O le Ala o le Osigafeagaiga

I le avea ai ma se alii talavou, sa ou toaga lava i le polokalama a le sikauti, ma sa ou faafetai i le mauaina o lo’u Taui o le Queen Scout. O la’u galuega faatino faaiu lava e agavaa ai mo lea taui o le taitaia lea o se vaega e sopoia le “alasopo taloto” i le totonugalemu o Tasimania i aso e ono. O se suifefiloi o laufanua lafulafua ma o nisi taimi e faigata, ma o le vaaiga mai tumutumu eseese i le gasologa o le alasopo sa matua ofoofogia ma sa matua aoga ai lea taumafaiga.

I se vaega o la matou malaga i le tau faaiuiuga o se tasi aoauli, sa amata ona mamafa timuga ma sa lapataia ai i matou e le vaaiga mai le lagi ua vave ona lagileaga le tau. I le avea ai ma tagata sa taitaia lea vaega, sa ou autilotilo i le nofoaga aupito latalata mai e saogalemu e savavali i ai, ma sa feutagai ai ma le matou ‘au ma tonu ai i le mea o le a matou faia. Sa matou tuua le ala autu ae agai atu i le vaega saogalemu e tolauapi ai mo le po.

I lena po sa atili ona mamafa timuga nai lo se isi taimi sa ou manatua i lo’u olaga ma e oo ane i le taeao ua lolovaia mea uma i lo matou siomaga. Sa tafiesea lo matou alasopo saogalemu e toe foi ai i le ala autu, ma sa tuua ai i matou i se tulaga matautia. Ou te manatua le sueina o se nofoaga taaligoligoa, ma tootuli ma tatalo atu ai mo se taitaiga mai le Tama Faalelagi. O le tali sa le gata ina manino ae sa aumai ai faatonuga. E tatau ona ou toe saunia se auala e toe foi ai i le ala autu e ui atu i le tuasivi i le vaomatua ma pupuvao. Afai ou te tumau ai i luga o le ala ma lē faatafatafa ese mai le faatonuga sa ou mauaina, o le a iu ina matou toe foi saogalemu i le ala autu.

Sa matou agaigai atu ma le faatuatua. O le alasopo sa ui atu i le vaomatua sa faigata ma sa o matou faataututu ma vaivai ai. Ina ua mavae se taumafaiga tele (ma faatasi ai ma ni nai tatalo le leoa) sa matou taunuu i le ava na mafai ai ona matou vaaia le ala mai se mea mamao. O le lagona o le lotofaafetai ma le toafilemu o se lagona o le a le mafai lava ona ou faagaloina.

O le vaega faaiu lava sa faigata ia i matou o le kolosia lea o se vaitafe ua tatafe lea sa matou laasia muamua i le aoauli ua tea. Sa i ai se ogalaau ma se uaea manifinifi sa mafai ona matou fepiiti i ai e faapaleni ai. Sa faigofie ona kolosia i le aso muamua aua sa lei tatafe le vaitafe. O lo matou toe foi e ui atu i le vaitafe tatafe ma le ogalaau ua ufitia i le ‘aave o le vai na faamaonia lava le sili atu ona faigata.

Sa taitasitasi ona matou kolosia le vaitafe, ma pipiimau i le uaea ia maua ai le fesoasoani sa matou manaomia, faaopoopo i ai ma le faamalosiau mai tagata taitasi o le ‘au. Na iu ina matou saogalemu uma, ma sa matou toe i ai i luga o le ala sa taitai saogalemu atu ai i matou i le ala. O le “ai uamea” sa matou pipiimau i ai, na laveaiina i matou mai le tulaga matautia.

Ua mavae le tele o tausaga sa ou toe mafaufau ai i lesona sa aoaoina e ala mai i lenei aafiaga. E tele naua e le mafai ona ta’u uma atu, ae o nisi nei:

• O le a le taitai seseina lava i tatou e le Tama Faalelagi aua e faafofoga mai o Ia ma tali mai i a tatou tatalo.

• A o tatou faatuatuaina o Ia, e mafai ona tatou mautinoa o le a Ia taialaina i tatou.

• O le auala e toe foi ai i le saogalemu e ono faigata, ae a o tatou faatuatuaina o Ia e mafai ona tatou taunuu i ai faatasi ma Lana fesoasoani.

