“Tauaveina o Avega a le Tasi ma le Isi”

Ata

young man in wheelchair laughing

Sei o tatou nonofo i le mataupu lenei o le Togiola a Keriso mo sina taimi. Afai ou te malamalama lelei i le aoaoga faavae, i le aafiaga o le Togiola, lea sa oo i ai Iesu Keriso e fai ma sui—ma tauave le avega o—agasala ma faanoanoaga ma faafitauli ma loimata o tagata uma, mai ia Atamu ma Eva e oo lava i le iuga o le lalolagi. I lenei mea, sa lei agasala moni o Ia Lava, ae sa Ia lagonaina le tiga ma taunuuga o i latou na agasala. E lei aafia patino o Ia i le malepe o se faaipoipoga, ae sa Ia lagonaina le tiga ma taunuuga o i latou na malepe faaipoipoga. E lei aafia patino o Ia i faiga aiga faamalosi, po o le faaletonu o le mafaufau po o le kanesa po o le maliu o se tamaitiiti, ae sa Ia lagonaina le tiga ma taunuuga o i latou na oo i ai, ma isi mea faapena e ala i le tele o vaega eseese o faigata o le olaga ma loto nutimomoia.

O le vaaiga lena i le auala e galue ai le Togiola ua fautuaina mai ai le faataitaiga paia moni e tasi o le malamalama e lei iloa muamua lava e le lalolagi. O le mea moni, e leai se upu e lava ona faamatalaina ai le faatinoga aupito sili ona taua i le atulaulau, ae o le aso, e leai se upu sili ona lelei e sui ai, o lea o le a ou faaaogaina ai.

O le malamalama ua faauigaina o “le faatinoga o le iloa … ma [lou] mauaina o lagona, mafaufauga, ma aafiaga o se isi tagata a le o se taimi ua tuanai o le taimi nei.”⁴ E pei ona uma ona ta’ua, o le mea moni o se faamatalaga lelei lena e uiga i le faagasologa o le togiola, ae maise lava pe afai tatou te faaopoopoa i ai le “lumanai” i le “taimi ua tuanai” ma le “taimi nei.”

Ua tatou iloa uma lava ua toatele naua fanau a le Atua ua pagatia le leoa ma toatasi. Mo se faataitaiga, o se alii talavou sa tusi mai ia te au e faailoa mai ai lana molimau i se tusi na maoae le faaleoina, ae na faaopoopo mai, ua ta’e lona fatu ona na te le o vaaia se faataunuuga po o se olioli i le lumanai mo ia o se tagata e tosina atu i le itupa tutusa.

“Ou te feagai ma se olaga o po tuuatoatasi ma taeao le manaia. Ou te auai ma le faamaoni i lau uarota o le YSA, ma o vaiaso taitasi ou te tuua ai le lotu ma le iloa, e le mafai moni lava ona ou auai atoatoa i le ekalesia. O le a ou le aoaoina lava lo’u atalii e tietie i se uila. O le a ou le lagona le uu e la’u pepe teine o lo’u tamailima ao aoao o ia e savali. O le a ou le maua ni fanau a ni fanau.

“O le a ou sau i le aiga i se fale gaogao, i lea aso ma lea aso, i lea masina ma lea masina, i lea fiasefulu tausaga ma lea fiasefulu tausaga, ae na o lo’u faamoemoe ia Keriso ua taula i ai. O nisi taimi ou te mafaufau ai, pe aisea o le a Ia faia ai lenei mea ia te a’u ma fai mai ia ou faia se osigataulaga faigata faapenei. Ou te tagi i le po pe a leai se isi e iloa mai a’u. Ou te lei tauina i se tagata, e oo lava i o’u matua. O le a teena e i laua faapea ma a’u uo … a’u pe afai latou te iloaina, e pei ona latou teena i latou o e sa savalia muamua lenei auala. O le a ou ola i se olaga e ese mai i isi tagata. Ua ia te au se filifiliga a le o le sauaina ma le tuulafoaia ona o le nofofua, po o le faanoanoa ona o o’u faaletonu ma le le amanaiaina ona o le tauina o le mafuaaga [o lo’u nofofua]. O le a umi ma [le manaia] le olaga i ou luma atu. E leai ea ni pulu pasama i Kiliata?”⁵

