Faamanuiaina mo le Folafolaina Atu o La’u Tapuaiga
Kristin McElderry, Masatusa, ISA
ATA NA TUSIA E Eva Vazquez
Sa ou papatiso ina ua 19 ou tausaga. O le toatele o lo’u aiga ma uo e lei taliaina la’u filifiliga e auai i le Ekalesia, ae e lei taofia ai a’u e lena mea. O le lua vaiaso mulimuli ane, sa ou amata ai i lo’u tausaga lona lua i le kolisi. Ina ua ou toe foi i le lotoa, sa ou lagona le atuatuvale e uiga i la’u tapuaiga fou.
Sa amata ona ou popole atonu o le a ou le maua le lototele e tu atu ai mo la’u lotu. Sa ou lagona le tuuatoatasi. Ou te lei feiloai lava i se tagata o le Ekalesia i le kolisi, ma ou te leiloa po o fea e maua ai se falelotu, pe e i ai foi se uarota po o se paranesi e lata ane. Sa ou tatalo i le Tama Faalelagi mo le lototele. Sa ou tatalo ina ia ou maua le lototele e tu atu ai mo o’u talitonuga fou.
O ni nai aso mulimuli ane, sa ou fesoasoani ai i nisi o tagata e me’i i totonu [o o latou fale]. Sa ou feiloai i se alii talavou e igoa ia Brian ma sa amata ona ma faauo. Sa ma savalivali i le lotoa i se tasi aso ae ia fesili mai ia te a’u po o a ni a’u fuafuaga mo le Aso Sa. Sa ou tau atu ia te ia ou te alu i le lotu.
“Oi, o le a le lotu e te alu i ai?” na ia fesili mai ai.
E ui i le lagona popole sa i lo’u manava, sa ou tu sa’o i luga ma fai atu, “ou te alu i Le Ekalesia a Iesu Keriso o le Au Paia o Aso e Gata Ai.”
Sa ou mitamita ia te a’u lava. Sa ou popole foi pe o le a faapefea ona tali mai Brian. I le taimi lava lena, sa ou vaai atu ai i faifeautalai. A’o lei fai mai se tala a Brian, sa ou tau atu ia te ia ou te toe foi mai. Sa ou tamoe atu i faifeautalai. Sa la fiafia e feiloai ia te a’u ma tuu mai ia te a’u faamatalaga uma na ou manaomia e alu ai i le lotu i le aso e sosoo ai.
Sa ou toe foi ia Brian ma faamatala i ai le mea na tupu. Sa ou faasoa atu foi ia te ia sina mea itiiti e uiga i le Ekalesia, ma sa faaauau pea le ma savaliga e aunoa ma sina eseesega, pau le mea ua i ai nei ua fai sina malosi o a’u laa. Sa ou lagonaina foi le mafanafana ma le filemu lea e nao le Agaga e mafai ona aumaia. Sa ou popole lava e uiga i le tuuatoatasi ma leiloa po o fea e alu i ai i le lotu. Ae ou te talitonu o le taunuu mai o na faifeautalai i lena lava nofoaga i lena taimi o se auala lea a le Tama Faalelagi e faamanuiaina ai a’u mo le folafolaina atu o la’u tapuaiga.
Ua silia ma le 10 tausaga ua mavae atu, ma e talu mai lena aso ou te lei fefe lava e tau atu, “O a’u o se tagata o Le Ekalesia a Iesu Keriso o le Au Paia o Aso e Gata Ai!”