Faaaliga mo o Tatou Taimi
Manatuaga mai perofeta ma aposetolo e uiga i le faaaliga o le 1978.
O tiakono i Manaus, Pasila, o tufaina le faamanatuga. Ona o le faaaliga o le 1978, ua mafai ai nei e i latou o e umia le perisitua o soo se ituaiga ona faatautaia sauniga o le perisitua.
O Le Sailiga
Peresitene Spencer W. Kimball (1895–1985)
Peresitene lona 12 o le Ekalesia
“Mai lea aso i lea aso sa ou alu ai toatasi i le faamaoni, ma le naunautai tele i le potu i luga o le malumalu, o iina sa ou tuuina atu ai lo’u agaga ma tuuina atu au taumafaiga e faaalualu ai i luma le polokalama. Sa ou manao e fai le mea sa finagalo i ai [le Atua]. …
Sa matou maua se aafiaga mamalu o le faailoa manino mai lea e le Alii e faapea, ua oo mai le taimi e mafai ai ona avea ai alii ma tamaitai faamaoni uma i soo se mea, ma sulu faatasi ma tofusia i faamanuiaga uma o le talalelei. Ou te manao ia outou silafia, i le avea ai ma se molimau faapitoa o le Faaola, lou lagonaina o le latalata atu ia te Ia ma lo tatou Tama Faalelagi, a o ou faia ni asiasiga se tele i le afeafe aupitoaluga o le malumalu, a o ou alu atu na o au i nisi o aso. Sa matua faamanino mai e le Alii ia te au le mea sa tatau ona fai.”
Aoaoga a Peresitene o le Ekalesia: Spencer W. Kimball (2006), 264, 265.
O Le Tatalo
Peresitene Thomas S. Monson (1927–2018)
Peresitene lona 16 o le Ekalesia
“I le faaiuga o le sauniga ma le Au Peresitene Sili ma le Korama a Aposetolo e Toasefululua, sa faia se matou tatalo faapitoa i le fata faitaulaga [i le malumalu] lea na fofogaina e Peresitene Kimball. Sa ia aioi atu i le Alii mo le malamalama ma le poto e uiga i lenei mataupu lea e i ai ona taunuuga taua. O se puna o le faamafanafanaga tele i le Usoga le faalogo atu i lana aioiga lotomaualalo a o ia sailia le taitaiga i lona valaauga maualuga. …
“Sa faaalia mulimuli ane e le Au Peresitene Sili le lotofaafetai faapea ‘o le agaga o le filemu ma le lotogatasi lea na i ai i le sauniga … o se tulaga aupito maualuga lea ua i ai nai lo se isi lava taimi, ma o se faamaoniga [sa] fiafia le Alii i la tatou talanoaga.’ …
“… O se taimi o le olioli, ona ua tatou faalogo i le perofeta a le Alii o folafola mai le faaaliga mo lenei taimi.”
I le Heidi S. Swinton, To the Rescue: The Biography of Thomas S. Monson (2010), 393.
O Le Faaaliga
Elder Bruce R. McConkie (1915–85)
O le Korama a Aposetolo e Toasefululua
“Na liligi mai e le Alii i lona atamai le Agaga Paia i luga o le Au Peresitene Sili ma le Toasefululua. … Na oo mai le faaaliga i le peresitene o le Ekalesia; na oo mai foi i tagata taitoatasi na auai. E toasefulu tagata o le Aufono a le Toasefululua ma le toatolu o le Au Peresitene Sili na faapotopoto ai iina. O le taunuuga na silafia e Peresitene Kimball, ma sa iloa foi e i matou taitoatasi, tutoatasi mai soo se isi lava tagata, e ala mai i se faaaliga tuusao ma patino ia i matou, faapea ua oo mai le taimi e tuuina atu ai le talalelei ma ona faamanuiaga uma ma ona tiute uma, e aofia ai le perisitua ma faamanuiaga o le maota o le Alii, ia i latou o soo se atunuu, aganuu, ma ituaiga, e aofia ai tagata uli. Sa leai se fesili e uiga i le mea na tupu pe e faatatau i le upu ma le savali lea na oo mai.”
“All Are Alike unto God” (faigalotu a le Iunivesite a Polika Iaga, Aok. 18, 1978), 4, speeches.byu.edu.
O Le Faamautinoaga
Peresitene Gordon B. Hinckley (1910–2008)
Peresitene lona 15 o le Ekalesia
“Sa i ai se siosiomaga faapaiaina ma le faamamaluina i le potu. Mo au, o se lagona e pei o se faitotoa vaapiapi ua matala i le va o le nofoalii faalelagi ma le perofeta a le Atua o loo tootuli, ma augani atu lea na faatasi atu i ai ona Uso. Na i ai iina le Agaga o le Atua. Ma i le mana o le Agaga Paia na oo mai i lena perofeta se faamautinoaga o le mea na matou tatalo ai ua sao, ma ua oo mai le taimi, ma o faamanuiaga ofoofogia o le perisitua ua tatau nei ona faasafuaina atu i alii agavaa uma i soo se mea e tusa lava po o le a le tupuaga.
“O alii uma i lena li’o, e ala i le mana o le Agaga Paia, sa iloaina lea lava mea e tasi. …
“… E leai se tasi o i matou sa i ai i lena taimi, sa tumau ai ni lagona tuai ina ua mavae lena aafiaga. E lei toe tutusa foi le Ekalesia.”
“Priesthood Restoration,” Ensign, Oct. 1988, 70.