Ua Iinei? Le EKALESIA?
Jon Evans, Kalefonia, ISA
Ata na tusia e Allen Garns
Na ou auai i le Ekalesia i le 36 o ou tausaga, ma na i ai taimi sa ou lagonaina ai le malosi faaleagaga. O isi taimi sa ou faia ai mea e aunoa ma le mafaufau i ai. I le va o se taimi faigaluega pisi, amataina e lou toalua o se matata fou, faaletonu o le soifua maloloina, ma isi luitau, sa amata ona ou tauivi faaleagaga. Sa ou auai i le lotu ma fesoasoani e aoao le korama a le au tiakono, ae na’o le pau na o mea na mafai ona ou faia. Sa ou le maua le malosi e suesue ai au tusitusiga paia pe tootuli e tatalo.
Sa ou tauivi pea i le taimi na ou alu ai i se malaga faapisinisi i Chile i matu. Mai le malaevaalele i Copiapó, e lua itula sa ma tietie atu ai i le nofoaga mo le galuega e faapipii ai le sola i le Toafa o Atacama i Chile. Sa ou te’i i le maotua o lenei itu, e na’o le toafa lanumumu i le fia ma le fia o maila. O le tuuatoatasi o le laufanua sa ou maofa ai.
Ina ua mavae le tusa o se vaiaso talu ona ou i ai i le nofoaga, sa matou tietie atu ai i le taulaga aupito latalata [e faatau ai] ni sapalai. O iina sa ou vaaia ai se fale na tosina i ai la’u vaai. Sa ou fai atu i le avetaavale e afe i tua. O le fale sa matagofie ona laufanua lea sa si’o i se pa uaea uliuli. I le pito i luma o le fale, sa i ai se faailoga masani, “La Iglesia de Jesucristo de los Santos de los Últimos Días” po o le “O Le Ekalesia a Iesu Keriso o le Au Paia o Aso e Gata Ai.”
“Ua iinei le Ekalesia?” Sa ou mafaufau ai. Sa ou maofa i le oo mai o le Ekalesia i lenei vaega mamao o le lalolagi. Sa ou pueina se ata o le falelotu ma tesi atu i lo’u toalua. O lana tali sa i ai se aafiaga o’oo’o ia te a’u: “O loo silafia e le Tama Faalelagi Ona tagata i soo se mea.”
O se savali tuusao lenei mo a’u mai lo’u Tama Faalelagi. I le faigata o le ola ai i lea aso i lea aso, na galo ai ia te au, ma sa manaomia ona faamanatu mai, e alofa le Tama Faalelagi i Ana fanau uma. E alofa o Ia i na Au Paia i lena taulaga laitiiti ma le mamao i le ogatotonu o le toafa, ma e alofa foi o Ia ia te a’u.
O lena po sa ou tootuli ai ma faafetai atu i le Tama Faalelagi mo faamanuiaga sa Ia tuuina mai ia te au i lena aso. O le iloaina e alofa o Ia ia te a’u ua fesoasoani ou te toe atinae ai lo’u faaleagaga, ma faaauau ai ona faamalosia a’u i aso taitasi.