O Auala e 3 e Avea Ai ma se Faatama

Ata

father and sons

O nisi o alii o le a i ai le avanoa e avea ai ma se tama, ae o isi atonu e le maua le aafiaga o le tulaga faatama seia maea le Toetu. Po o le a lava lou tulaga e i ai, o auala nei e tolu e mafai ona e avea ai ma se faatama mamana ia i latou o siomia oe:

1. Faalautele lou Valaauga

   Pe o oe o se tasi o le au epikopo po o se faiaoga o le vasega pepe, o lou valaauga e tuuina atu ai ia te oe le tele o avanoa e aapa atu ai ma le maelega ma le naunautai ia i latou o siomia oe o e o loo manaomia le taitaiga ma le alofa. O se faufautua a le korama o le au tiakono e mafai ona faamalosiau i alii talavou o e o loo tauivi ma faafitauli faaleagaga pe faaletino. O se faiaoga o aiga e mafai ona faatamaoaigaina olaga o le aiga na te asia. A o e faalauteleina lou valaauga, o le a e maua ni avanoa se tele atu e iloa atoatoa ai le mana o le perisitua a le Atua ma faamanuia ai olaga o siomia oe (tagai MF&F 84:32–33).

2. Aapa Atu

   Ia faamasani i taleni ma mea e fiafia i ai le autalavou o loo outou fegalegaleai. Tusi atu ni imeli ma ni tusi i faifeautalai. Atinae ni mafutaga ma nai ou tei, fanau teine ma fanau tama a nai ou tei, tausoga, ma isi tagata o le aiga. Atonu e le vave oo mai se avanoa e avea ai ma se faatama, ae ao e atinaeina ni mafutaga ma faapitoa ona nofouta ia i latou o e atonu o loo tauivi, e mafai ona e i ai i se tulaga e fesoasoani ai i se tagata talavou e fai ni faaiuga taua o le olaga.

3. Faaali Atu le Alofa Moni

   O nisi o alii ma tamaitai talavou o tou fegalegaleai atonu e i ai ni faafitauli i a latou amioga po o ni aga masani le lelei lea e mafai ona oso ai le le fiafia. E mafai foi ona faaosoosoina i nisi o taimi e aoai pe faatulaga ni tuaoi mo na tagata talavou po o tamaiti. E ui atonu e talafeagai lenei mea i nisi o tulaga, ae atonu e le o le auala aupito aoga lea e faasa’o ai i latou, ae maise lava pe afai e le o sa oe lava fanau. Taumafai e mulimuli i le faataitaiga a lo tatou Tama Faalelagi, o le e “alofa mutimutivale, ma le alofa fua, o le telegese lona toasa, a e tele le alofa ma le faamaoni” (Salamo 86:15).