O Le Fesoasoani a le Alii e ala i Taotoga e Lua o le Faiai
Bryn Booker, Idaho, ISA
ATA NA TUSIA E Bonnie Hofkin
I le taimi o faamalositino faafomai mo le tiga o le papatua, sa ou matauina ai le vaivai ma le gase o le itu tauagavale o lo’u tino. Ina ua ou faamatala atu nei auga i la’u fomai mo le faamalositino, sa popole o ia ma uunaia au e vaai se fomai.
Na faaalia i se faaata e faaaoga ai maneta [MRI], ua sosolo atu le tupu o lo’u faiai i lalo ifo o lo’u atigipoo ma sa to’a ai le suavai o le tuasivi i lo’u ua mo le tele o tausaga. O lenei mea na mafua ai le tiga tele ma le tiga soo o lo’u ulu. Na pau lava le filifiliga o le taoto. Ae e ui lava i le taotoga, sa ou faalogoina pea le tiga i taimi uma.
O le ono masina mulimuli ane, sa ou toe foi atu ai i la’u fomai mo nisi suesuega ma iloa ai, o le suavai o le tuasivi lea na to’a ua faateteleina atili. Sa matuai ou fefe lava e toe fai se isi taotoga tiga. Sa ma sailia ma lo’u toalua ni isi manatu faafomai ona ma o loa lea ma se fomai o le sa lagonaina ma le mautinoa, o le aveesea o se vaega o lo’u faiai o le a aoga lea.
O lo’u sailiga malosi ai mai le taotoga lona lua o lo’u faiai, sa o se aafiaga aupito tiga lea o lo’u olaga. Sa matuai ou saili ma le atuatuvale mo le Agaga e faamafanafana mai ia te au. Sa ou faalogologo i lauga ma viiga, tatalo pea lava pea, ma maua le tele o ni faamanuiaga faaleperisitua.
E ala i la’u sailiga malosi tiga tele, ua ou iloa ai sa faafofogaina e le Tama Faalelagi au tatalo, ma tatalo a isi na faia mo au. Sa Ia auina mai tagata ia te au i taimi sa ou manaomia ai i latou. Sa fesoasoani mai se tausisoifua i le atufalega sa ou i ai ia ou iloa le ala e taulima ai au fualaau. Sa matau mai e le tamaloa ma le fafine o lo’u aiga ia faailoga o le leai o se vai i lo’u tino, ma ave loa au i le falemai. Na tuua e se tamaitiiti o le Peraimeri, o le sa manao e fesoasoani mai i lo’u aiga, ana meataalo i luga o le faasitepu mo lo’u atalii. E ala i lenei aafiaga ma le tele o isi aafiaga, ua mafai ona ou lagonaina ai le sapasapaia o a’u e le Faaola, ma tuputupu malosi ae ai la’u molimau i aso taitasi. O se aafiaga matagofie ma le paia lenei na tupu mai i se aafiaga matuai tiga lava.
E ui ina sa faamanuiaina lo’u taotoga lona lua, ae sa faaauau pea lo’u le lagolelei, ma sa faapea ona ou aoao ai ia fetuutuunai i se olaga o le tiga faifaiumi ma faatuatua o loo i ai se faamoemoega o le Tama Faalelagi i lea mea. Ae e i ai lo’u faamoemoe i Lana folafolaga e faapea, o le a faaauau ona Ia faamalosia a’u i o’u luitau, e pei ona Ia fetalai: “O le a Ou alu muamua atu i o outou luma. O le a ou i ai i lo outou lima taumatau ma lo outou agavale, ma o le a i ai lou Agaga i o outou loto, ma sio faataamilo outou e auagelu, e sapasapai outou i luga.” (MF&F 84:88).