Kairiiri n ana Kawai te Tia Kamaiu
Iangoan NakoraoinAra TITIRAKI ni Marooro
Te titiraki ae moan te boongana e na riki bwa teuana ae a na titirakiniia taan reirei imwain nakoia nakon te kiraati.
Kamataata n te tamnei iroun Augusto Zambonato
Iangoia bwa ko tekateka n amwarake ni katawanou ma tabeman raoraom ni maroroakina te tamnei ae kam uaia n tia n noria. Ngkanne temanna raraomi e taku, “Antai ae kona n tuangai tera te kabanea ni boongana ni mwakoron te tamnei?”
Teutana te mangao n te titiraki, ko iango teutana ao ni katautaua bwa kabanean mwakoron te tamnei tao bon te kabanea ni bongana. “Eng, bon anne te kaeka ae tamaroa,” e taku raoraom. “Ma tiaki raoi are n au iango. Iai riki? Ti a ongora mairoun temanna ae tuai anga ana iango.”
Ko riai n aki marooro n te kawai aei imarenaia raao, ma bukina tabeua e taraa n ririki n taainako n taian kiraati n te Taabati. Ti kantaningaia bwa a na namakinna kaain te kiraati bwa a mena ibuakoia raaraoia, bwa a na mwengaraoi n tibwaa aia iango ni kaineti ma te reirei are a reiakinna. Te tibwatibwa anne e kona ni karokoa te Tamnei ao ni karakaa te atatai ibukiia n tatabemaniia.
Ti na kanga ni kakoaua bwa ara titiraki a kairiri nakon ae kantaningaaki ao te maroro ni koaua? Iai karinanin tabeua bwaai aika ti riiai ni karaoi ao bwaai aika ti riai n aki karaoi aika a kunei taan reirei aika mwaiti bwa a ibuobuoki. Tai anga titiraki aika bebete kaekaia. Aanga te titiraki are raka iaon teuana kaekaana Tai anga titiraki aika a kaineti nakon te aomata.
E na bon boongana, imwain ae ti moana iangoan titiraki, n titirakiniira te titiraki: Tera raoi bukina ngkai I tabeki titiraki?
Bukintera Ngkai Ko Titiraki?
Bukina irarikin ara titiraki e karika te kaokoro ae korakora. Te katooto, n taai tabetai ti titiraki bukina bwa iai te bwai ae ti kan atongnga ma ti tangiriia kaain te kiraati n atongnga ibukira? E riai bwa ti na aki tangiria ni karaoa te taetae ni kabane, ma ti tangira te oi ni iango teuana bwa e na karaoaki, ngaia are ti titiraki n tabetai bwa ti ataia bwa e na kaota te kaeka are ti kan ongo. Te katei aei e kairiko nakon titiraki aika bon tenaan rongorongo aika a karabaaki, n aron “E na kangaa ni kaitiaka ami iango kararoakin tamnei n tangako?” ke “e bongana bwa ti na tataro ni katoa bong?”
Iai taian waaki are e kororaoi iai riain taian titiraki are nanonaki ni kaotinakoa te kaeka ni koaua. A kona n ibuobuoki ni kaoota te oi ke ni buoka te tia reirei ni kanakoraoa te reirei. Ma titiraki n aekan aikai a aki taraa ni kaumaka te maroro ae riai.
E ngae n anne, ngkana ti titiraki bukina bwa ti kan ataa aia iango kaain te kiraati n nanoia ao ni maiuia, ngkanne e na kaotaki n te titiraki are ti titirakiniia.
Titiraki are kairia membwa n te kiraati nakon te marooro n aia namakin inanoia are kaunga reiakinan aron te tamnei n airi ma titiraki n aekan “Ngkai kam wareka te kibu aio, tera ae taraa ni kakawaki nakoimi?” ke “Baikara namakin aika tia n reireiniko bwa ko na kakoauai ana berita te Uea?” ke n aekan titiraki nako are moanaki ma “Tera ami iango… ?”
Iangoi katoto aikai:
-
Te Tamnei e titirakina Nibwaai,Teraa ae ko tangiria? (1 Nibwaai 11:10).
-
E titiraki te Tia Kamaiu nakoia Ana reirei “Ao ngkami kam taku ba antai Ngai?” (Mataio 16:15).
-
Ao E taku nakon Mareta, “Boni Ngai te manga-uti, ao te maiu: … Ko ira nanon aei?” (Ioane 11:25, 26).
Titiraki ni kabane aikai kaoa temanna bwa e na tibwaua are e mena inanona. Ao ni katoa te keiti, tera imwina bon namakinan te tamnei ae mwakaroiroi.
Titiraki Bon Kaotan te Tangira
Ko kakoaua ke ko aki, tabekan titiraki ake a kaunga te maroroo e bon kuri n roroko n arona nakoira-—ao riki nakoia aomata ake a iangoia bwa tiaki taan reirei aika raraoi. Ti bon karaoia n aki kaantaninga n tainako ngkana ti maroroakina te bwai ae boongana ma raraora ke ara utu. Ngkana ti tei i moaia kaain te kiraati, ti a rina naba ni mwaninga te bwai are bon roroko.
Tao mwakoron te bwai ae kakawaki n tabeki titiraki ni marooro aika tamaroa are ti iangoia iroura, “N na kanga n titiraki n te bwai aei ngkana ti aki mena n te tabo n reirei—ngkana ti tekateka ni mwengara ni maroroakina te euangkerio ma raoraora? N na kanga n kaoia bwa a na tibwa aron aia atatai ao aia namakin?” Te reirei bon tiaki raoi te maroro ae aki baireaki ibuakoia raoraora, ma iai teuana te bwai ae a karekea iai te taneiai: a riai ni kamarurungaki man te bwai ae a tangiria ao te tangira ni koaua.
Ma ngaia are tai raraoma ngkana ko aki atatai ni karaoan taekan taian titiraki. E bon ngae ngkana kam kona n tangiriia aomata ake kam reireiniia, E na kairiko te Tamnei, ao e na rikirake n raoiroi ao n raoiroi ataakin bwaai ake ko na taekinna. “E bon aki bwaka te tangira,” E taekinna Bauro (1 I-Korinto 13:8), ao anne te koaua ao n aron ae bebete ngkana te tia reirei e titiraki inanon tain te kiraati.