O Le Tatou Malutaga i le Sapati

Ata

church building

O le sauniga faamanatuga o se taimi matagofie ma le mamalu. A tatou laa atu i totonu o le falesa ma sauni e talia le faamanatuga, e tatau ona tatou mafaufau ia i tatou lava i le i ai i totonu o se malutaga, o se nofoaga paia ma faapitoa lea e mafai ai ona tatou mafaufau ia Keriso ma Lana misiona maoae ma le ofoofogia. Tatou te tuu ese ai mea o le lalolagi ae mafaufau i mea e faavavau. E manaomia ona tatou tuu ese a tatou telefoni feaveai ae mafaufau loloto ia Iesu Keriso, le Alo o le Atua Soifua.

E nao le 70 lava minute o vaiaso taitasi tatou te taulai atu ai i lo tatou alolofa mo le Faaola. Afai e amata ona tatou mafaufau i le falesa o se malutaga o le faatuatua ma le tuuto mo le sauniga faamanatuga, o le a faamanuiaina uma i tatou.

A o tatou atinaeina le malo o le Atua, e le mafai ona ou mafaufau i se mea e sili atu le taua nai lo o le i ai o se sauniga faamanatuga e saunia lelei, lea e saunoa ai failauga e uiga ia Keriso, molimau ia Keriso, ma faasoa atu molimau mai aposetolo ma perofeta i tusitusiga paia ma isi punaoa.

I le avea ai ma se Ekalesia ua tatou taulai atu ai i le aso Sapati. Ua tatou alualu i luma, ae tatou te lei oo i ai. O le a faaauau pea a tatou taumafaiga seia oo ina matuai uunaia faaleagaga ia tagata uma ma faifeautalai i le taimi o a latou tapuaiga i le aso Sapati, lea e taitasi i latou ma fai atu i lona tuaoi, tagata sailiili, ma aiga, “O mai e vaai. O mai tatou tapuai faatasi.” O iinei tatou te fia i ai.

Afai e mafai e i tatou uma o se Ekalesia ona faia lenei mea, o i latou o e taliaina la tatou valaaulia e “o mai e vaai” o le a lagonaina le mana o le savali o le Ekalesia toefuataiina a Iesu Keriso. A o latou tapuai faatasi ma i tatou i a tatou sauniga faamanatuga, o le a faagaeetia o latou loto ma o le a mumu le sulu o le talalelei i o latou loto ma mafaufau.