Faatasi ai ma le tele naunau o le tiga ma le faanoanoa, tele naua le leai o se faamoemoe, e tasi le mea e mautinoa lava le tatau ona tatou taumafai e tuuina atu i se tagata faapea, o le faamautinoaga lea e le o tuua nao ia. E tatau ona tatou matuai naunau e faamamafa atu o loo faatasi le Atua ma ia, o loo faatasi agelu ma ia, ma o loo tatou i ai faatasi ma ia.

Malamalama. E foliga mai e faalelava, ae o se mea lea e amata ai. Atonu e le mafai ona tatou suia le faigamalaga, ae e mafai ona tatou faamautinoaina ia leai se taisi e savalia nao ia. E moni lava, o le uiga lena o le tauave o le avega a le tasi ma le isi—o avega na. Ma o ai e iloa le taimi pe mata o le a sii ae i latou i le olaga lenei. Ae e mafai ona tatou savavali faatasi ma tausoa le avega. E mafai ona tatou siiae o tatou uso ma tuafafine e pei ona sii ae i tatou e Iesu Keriso (tagai Alema 7:11–13).

Ma i lenei mea atoa, e mautinoa lava le tatou maua ai o se loto faafetai fou ma sili atu le susulu mo mea uma e faia e le Faaola mo i tatou. E pei ona ou fai atu i se tasi o taimi:

“I le tauivi ai mo sina filemu ma le malamalama i nei tulaga faigata, e taua tele le manatuaina o loo tatou ola—ma filifili e ola—i se lalolagi pa’ū lea e tusa ai ma faamoemoega paia o le a toe tofotofoina ai ma suesueina ai pea lava pea i tatou i la tatou sailiga o le faaleatua. E tusa ai ma le faamautinoaga silisili i le fuafuaga a le Atua, o lea sa folafola mai ai se Faaola, o se Togiola lea e ala i lo tatou faatuatua ia te Ia, o le a sii ae ai i tatou ma le manumalo i luga a’e o na faaosoosoga ma tofotofoga, e ui o le tau mo le faia o lena mea e lemafuatiaina mo le Tama o lē na auina maia o Ia atoa ma le Alo lea na afio mai. Ua na o le talisapaiaina lava o le alofa paia lenei o le a muamua ai ona lavātia o tatou lava puapuaga ia e itiiti ifo i lo [ō Laua puapuaga], ona sosoo ai lea ma le malamalama i ai, ma mulimuli ai togiolaina.”⁶

E vave ona tatou aoaoina, o a tatou auaunaga sili ona lelei ma le le manatu faapito, e masani ona le lava lea e faamafanafana pe faamalosiauina ai i le auala e manaomia ai e tagata. Po o le, afai e i ai se taimi e faamanuiaina ai i tatou, e masani ona foliga mai e le mafai ona tatou toe faia. E le o i tatou foi o ni toa ma ni mana e puipuia le toe sasi o i latou tatou te alolofa i ai. O le pogai atoa lea e tatau ai ona tatou liliu atoa atu ia Iesu Keriso ma faalagolago ia te Ia (tagai 2 Nifae 9:21).

E tele lava ina le mafai ona tatou fesoasoani—po o le, le mafai foi ona tatou faaauau ona faatumauina la tatou fesoasoani pe le mafai foi ona toe faia pe a tatou faamanuiaina i nisi o taimi. Ae e mafai ona fesoasoani mai Keriso. E mafai ona fesoasoani mai le Atua le Tama. E mafai ona fesoasoani mai le Agaga Paia, ma e tatau ona tatou taumafai pea ia avea ma a Latou avefeau, e fesoasoani atu i taimi ma soo se mea tatou te mafai ai.

