“Ou te faatusatusa pea lava pea au i isi, ae maise o i latou o e foliga mai o loo ola atoatoa. E faapefea ona faateleina o’u lagona mautinoa?

E anoanoai au taleni ma meaalofa faaleagaga ua tuuina mai e le Tama Faalelagi mo oe lava ia. E i ai ni auala ua nao oe lava e mafai ona faamanuia ai olaga o isi? O le fuafuaga lenei a le Tama Faalelagi. Tatalo ia iloa po o a meaalofa ua tuuina mai ia te oe, ma afai e te manaomia nisi taitaiga, ia fesili ia i latou e latalata atu ia te oe. O le faalogo i le Agaga ma le taumafai ia iloa ma atinae au taleni ma uiga faalelagi, e mafai ona e maua ai le lagona mautinoa ia te oe lava lea atonu e te lei mauaina muamua.

Soo se taimi lava ou te iloa ai ua ou faatusatusaina au lava i se isi tagata, ou te taumafai ia ou iloa lelei teisi atu lena tagata. A ou masani loa i la’u “tagata autu,” e taia malosi mai le mea moni e faapea, e feagai tagata ola uma i luga o le lalolagi ma tofotofoga i o latou olaga. O le tele lava o lo’u talanoa i lena tagata, o le amata tele foi lea o lo’u vaaia o i latou o se uo ae le o se tasi e foliga mai e leai ni ona faaletonu.

I lana lauga o le konafesi ia Oketopa 2016 “O Lava Ea Lo’u Lelei? Pe O Le A Ou Ausia Ea?” Na saunoa mai ai Elder J. Devn Cornish o le Fitugafulu e faapea, “E na o le pau le manatu e taua ia i tatou o le mea o loo finagalo ai lo tatou Tama Faalelagi ia i tatou. Faamolemole ia ole atu ma le faamaoni ia te Ia po o le a Sona finagalo ia te oe. O le a Ia alofa ma faasa’o mai ae le faalotovaivaia i tatou.” A ou mafaufau faapea o le a le mafai ona ou lelei e pei o tagata e siomia au, ou te liliu atu i lo’u Tama Faalelagi ma taumafai e manatua o au o se afafine o se Atua agaalofa, o le e naunau e fesoasoani mai ia ou ausia o’u gafatia uma ma avea ma tagata ua Ia silafia e mafai ona avea ai au pe a ou sailia o Ia.

Sa masani ona ou faatusatusaina au lava i isi o e sa ou manatu sa sili mamao atu ia te au, ae maise lava o tagata o e sa sili atu ona mautu i tulaga tautupe. Soo se taimi lava ou te tatalo ai i le Tama Faalelagi, Na te tuuina mai ia te au le mautinoa ia te au lava. Na ou iloaina po o le a lava le faigata, o le a fesoasoani mai le Atua ia te au aua Na te le tuuina mai ia i tatou se tiute sei vagana ua Ia saunia le ala mo i tatou e faataunuu ai (tagai 1 Nifae 3:7; 17:3).

Joshua O., 19 tausaga, Lagos, Nigeria