Wan Tabu Wei blong givim Seves
I Kam long Elda Patrik Kiron
Blong Presidensi blong Olgeta Seventi
I kam long wan divosen blong ol yang adalt raon long wol, “A Hallmark of the Lord’s True and Living Church,” i bin kamaot long Brigham Yang Yunivesiti–Aedaho long 6 Mei 2018.
Bae yumi folem Kraes ia we stap laef, iven moa gud, taem yumi staptraehad blong kam olsem ol tru disaepol blong Hem tru long wok blong givhan olsem we Hem bae i wantem.
Pikja i kam long Kelley McMorris
Taem mi gat 15 o 16 yia, mi stap tingbaot miwan nomo, olsem fulap long yumi long yangfala taem blong yumi, no stap kwaet, no save wanem blong mekem mo isi blong oli spolem mi. Mi filim se mi lus, mi sem, mo mi diferen. I no isi, from mama mo papa blong mi i stap longwe long Saudi Arabia taem mi stap long wan boding skul long wan ples we i stap hemwan kolosap long solwota, long Inglan. Mi filim se oli no welkamem mi long skul.
Weta longwe i nogud oltaem from solwota, be long wan winta hem i moa nogud ol strong win i blo long solwota blong Iris wetem ol strong win blong hariken. Samples long 5000 haos wota i kavremap olgeta, kakae i nogat, mo ol man oli nogat laet o eni samting blong mekem haos blong olgeta i wom mo givim laet.
Taem wota i stap go daon, skul i seraotem mifala blong help blong klinap. Mi sapraes tumas blong eksperiens i wan natarol disasta we i klosap. Wota mo sof-mad i stap evri ples. Ol fes blong olgeta we haos blong olgeta wota i go insaed long hem oli sik mo bunbun. Oli no silip blong plante dei. Mi wetem ol fren blong skul i wok, muvum ol samting we wota i go long hem i go long floa antap mo karem aot ol kapet we i nogud.
Be wanem i mekem mi i filim gud moa hem i fasin blong wok wan. I gat wan gudfala filing long ol pipol from oli wok wan long wan taem we i had. Afta mi tingting bak long ol filing blong fraet we mi gat taem mi yang, ol tingting ia mi lego taem mi traem bes blong mi blong helpem ol neiba blong mi.
Mi faenem aot se taem mi stap helpem ol narawan i ansa ia nao long fasin blong putum mi daon, fasin blong tingbaot miwan i stat blong jenis. Be wanem mi fanemaot ia i no draon dip insaed long hat blong mi, mo mi no traem bes blong mi blong tingting moa long wanem i bin tekem ples. Andastaning ia i jes kam afta.
Invitesen blong Givhan
Foto blong wan mama mo pikinini gel blong hem i kam long Linda Jean Purnell
Mi stap tingting long hemia long taem blong Epril 2018 jeneral konfrens olsem we mi harem oli talem bakegen singaot ia blong givhan olsem we Sevya i givhan—mo blong mekem wetem lav, blong luk save se yumi ol pikinini blong Papa blong yumi long Heven.
Bae yumi givim seves i no from se bae oli kaontem mo mesarem be bae yumi givim seves from se yumi lavem Papa blong yumi long Heven mo blong yumi wantem blong wan moa hae mo tabu rod—blong helpem ol fren blong yumi blong faenem mo stap long rod ia blong gobak long Hem. Yumi lavem mo givim seves long ol neiba blong yumi olsem we bae Jisas i mekem sapos Hem i stap long ples blong yumi, bae yumi trae had blong helpem ol pipol i kam andatap long ol laef blong olgeta mo mekem ol harem nogud blong olgeta i kam laet. Hemia wea glad mo longfala fulfilmen i kam long hem, tugeta long hemia we i givim mo hemia we i risivim, taem yumi serem ol frut blong save mo filim se mifala i impoten mo lav blong God we i no save finis long wanwan long mifala.
