Sauniuniga o le Olaga
O Lo’u Aso Muamua i le Korama a le Au Toeaina
E alala le tusitala i Kalefonia, ISA.
Sa ou laitiiti, ma o se toeaina fou lava. O le a se mea sa ia te au e ofo atu i le korama a le au toeaina? Sa iu ane, e tele lava!
Ou te lei popole moni i le auai i le korama a le au toeaina, aua na ou lagonaina e pei sa ou iloaina lava le mea e tupu. Sa ou iloaina foi tagata uma o loo i totonu o le korama a le au toeaina a la’u uarota. Sa i ai tama o au uo ma alii ua ou tepa taulai atu i ai o ni faufautua. Sa ou iloa sa latou fiafia e fesoasoani ia ou malamalama i mea, ina ia le o se mea taufaafefe le auai ma i latou i le korama a le au toeaina.
O le mea sa fai ai sina matafefe o le saofaga i lesona. O le taimi muamua sa faigata ona taumafaufau e mafai ona ou ofoina atu se mea i alii o e ua anoanoai o latou aafiaga i le olaga ma matuai tele lo latou atamai nai lo au.
Sa Ese, Peitai e Tutusa
O le korama a le au toeaina e mautinoa lava le ese mai le korama a ositaulaga. Nai lo o se vaega o tama o lau tupulaga, ua faafuasei lava ona e i ai ma tagata matutua. O nai taimi muamua e lua na ou alu ai, sa tau leai ni au tala na fai atu. Sa ou popole sa ou laitiiti tele ma sa le lava ni mea na ou iloa e saofaga ai.
Ae o le faatele lava ona ou alu i ai, o le tele foi lea o lo’u lagolelei ua i ai, ma o le tele foi lena o lo’u iloa e faapea, e le afaina po o le a lou matua, e tofu tagata uma ma se mea e saofaga ai. E eseese uma lava aafiaga o tagata i le talalelei ma e eseese foi le maualuga o malamalama o tagata e uiga i mataupu faavae eseese.
Sa Ia te Au se Mea e Faasoa Atu
I se tasi o taimi sa matou talanoa ai e uiga i le Togiola a le Faaola ma sa sii lo’u lima. Sa na o lou fai atu lava e faafetai i Lana Togiola, ua le gata ina faasaoloto ai e Iesu Keriso i tatou, ae e mafai foi ona fesoasoani ia tatou latalata atili atu ai ia te Ia ma i le Atua. Sa ou talanoa e uiga i lo’u sootaga ma le Tama Faalelagi ma Iesu Keriso, ma le ala ua faamalosia ai a o tuputupu ae lo’u malamalama i le Togiola. Ina ua uma le vasega, sa sau se alii ia te au ma faafetai mai mo ou manatu na faaalia. Sa fai mai o ia, sa lei mafaufau lava e uiga i mea i le ala na ou tau atua ia i latou ma talisapaia moni lo’u malamalama.
E Manaia le Faiaoga o Aiga!
I le korama a le au toeaina, e le nao lou aoao mai se faiaoga; e te aoao mai foi i le Agaga ma isi tagata uma i le korama. O lena vaaiga atoa e fesoasoani e te maua ai le malamalama atili i mea o loo aoaoina ai oe. Ma e fesoasoani lena e avea ai oe ma se auauna e sili atu a le Alii. Mo se faataitaiga, talu lava ona avea au ma se toeaina, ua amata ona faateleina lou fiafia i le faiaoga o aiga! Ou te manatu ua ou faatauaina teisi atuaua ou te iloa a avea au ma se faifeautalai i ni nai masina, o le a ou asiasi i tagata ma faasoa atu savali o le talalelei ia i latou e pei lava ona ou faia pe a ou faia faiaoga o aiga. Nai lo le na o le saofai iina ae tuu i lau soa na te faia uma le aoaoga, ua amata ona ou saunia mo a maua asiasiga. Ou te faamautinoa e fai sa’u tala. Ou te iloa o se tapenapenaga lelei lea mo la’u misiona, ae ua anoa atili ai faiaoga o aiga ia te au. Ua i ai nei sou talisapaiaga sili atu mo tagata o la’u uarota ma tagata ou te faiaoga o aiga ai.
Afai E Mafai Ona Ou Faia, E Mafai Foi Ona E Faia
E le tatau ona e lofituina i le korama a le au toeaina, ae e mautinoa lava e mafai ona e tulimatai atu e faalogologo i ni atamai se tele e uiga i autu o loo e aoao i ai. E mafai ona e tulimatai atu e avea ma se faiaoga, taitai, ma se auauna lelei atu a le Alii. Ma e ese le manaia o lena mea!