Nimaua Titiraki Ngkana Ko Namakinna bwa Aki Kaekaki Taian Tataro
E maeka te tia korokaraki i New York, USA.
Ko a tia n tataro ao n taninga kaekakina are e taraa n aki roroko? Ko aki maroa—ma ko kona ni kakoaua bwaa Tamara are i Karawa e bon ongo am tataro. E kakaawaki bwa ko na uringnga bwa kaeka a kona n aki roko nningai ke ni kanga n aron are ko tangiria bwa a na roko iai bwa Tamara are i Karawa e atatai riki.
Aikai tabeua titiraki ake ko kona n titirakiniko ngkana ko rang korakai n aki kaekaki am tataro:
1 I a tauraoi ni mwakuri iaon te kaeka?
Te tataro inanon te onimaki e nanonaki bwa ko na tauraoi ni mwakuri iaon te kaeka are ko karekea—ngkana ngaia ke tiaki te kaeka are ko kantaningaia. Te Burabeti Iotebwa Timiti e karekei n te taina kaetieti aikai: Katauraoa nanom ni butimwaea ao n iri kaetieti ake N na tauraoi n anganiko; bwa ni kabane ake e kaotaki nakoia te tua aei a riai naba ni karaoia. (taraa D&C 132:3). Ngkana ko tataro bwa ko na ira te bootaki ke ko na aki, ko na ongotaeka ngkana e angaraoi ke e aki (riki ngkana te kaeka bwa ko na aki)?
2 I a tia ni karaoi bwaai ni kabane ni korakorau?
Tao ti na kangai bwa ko aki kamatebwaia te Tiaeienti bwa ko kabanea am tai ma raraom. E na kona ni buokiko Tamam are i Karawa bwa ko na bwaati n te ukeuke ngkana ko tii butiia ibukin Ana ibuobuoki?
Ti riai ni karaoi tibwangara ni karekei kakabwaia. Ngaia are n te kamatebwai ibukin te ukeuke, ko kona n tataro ibukin te korakora bwa e na nakoraoi am bwi imwiin am katauraoi.
Iangoa te banna ni katoto irouia natin Motiaea, ake a tokanikai n aia mwakuri ni mitinare ngke a kakorakoraia riki ni mwakuri: “a bon tia naba ni kakorakoraia n tataro, ma n aki mamatam; ngaia ae iai irouia te tamnei n taetae ni burabetti, ao te tamnei ni kaotioti, ao ngkana anga reirei, a reirei ma mwaakan ao ana kariaia te Atua.” (Aramwa 17:3).
3 I a tia n aki kakauongo nakon te kaeka?
Tamara are i Karawa e ongo n tainako, ngaia are,e kona ni kaman tia ni kaeka am tataro! N aron are e taekinaki n taraa Doctrine ao Covenants 6:14, Ni katoa tai are ko bubuti iai ko na karekea te kaetieti iroun Tamneiu. Ko kona n tataro ibukin te taratara n tamnei ni kinaa te kaeka, ibukina bwa taian tataro n tabetai a kaekaaki n aro aika ko aki atai ke are ko aki kantaningaia—n aron rinanon aia mwakuri tabeman.
Ao riki, tai mwaninga n anaa tabeua te tai ni kakauongo. Unimwaane Richard G. Scott (1928–2015) man te Kooram n Abotoro n te Tengaun ma Uoman e kabwarabwara: “Ana kaeka [Tamara are i Karawa] e burenibwai n roko ngkai ko katorobubua n tataro. … Ma, E na wirikiriniko n te tai ae rau ngkana te Tamnei e a kona n ni mwakuri raoi n am iango ao i nanom” (“Kabonganaan te Bwaintangira mai Karawa n te Tataro,” Riaona, Meei 2007, 9).
4 A raraoi bwaai aika I tangirii?
Ngkana ko bubuti ibukin te bwai teuana ae ko aki rang n tangiria, kanga taraan ae aki butimwaeaki am bubuti. Te Tia Kamaiu e reirei bwa ti na aki toki n tataro nakon te Tamara n aran [Iesu Kristo]” (3 Nibwaai 18:19), are e taekinna bwa ti riai ni bubuti ibukin bwaai aika raraoi bwa aonga n reke. Titirakiniko i bon iroum, “E kanga ana namakin te Tia Kamaiu ni bwaai aika I tangirii?” Ngkana bwaai aika ko tangirii a boboto iaon aika ko tauaninne iai ke tao bwaai aika aki raraoi, tataro bwa ko na karekea te bitaki n nano ao n atai bwaai ake e tangiria te Tia Kamaiu bwa kona tangirii.
5 E angaraoi ma te tai?
Te bwai are ti bubuti ibukina e riai n eti, ma te tai are e na reke iai e na riai n angaraoi ma te tai. Tamara are i Karawa iai ana baire ae korakora are e kawakinna ibukira, ma ara tai n tabetai e kaokoro ma Ana tai. “Au taeka a koaua ao a aki kona ni bwaka. … Ma bwaai ni kabane a roko n aia tai (taraa D&C 64:31–32). E kona n nanonaki bwa ko na tataninga teutana riki te tai ibukin kamaoan te maneka anne ke kunean te man ae bua, ao n tabetai ana tai te Uea e raonaki ma te maiu are e na roko—ma ko na kakoaua bwa E kona n ongo ao ni buokiko iaon kawaim.
E kona ni kaangaanga te tataonakinnano, riki ngkana kaekaan am tataro e aki rang mataata. Ma ngkai ko ukeuke, ko kona n ninikora n ataia bwa n tainako ko na karekea te kaeka are ko kainnanoia ngkana ko ukeuke man nanom ni kabane: “Ao ane kam na ukoukorai, ao N na bon reke iroumi, ngkana kam bon ukoukorai n nanomi ni kabane” (Ieremia 29:13).