Presiden Russel M. Nelson i talem, “Wan hae mak long Jos ia we i tru mo i laef we i blong Lod, i we, oltaem hem i oganaes, i lidim wok blong givhan long wanwan pikinini blong God mo famli blong olgeta.” From hem i Jos blong Hem, yumi, olsem ol wokman blong Hem, bae yumi givhan long wan ia, semmak olsem we hem i bin mekem. Bambae yumi givhan long nem blong Hem, wetem paoa mo atoriti blong Hem, mo wetem lav blong Hem we i kaen.”1
Mi save se sapos yumi folem kaonsel ia blong givhan, yumi save girap yumiwan; gro long fet, mekem samting yuwan, mo stap glad; mo winim ol tingting blong tingting long yumiwan mo gat filing blong stap yuwan mo tudak we i kam wetem.
Givhan I Jenisim Yumi
Wan gudfala samting abaot wok blong givhan i we i helpem ol narawan, be i jenisim yumi taem i tekem aot ol wari, ol fraet, fraet long nara man, mo gat tu tingting. Fas taem, givim seves long nara man i save tekem aot tingting blong yumi long o problem blong yumi, mo bae i gro mo kam wan samting we i moa hae mo i moa naes. Bae yumi no luk save se, yumi stat blong eksperiensem laet mo pis. Yumi stap kwaet, stap wom, mo gat kamfot. Mo bae yumi luk save glad ia we bae i kam.
Olsem we Presiden Spensa W. Kimball (1895-1985) i eksplenem: “Fulap laef we oli tokbaot long ol skripja i hamas samting long saed blong spirit we i joen tugetawetem ol seves blong yumi long ol nara man mo blong yusum ol talen blong yumi long God mo man.” Hem i talem, “!Yumi kam moa impoten taem yumi givim seves long ol narawan—yes, hem i moa isi blong ‘faenem’ yumiwan from se i gat fulap moa blong faenem!”2
Wan Singaot I Kam Long Masta
Christ and the Fishermen, by J. Kirk Richards
Taem we Sevya i singaotem Pita, Andrew, Jemes, mo Jon blong folem Hem: “Wantaem nomo tufala i livim ol net blong tufala, tufala i biaen long Hem” (Matiu 4:20).
Be afta we Sevya oli karemaot Hem long olgeta long wan fasin we i no stret, oli gobak blong go fising, long wanem oli filim se oli save mekem. Wan taem, Sevya we i bin kasem laef bakegen long ded i kam luk olgeta taem oli stap sakem net be i nogat samting nomo.
“Nao hem i bin talem long olgeta, Ale yufala i sakem net long raet saed blong bot. Bambae yufala i save pulum sam. Ale, oli sakem net i godaon, nao oli no save pulum bakegen, from we i fulap we i fulap gud long ol fis” (Jon 21:6).
Hemia i no blong soem se Hem i no lusum ol paoa blong Hem be i soem wan pikja se olgeta i stap lukluk long rong ples mo stap tingting strong long rong samting. Taem oli kakae fis tugeta long so, Sevya i askem long Pita tri taem sapos hem i lavem Hem. Evri taem wetem fraet, Pita i ansa se yes. Afta long ol ansa blong Pita, Jisas i askem Pita blong fidim ol sipsip blong Hem. (Luk long Jon 21:15–17)
?From wanem nao Sevya i askem Pita tri taem, sapos Pita i lavem Hem? Pita oli bin singaotem hem blong folem Sevya bifo, mo hem i ansa naoia nomo, i lego wok blong hem blong go fising biaen. Be taem we i Jisas i ded, Pita i harem nogud; hem i no save wanem blong mekem. Hem i gobak long wan samting nomo we hem i save mekem—fising. Naoia taem Jisas i wantem Pita blong i harem Hem mo blong i andastanem invitesen blong Hem. Hem i wantem Pita blong andastanem se, wanem nao i minim blong stap olsem wan disaepol blong Kraes we i bin laef bakegen long ded mo naoia Hem bae i nomo stap long saed blong hem long wol ia.
?Wanem Nao Lod i Wantem Long Pita? Hem i wantem Pita blong fidim ol sipsip blong Hem, ol smol sipsip blong Hem Hemia i wan wok we i nid blong oli mekem. Pita i luk save sofsof, daerek kol we i kam long Masta blong hem mo olsem jif Aposol hem i ansa, wetem strong tingting mo i no fraet mo givim ful laef blong hem long ministri we oli givim long hem.