Mo outou o e saili ma le naunautai e tauave avega a le tasi ma le isi, e taua ona e toefaamalosia oe lava ma toe faatulaga oe lava pe a ua tele naua mea e faamoemoe mai e isi mai ia te oe, ma faapea ona tele naua ai lou malosi e alu ai. E leai se tagata e malosi naua e faapea ona latou le lagona ai le vaivai po o le le fiafia pe iloa ai le manaomia ona vaai faalelei i latou lava. Sa mautinoa lava le oo o Iesu i lena vaivai, lagona le alu ai o Lona malosi. Sa Ia tuuina atu ma tuuina atu, ae e i ai se tau e pipii atu ai i lena mea, ma sa Ia lagonaina le mamafa o le toatele e faalagolago atu ia te Ia. Ina ua papai atu le fafine sa i ai se faafitauli o le punatoto ia te Ia i le mano o tagata, sa Ia faamaloloina o ia, ae sa Ia matauina foi “ua alu atu le mana na ia te ia” (tagai Mareko 5:25–34).

Sa ou ofo lava ona o le mafai ona Ia tofa ao agi i le Sami o Kalilaia se matagi malosi ma ogaoga lea sa faapea ai Ona au soo o ni faifaiva atamamai, o le a goto le vaa. Oka se maoae o lena lelava? E fia ni lauga e mafai ona e tuuina atu ma ni faamanuiaga e mafai ona e faia e aunoa ma se matuai lelava lava? E tatau foi ona tausi faalelei i latou e tausia isi tagata. E tatau ona lava lou malosi ona faatoa mafai lea ona e fesoasoani atu i isi.

Na fai mai i se tasi taimi ia Rosalynn Carter, o le peresitene o le pulega o le Rosalynn Carter Institute for Caregiving, “E na o le fa lava ituaiga tagata i le lalolagi lenei: o i latou o e sa tausia isi tagata, o i latou o loo tausi isi tagata i le taimi lenei, o i latou o le a tausia isi tagata, ma i latou o le a manaomia ni tagata e tausia i latou.”⁷

E manino lava, “o le sootaga i le va o le tagata e tausia isi tagata ma le tagata e mauaina le tausiga, o se sootaga moni lava, o se sootaga paia lava.”⁸ Ae peitai, ao tatou oo i le luitau o le tauaveina o avega a le tasi ma le isi, e mafai ona tatou manatua, e leai se tasi o i tatou e sao mai le taunuuga o le malamalama i le tiga ma puapuaga o se tagata tatou te tausia.

Ata

helping a woman put shoes on

E taua le sailia o auala e faapaleni ai lau matafaioi o le tausia o isi tagata ma isi vaega o lou olaga—e aofia ai le galuega, aiga, mafutaga, ma gaoioiga e te fiafia i ai. I se lauga o le konafesi e uiga i lenei mataupu, sa ou taumafai ai e “tuuina atu se saafiafiga ia te outou uma, ia i latou uma o e o faia mea e tele ma agalelei tele atu ma galulue ma le ‘faamoemoe e faia mea lelei.’ E ese le agalelei o le toatele. Ou te iloa o nisi o outou [atonu e i ai luitau faalelagona pe faaletupe] i o outou lava olaga ma tou te maua lava sina mea e faasoa atu [i isi]. E pei ona lapataia e le Tupu o Peniamina lona nuu, e le o faamoemoe ia tatou taufetuli saoasaoa e sili atu nai lo o lo tatou malosi ma e tatau ona faia mea uma ma le auauai lelei (tagai Mosaea 4:27).”⁹ Ae e ui lava i lea, ou te iloa e toatele outou e taufetuli saoasaoa tele ma e toetoe lava a uma lo outou malosi ma sapalai faalemafaufau i nisi o taimi.

