O le Faasilasilaga Na Suia ai Mea Uma

E manino lou manatuaina ina ua faasilasila mai e le Perofeta ua suia ia tausaga o le matutua o faifeautalai tamaitai, sa 16 o’u tausaga ma o la sa ou asiasi ma lo’u aiga i se tasi uarota. Ina ua matou faalogo i le faasilasilaga, sa savali ese mai lo’u tina mai le sauniga faamanatuga ina ia mafai ona ma sailia i le initoneti le faasilasilaga aloaia. Sa faateia au aua sa ou manatu muamua ua mamao tele le 21 tausaga ma o le taimi lea ua ou punouai ai i le iunivesite ma faia foi tafaoga faamasani faananau, ma o lea o se mea mulimuli lava i lo’u mafaufau se misiona. Ae ina ua ou faalogo o le 19 o le tausaga fou lea mo tamaitai, sa ou iloaina o le a ou alu e faamisiona. O lea faasilasilaga na suia ai mea uma mo au. Sa faafuasei na tatala mai se ala fou atoa.

O le isi tolu tausaga sa ou sauniuni ai e fai se misiona. Ina ua maea le seminare, sa faigaluega e teu se tupe, ma suesue i le Iunivesite e amatalia ni mausa lelei ma faigaluega ia ou le pisia ai mai le lalolagi. Ua uma misiona a lo’u tama ma o’u tuagane matutua e toatolu ma o lea sa ou tau lagonaina ai sina uunaiga ma sa ou manao ia ou mautinoa o le a ou alu e auauna atu i le Alii ae le o le faamalieina o lo’u aiga. I se tasi po a o ou faitauina le Tusi a Mamona ma mafaufau loloto i la’u faaiuga e auauna atu sa ou maua se faaaliga—2 Nifae 16:8:

“Sa ou faalogo foi i le siufofoga o le Alii, ua fetalai mai: O ai ea Ou te auina atu, ma o ai e alu mo i tatou? Ona ou fai atu lea: O a’u lenei; auina atu a’u.” Na fetalai tuusao mai lava lenei mau ia te au e faapei o loo fesili mai le Alii ia te au: o ai e alu mo i tatou? Ma ua mafai nei, ona ou tali atu, ma le loto atoa: O au lenei: auina atu au. Ma sa Ia auina atu au i le Misiona a Fiti i Suva mo le 18 masina e galue ai faatasi ma tagata matagofie iina ma uo mo le olaga atoa, faatasi ai ma uso o le a fesoasoani ia te au i lenei taimi atoa.

Sa ou ola ae i le ekalesia ma maua ai le aia tatau i molimau. Ou te iloa e moni le ekalesia ma o upu nei sa ou tusia, i ni auala eseese, i aso uma i la’u api talaaga. O aso taitasi o le faaupuga “e moni le ekalesia” e eseese lava e tusa ma auga ma aafiaga sa ou maua i le aso. Sa faamausali ai se upumoni faavae, sa pele ia te au i lo’u olaga atoa. O se faaupuga faigofie: E moni le ekalesia ae sa ia umia le tele naua o le malosiaga ma le faaosofia mo au i masina faigata ae ofoofogia e 18 o lo’u olaga.

Ou te manatua le matauina o la’u tagata muamua na liliu mai, o Sala a o ulu ifo i le vai o le papatisoga. Sa faapei na ou mauaina sina tepa itiiti i le alofa o le Tama Faalelagi mo Ana fanau. Sa ou tusia i la’u api talaaga i lena po:

Aso Toonai 2 Aperila, 2016: “Ua ou matua lailoa lava faalelagona, faaleagaga, ma le faaletino i le asō. O se tasi o afafine faapitoa o le Tama Faalelagi ua laasia se sitepu se tasi e latalata atili atu ai ia te Ia, ma e toe fai atu foi e moni lava le Ekalesia.”

Sa fesoasoani lenei fasifuaitau ou te manatua ai lo’u faamoemoega:

Aso Faraile 19 Aokuso, 2016: “Ou te iloa o le auauna atu i isi o se mea ou te manao e faia pea i aso uma o totoe o lo’u ola. E matuai moni lava le ekalesia i le aso nei.”

Sa ou toe tusia le fasifuaitau ina ua ou lagonaina le alofa ma le popole mo le soifua manuia o isi.

Aso Gafua 12 Setema, 2016: “Ou te alofa tele i lo’u aiga. A oo ina le toe mananao se aiga e faalogologo i lesona, e matuai tiga ai lava au aua ou te manao ia latou maua se aiga e faavavau e pei o au. O le a lelei mea uma ona o le a moni pea aoaoga a le Ekalesia a taeao.

Sa toe fetaui lelei foi le fasifuaitau i la’u tusiga i la’u api talaaga e uiga i le tuputupu ae ma le faaleleia o le tagata lava ia:

Aso Tofi 15 Tesema, 2016: “O se matuai faamanuiaga lava le aoaoina ma tuputupu ae i aso taitasi. E tusa lava pe oo ina faigata, ou te iloa e mafai ona ou toe tepa i tua ma vaaia ai le suiga o lo’u olaga ma le faamoemoe o le a faapena foi olaga o isi. Ou te le talitonu ua toe 6 o’u masina ia o totoe. E matuai tele naua mea o loo ou manao pea ia ausia ae ou te iloa e leai se isi nofoaga e sili atu ona aoao ai ma tuputupu ae nai lo totonu o le ekalesia moni.”

I taimi o le le mautonu ma le le gafatia, e aumaia pea e lenei fasifuaitau se lagona e sili ona mafanafana:

Aso Lulu 19 Aperila, 2017: “Ou te le iloa pe ua ou soona faafaigataina ea mea mo au lava? Ou te le iloa pe o la’u auaunaga o le mea sili lea ou te mafaia? E foliga mai a le mafai ona ou fesootai atu ma isi. Ua na o lo’u manao lava ia lelei mea ou te faia ma faafiafia ai o Ia. E oo lava pe a ou le lagonaina ua lava so’u lelei—o le a moni pea lava le ekalesia.”

E oo lava i o’u toe vaiaso i le avea ai o se faifeautalai faamisiona, sa aumaia ai e lenei fasifuaitau ua ou fiafia lava i ai le toafilemu ma le mafanafana sa ou manaomia:

Aso Tofi 1 Iuni, 2017: “Ou te le talitonu ua oo mai le iuga o la’u misiona. Ua ou sagisagi atu i le olaga fou o le a ou amataina pe a ou toe foi i le fale. Ua tele naua mea sa ou aoaoina mai lenei aafiaga, ou te alofa i le Alii, ma pe o o’u iinei e auauna atu i se misiona, pe o o’u i ai i le fale—o le a tumau pea lava le moni o le ekalesia.”

O lenei faamatalaga o se tasi o vaega faavae o la’u molimau lea ua ou fiafia lava e tautino atu i aso taitasi ma faamanatu mai ai e moni le ekalesia, o Iesu o le Keriso ma o Lana talalelei toefuataiina lenei. O Peresitene Monson o se perofeta soifua ma e moni le Tusi a Mamona.

E Moni le Ekalesia: o la’u tautinoga lena ma lo’u faamafanafanaga ma ua uunaia ai pea au. E faaauau pea ona avea ma a’u tautinoga ma o’u faamafanafanaga ma o le a uunaia ai pea au i aso o i luma.

O Claudia Mitchell e mai Aukilani, Niu Sila ma sa galue i le misiona a Fiti Suva mai ia Tesema 2015 e oo atu ia Iuni 2017. O loo i ai nei o ia i le uarota a le YSA i Takapuna.