Ana Tataro te Tia Kairiiri ni Kurubu n Tikauti irouia Mwaane

Tamnei

Scoutmaster praying

Kamataata n te tamnei iroun Allen Garns

Ngai bon te Te Tia Kairiiri irouia kurubu n Tikauti mwaane ao I kairiia 20 ataeinimwaane ao uoman taan kairiiri n te mwananga n te waaki ni kakukurei i Utah maiaki, USA.

Ngke e roko ara kaa n te kawai are e na uotiira nakon te tabo ni kaembwa, I tei ao n tarataraa te rereua ae mena imoau. I a tia ni karaoa te mwananga aei n taai aika mwaiti, ma ibukina tabeua, I aki kona n noora te bwai ae I ataia. I karaurau n taraa te tabo are I kona n noria, n taraa te bwai ae I a tia n nonoria.

I aki tabe bwa iraua te kawai ae I a tia n toui, boni kawai aika akea te otinako iai.

E moanna n roo. N tokina, I tei ao n tuangiia aomata ni kabane bwa ana tiku inanon te kaa. I anaa te tooti ao n tuangiia bwa n na kakaea te kawai n nakonako ao n anga te kanikina nakoia n te tai are I kunea te kawai.

Tera raoi te bwai ae I karaoia I katorobubua ao ni butiia te Tama are i Karawa bwa e na buokiira ni kaotinakoira man te kaangaanga ae kakamaaku aei. I tataro ma nanou nako Ina, n tuangnga tauraoi, au tangira ibukiia Tikauti n ataeinimwaane ake e kairiia, au kakaitau ibukiia tamaia Tikauti mwaane ake a roko ma ngaira, ao au onimaki ae koaua bwa E na kaekaa au tataro n te tai ae waekoa. I kabanea au tatari ao n teirake. I kantaningaia n teirake iaon bubuan waeu, kotea te rootongitong n otan au tooti, ao n noora te ota ni waekoa ni kaota te kawai ni koaua.

Ma akea te bwai ae riki.

I karaurau n taraa tokin otan are e kona otan au tooti.

I aki kona n noora te kawai ni koaua.

I aki kona ni kakoaua. I ataia bwa n te tai are I teirake, n na noora te kawai. I ataia bwa e aki kona te Uea ni uotai rikaaki, riki ma aomata aika mwaiti aika onimakinai.

I riai ngkai n oki ao n taetae ma uoman kaaro aika a un ao e onrake aia waen ma te mangaongao, ataeinimwaane aika a ingainga (ni kan roko), ngaia ni kabane a titiraki, “Ti a roko ikekei?”

I kabwarabure ao ni kakoaua nakoia ae I a tia ni karaoa te mwananga aei 20 te tai inanon maiu ao I ataia bwa e mena ikekei te kawai. I aki kona n noria.

N tokina, ti iangoia bwa ti na buti nakon te taun ao ni kabooi uoua te ruu n te moutero. Ti na oki ma te korakora ae kabouaki n ni moaningabongin te Kaonobong.

Ngkai ti aki kona ni karaoi aai ni kukan karara ni kaembwa n te tairiki aika ti uoti, ti nakon te tabo ni pizza n te tabo anne are ti noria n tokin te taun.

E kangkang te pizza ao a kukurei ataeinimwaane, ma I teimatoa n raraoma ibukin te tarau are ti na kabwaka ibukin te amwarake ao ruun te mouteero.

Ngke ti tabe n amwarake, I mimii bwa bukin tera e tuai kaeka au tataro Tamau are i Karawa, ngke n te tai ae waekoa I ongo te bwai ae rebwetaua.

I waerake, ni waekoa ni kauka mataroan te tabo ni pizza, ao n noora te kabanea ni korakora ni bwakan te karau ae I tuai nonoria mai imwaina. Iai kian te oota nako meanmaeao—nakon raoi te tabo are I a tia n tataro iai ibukin te kaeka e aki koro te aoa imwaina. N te tai anne, e roko iaou te Tamnei, ao I namakinna ae e a tia te Uea ni kaekaa au tataro!

Te moaningabong are imwiina, karawa e buruu, ao ngke ti oki nakon kamangaongaon kawai aika barekareka, I buti ni kaitaraa te tabo n rairaki are I a tia n ukoukoria ibukin te tairiki are imwaina. I a ataia ngkai bwa a kaekaaki tataro n tabetai ma te kaeka ae akea, ma a bane n tainako ni kaekaaki.