Aron Tibwaan te Euangkerio

Tamnei

Sharing the gospel

Ti aki kainanoa te kabwara bure ibukin ara koaua ke ni kerikaaki man are ti ataia bwa e koaua. Ma ti kona n tibwauaia n te katei n ataibwai ae tangira—ma te aki maaku ao ma te onimaki, ma te mata ti teuana nakon mimitongin te Atua—n aki kairoroia ara taan ongora ke n namakinna bwa ti a tia ni kabwaka n tabera ngkana a aki waekoa ni butimwaea are ti kakoaua.

Ngkana e mena iroura ana iraorao te Tamnei are Raoiroi, ti kona ngkanne ni karaoi bwaai aika bebete ni buoka karokoan te ataibwai ae koaua riki n te euangkerio nakon maiuia kain te aro aika a aki kakaonimaki n te Ekaretia ao ai uana naba ma aika tiaki kaain ara onimaki. Akea kainanoan te borokuraem ae boou ni karaoan aio. Ti aki kainanoa te aeniboki ke te weteaki ke te botaki ni kataneiai. Tii te bwai ae kainanoaki ibukiia kaain te Ekaretia aika raraoi bwa a na mwioko ni mwaakan te Tamnei are Raoiroi ao, n te mwaaka aio, e na nako n riing maiuia Natin Tamara. Akea te mwakuri n ibuobuoki ae korakora riki nakon tibwaakin ara koaua ma ake e karako aia ataibwai n ana euangkerio Iesu Kristo ae kaokaki.

Ngaia ae, tariu ao mwaneu, ti a tauraoi ni karaoa te bwai teuana? Ti kona ngaira n te bong aei n karikirakea ara katauraoi n tamnei man ukoukoran ana kairi te Tamnei are Raoiroi ao ngkanne, ni Mwaakana ngkai e mena iroura, e na kakabwaiaia riki Natin Tamara n te ota ao te ataibwai bwa e koaua te Ekaretia?

I kakoaua bwa e maiu te Tia Kamaiu ao E na kakabwaiaira n tatabemaniira nako ngkana ti kan karaoa are ti kona ni kabuta mwakurin Ana Ekaretia ae kakawaki ni waakinako. Ti na baireia ngaira n tatabeman bwa ti na karakaa riki ae ti karaoia.