• O le pipiimau i le ai uamea o le a taitai atu ai i tatou i luga o le ala e toe foi atu ai ia te Ia.

I lana uluai savali i tagata o le Ekalesia o se Perofeta ia Ianuari, sa tuuina mai ai e Peresitene Russell M. Nelson le talosaga lenei ma le folafolaga. Na ia saunoa, “I tagata taitasi uma o le Ekalesia ou te faapea atu, ia tumau i luga o le ala o le feagaiga. O lau tautinoga e mulimuli i le Faaola e ala i le osia o feagaiga ma Ia ona tausia lea o na feagaiga, o le a tatala ai le faitotoa i faamanuiaga faaleagaga uma lava ma avanoa e le laumaua ua avanoa mo tamaitai, alii ma fanau i soo se mea.”

Na ia faaauau, “O le iuga lea o loo taumafai i ai i tatou taitoatasi o le faaeeina lea i le mana i se maota o le Alii, faamauina o ni aiga, faamaoni i feagaiga na osia i se malumalu lea e faaagavaaina ai i tatou mo le meaalofa aupito silisili a le Atua, o le ola e faavavau lea … O lenei, afai ua e laa ese mai le ala, ou te fia valaaulia oe faatasi ai ma le faamoemoe uma o i lo’u loto, faamolemole ia foi mai. Po o a lava ou atugaluga, po o a lava ou luitau, o loo i ai se avanoa mo oe iinei, i le Ekalesia a le Alii. O le a faamanuiaina oe ma tupulaga e lei fananau mai, e ala i au mea o fai nei e toe foi ai i le ala o le feagaiga. E faapelepele e lo tatou Tama i le Lagi ana fanau ma e finagalo ia toe foi atu i tatou taitoatasi ia te ia. O se sini maoae lea a Le Ekalesia a Iesu Keriso o le Au Paia o Aso e Gata Ai e fesoasoani ai ia i tatou taitoatasi e toe foi atu ia te ia.¹”

E tele mea ua tatou aoaoina e uiga i le ala o le osigafeagaiga mai le tala i le miti a Liae i le Tusi a Mamona. I le 1 Nifae, Mataupu 8. O iina ua tatou aoao ai e uiga i le tele o elemene taua o le miti², ae peitai o le ai uamea ma le laau sa faatumulia i fua e tulagaese lava ia mea ia te a’u. O le ai uamea lea na faamatala e Liae e faatusa i le ala o le osigafeagaiga lea na saunoa i ai Peresitene Nelson.

Sa matauina e Elder David A Bednar, “E mafai e se tagata ona maua le ala lea e tau atu i le fua i le na ona ulufale atu i le faitotoa—o sauniga ia o le papatisoga ma le mauaina o le meaalofa o le Agaga Paia. O le fetuleni atu i luma ma le aai i le fua o le laau e mafai ona faatusa i le mauaina o sauniga faaopoopo ma feagaiga ia e mafai ai ona aoga atoatoa le Togiola a le Faaola i o tatou olaga.³”

O le fua e faatusa i faamanuiaga o le Togiola a Iesu Keriso, ae ina ia mafai ona maua uma ia faamanuiaga o Lana Togiola, e manaomia ona tatou savavali i le ala o le osigafeagaiga ina ia mafai ai ona tatou taunuu atu i le laau. Pe o se mea ea e ofo ai ina ua na o le taimi na taunuu ai Liae i le laau ma ‘ai i le fua na ia maua ai se vaaiga i le natura e faavavau ma faamanuiaga mo lona aiga. O lena malamalamaaga na avea ai ma ona faanaunauga aupito silisili ia aai i latou uma taitoatasi i le fua, pe i se isi faaupuga, ia savavali i le ala o le osigafeagaiga.

Ou te tuuina atu la’u molimau o le agaigai i luma e le maluelue ma tumau i luga o le ala o le osigafeagaiga agai atu i le laau, o le kosi lea ua saunia mo i tatou taitoatasi. O le a faatumulia i tofotofoga ma luitau, peitai e pei ona sa aoao mai e Elder Bednar i le Konafesi Aoao a Oketopa 2016, “o le tofoina o le fua o le laau ma le o’o ina liua loloto i le Alii o faamanuiaga ia o loo Ia naunau i ai mo i tatou taitoatasi ia mauaina.⁴”