Bitakin Au Moanibwai

E aki maan imwiin are I moana karaoan au webutiaite, I kunea bwa I kabanea au tai ae mwaawa ni katabwanina rongorongona ao n iangoia bwa e na kanga ni kakaongora ke n anai nano. I kabanea angiin au tai ni wareki aia webutiaite tabeman naba.

Inanon tabeua te wiiki, karinakin rongorongo aika boou n au webutiate ao warekan aia webutiate tabeman e a tia n ana au tai ae kakawaki ni kamatebwaiakan booki aika tabu ao wareware tabeua. I aki kona n iango raoi ngkana i kamatebwai, I aki tangiria ni wareware n ae bati, ao I namakina te kerikaaki n Tamneiu inanon maiu. E keerikaaki au tai ma natiu, ao te tai are n na riai ni kabanea ma ngaia, I kabanea iaon te kaombiuta.

Te mamataku anne tiaki te bwai ae aki riai, bon te kawai ae tamaroa ni kateimatoa te reitaki iai ma am utu ao raoraom. Ma n te tai are I namakinna bwa e a bua au iango man bwaai ake a na anganai te maiu n tamnei ae korakora, I ataia ae I tangiria ni bita te bwai teuana.

I moanna man kakouaana I rou ae I aki kainnanoia ni mamataku iaon te intanete ni katoa bong ao I aki kainnanoia n tuoi aia webutiate aomata riki tabeman. I iangoia bwa I kona n teimatoa ni kabanea au tai ae mwaawa n te kaombiuta ma ti imwiin ae I a tia ni karaoa au kamatebwai n au boki ae tabu ao wareware riki tabeua. Man te tai are I a tia ni karaoi bwaai aika moan te kakawaki, e bon aki tau naba te tai ni mamataku, ma e bon raoiroi anne. I a tia n taekinna n te tai ae mwaiti—te tai ae I kabanea ngkai n tabeakiniia ao n takakaro ma au ataei, wareware, ao ni kamatebwai.

Imwiin tabeua te bong ni bitii au moanibwai, I kunea bwa I a namakina te Tamnei n ae bati riki inanon maiu.

I ataia bwa ngke I moanibwaia karaoan are N na kabwaia iai n te itera n tamnei, N na namakina te Tamnei ae bati riki ni katoa bong. I ataia bwa karaoan te tai ibukin te kamatebwai ni booki aika tabu, warekan ana maekatiin te Ekaretia ao karaki tabeua aika raraoi, ao n iangoi bwaai aika riki n akea tokina e kona ni buokai n riki bwa te kainnaba ae tamaroa riki, te tina ae tamaroa riki, ao kaain te Ekaretia ae tamaroa riki.