Afai ua tele tele ia faafitauli, ia manatua ia upu nei mai se tala na tusia e David Batty:

“O le faamoemoe e le o se faalogona—e le o se galu lolo o le olioli i le ogatotonu o se faafitauli.

“… O le faamoemoe e le o le laau fai maneta lea e faanimoina le faafitauli. O le faamoemoe o le laina ola lea e taofiofia oe mai le lofituina i afa o lou olaga.

“A tuu atu lou faamoemoe ia Iesu, ua e tuu atu lou talitonuga i Ana folafolaga e faapea, o le a Ia le tuua lava oe pe lafoaia oe—o le a Ia faia le mea sili mo oe. E ui atonu e te i ai i le totonugalemu o se faafitauli ogaoga, o le faamoemoe e mafai ai ona e toafilemu, i le iloa o loo faatasi Iesu ma oe i laasaga uma o le ala.”¹⁰

Ou te fiafia i le auala na taulima ai e Paulo lenei tauiviga ma lagona o le le atoatoa. I tusitusiga paia, na faamalamalama mai ai e le ALii o Lona alofa ua lava lea mo Paulo, ma o le mea moni, o Lona alofa “sa faaatoatoaina i le vaivai.” Sa tusia e Paulo, “O lea ua tele ai lava lou fiafia i le mitamita i mea ua ou vaivai ai, ina ia tumau i ou luga le mana o Keriso” (2 Korinito 12:9).¹¹

E tatau ona tatou talitonu o lo tatou Tama Faalelagi ma Iesu Keriso e alolofa moni ia i tatou, ma mea o loo tatou faia, ma La te finagalo ia tatou “faaatoatoaina i le vaivai”—o le mea tonu lava e te manao ai mo i latou o loo e tausia.

Ou te molimau atu o loo silafia e le Atua a tatou avega ma o le a faamalosia i tatou e faamalosi atu i isi. E le faapea ai la o le a nimo ese ai i taimi uma o tatou faafitauli, pe o le a faafuasei lava ona toafilemu le lalolagi. Ae e le faapea ai foi e oo atu a outou tatalo i ni taliga e logonoa. Ma e faapena foi i talosaga a i latou e te tausia—o fafine ua oti a latou tane, o ulugalii ua tetea, ma e tuua toatasi, o e lofituina, o e i ai vaisu, o e mamai, ma e leai ni faamoemoe—o tagata uma lava.¹²

Uso e ma tuafafine, o le auaunaga tatou te tuuina atu pe a tatou tauaveina avega a le tasi ma le isi e matuai taua lava—o le mea moni o le galuega lea a le Matai. O le aofai o tusi na maua i lou ofisa ua faaalia ai le tele o le fesoasoani o loo manaomia. O lena fesoasoani o le manai mai le lagi ia i latou o e tauivi.

Sa ou faapea atu foi i se tasi taimi: “A tatou talanoa e uiga ia i latou o tufugaaao i le Atua, ua faamanatu mai ia te i tatou e le o agelu uma e mai le isi itu o le veli O nisi o i latou tatou te savavali ma talanoa faatasi—iinei, i le taimi nei, ma aso uma lava. O nisi o i latou e nonofo i o tatou pitonuu. O nisi o i latou na fanauina i tatou, ma i lo’u tulaga, o se tasi o i latou na ioe ma te faaipoipo. E leai se taimi e sili ona lalata mai ai le lagi, nai lo le taimi tatou te vaaia ai le alofa o le Atua o faaalia i le agalelei ma le tuuto o tagata e ese le lelei ma matua mama, lea e na o le upu pei o se agelu e tau i ai lou mafaufau.”¹³

Ia te au, a outou taumafai e faamama le avega a se isi tagata, o outou o agelu moni o le alofa mutimutivale i lona faauigaga sili ona sa’o. Talosia ia sautuaselau mea tou te toe maua mai i mea uma tou te taumafai e avatu.