara are i Karawa ngkai e tuai man kaoka Erik nakon te ekaretia?
N tokina, ngke e a kaurea wiina Liv bwa e na tataro, Kari e aki kona n taua. “Bukin tera ngkai e tuai man kaeka ara tataro Tamara arei Karawa? e a bon taetae naba. A bane n taraa Kari ma te kubanako, ma e bon rang un n te aro are e aki ataia. Inanon teuana te miniti akea ae karongoa.
“Kari,” e taku Baba, “Ngkana ko roko ni mweengam imwiin te reirei n te bong aei, ko kawakina am baekibaeki?
“Aa?” Kari e titiraki, n aki ataia bwa tera ana kaeka. Tera rekereken ana baekibaeki ma aei? E taraa moan te mataroa ao e noora ana baeki are e karenakoaki nakon te oo n aki katineaki irarikin ana baeki “I aki … kabwara te bure.”
“E aki kauringngko Mama bwa ko na katinea?”
“Eng,” e kaeka Kari. E baraaki n tarai bubuan waena.
“E aki kakauringko Mama bwa ko na katinea am baekibaeki?”
“Eng,” e meremere Kari. E tuai naba n ataia bwa tera rekereken aei. E aki rang tabe ma ana titiraki Baba?
“I ataia bwa ngkana ti tataro ibukin Erik, Tamara are i Karawa e bon kaekai ara tataro—ni katoatai. Te kanganga bwa Erik e na kona n aki kakauongo n te tai aei. Erik e na rineia ngkana e kakauongo nakon te Tamnei ae Raoiroi, n ai arom ngkana ko kakauongo nakon Mama ibukin am baekibaeki. N am iango ko kona n tainako n aki ongo ngkana e tuangko Mama bwa kona katinea ana baekibaeki?”
“I aki, tao I aki,” e taku Kari.
“N te tai teuana ao e na ongo!” E taku Mama, ni kakeea matana nakon Kari. E matangare Kari.
“Nanona n te tai teuana Erik e na ongo naba,” e reitia Kari.
“Eng,” e taku Mama. “Te kakauongo nakon te Tamnei ae e Raoiroi bon te konabwai ae ko na riai ni karikirakea. Tao Erik e tuai n reke irouna te konabwai anne.” E a tabe Kari n rau riki nanona.
A bane ni kabobaraaki atuia ngkai e tataro Liv. E tataro bwa Erik e na reiakinna n ongora nakon te Tamnei ae e Raoiroi. Ngke e tataro Liv, Kari e namakina te rau ao te tangiraki. E ataia bwa Tamana are i Karawa bwa e ongo n aia tataro. Ngkai Liv e wareki bwaai tabeua n aro ake a tia ni kakabwaiaaki iai aia utu, Kari e iangoa te kakabwaia teuana ni karinna—bwa e a mataata riki ngkai n te tataro!
Ngke e a moti te tataro, Kari e ataia bwa Tamana are i Karawa e aki mwaninga taekan Erik. E a ataia naba bwa E bon aki kona ni mwaninga taekana.