Stat wetem Prea
Yumi gat wan nara jif Aposol long wol tedei. Presiden Nelson i stap invaetem yu mo mi blong fidim sipsip blong Jisas Wetem ol samting i stap raon long yumi mo stap pulum tingting blong yumi mo fulap smol samting i stap karemaot tingting blong yumi, jalenj ia i blong ansa long invitesen ia mo tekem aksen—blong mekem wan samting, mekem wan jenis, mo laef long wan difren wei.
Kwestin blong yu naoia bae i olsem, “?Bae mi stat wea?”
Stat wetem Prea Presiden Nelson i jalenjem yumi blong “pul moa i go bitim wea ples nao yumi stap long hem naoia long saed blong spirit [blong yumi] blong save kasem ol revelesen blong yumiwan.”3 Askem long Papa long Heven wanem nao yu save mekem mo blong huia. Ansa long eni tingting o filing we yu kasem, i no mata sapos i no inaf blong long yu blong mekem. Tekem aksen long hem. Eni smol aksen blong kaen fasin i mekem yumi blong lukluk i go aotsaed mo kasem ol blesing blong olgeta wan. I save fasin blong stap kaen, sendem wan teks i go long wan narawan we ba i mekem hem i sapraes. Ating sam flaoa, sam kuki, o wan kaen toktok. Mebi blong klinim wan garen o yad, wasem klos, wasem trak, katem gras, muvum aot ol sno, o lisin nomo.
Olsem we Sista Jean B. Bingham i talem, “Samtaem yumi ting se yumi mas mekem wan bigfala samting blong ‘kaontem’ se yumi givim seves ia nao long neiba blong yumi. Be yet, ol smol wei blong givim seves i tajem bigwan ol narafala man—mo tu, yumiwan bakegen.”4
Bae yu gat tu tingting blong tekem fas step, be biliv blong yu se yu nogat taem o yu no save mekem wan jenis, be bae yu sek long wanem yu save mekem. Presiden Nelson i soem wan niu mo tabu paten blong seves we bae yu mo mi i givim. Taem yumi ansa, bae yumi faenem aot se hao samting i save kam tru, i fri, mo i kwaet blong yumi mo hao nao yumi save stap blong help long jenis ia mo stap olsem wan kamfot long ol narawan.
Long ol taem olsem, finisim wan ful taem misin, yumi save traem blong talem, “Yes, Mi bin mekem. Letem wan narawan i go givim seves. Mi wantem spel smol.” Be tru fasin blong givhan i no save stop. Hem i pat blong laef. Yumi save tekem spel long aktiviti we yumi stap mekem oltaem mo ol holidei blong spel mo karem bak paoa, be hem i kavenan responsabiliti blong yumi long lavem ol narawan olsem we Hem i lavem yumi mo blong fidim ol sipsip blong Hem i no blong tekem spel.
Ministri blong Jos Raon Long Wol
Foto blong dokta i haggem ol sik man i kam long Wendy Gibbs Keeler
Mi glad bigwan se mi blong wan Jos we i putum wok blong givhan long praktis. Long 2017 hemwan, ol memba oli givim ova long 7 milian aoa blong volontia, blong planem, pikimap,mo serem ol kaekae long olgeta we i pua mo oli stap long nid. Jos i givim klin wota long haf milian pipol mo wiljea long 49,000 pipol long 41 kantri. Ol volontia ia oli provaedem ol glas mo helpem ol pipol we i gat problem wetem ae, oli trenem 97,000 pipol we oli blong lukaotem olgeta we oli gat problem wetem ae long 40 kantri. Teti tri taosen we oli lukaotem mo trenem olgeta blong lukaotem ol mama we oli bonem ol bebi long 38 kantri. I no blong talem ol Han blong Help, tru long wanem hanred blong taosen long ol pipol oli givim milian aoa blong givim seves long ol yia we i pas Ol memba blong Jos blong Jisas Kraes oli kwik blong helpem olgeta we ol disasta i spolem olgeta i no mata oli bigwan ol smol, mo tu blong mekem ol neiba raon, mo komuniti i kam gud moa.
Jos mekem fren JustServe program, we oli putum ol janis blong save givim seves i gat ova long 350,000 volontia we oli registarem olgeta, we oli givim plante aoa blong seves long lokol komuniti blong olgeta.5
Hemia i Jos blong Hem blong aksen. Hemia i wanem yumi mekem. Hemia i wanem yu mekem. Letem hemia i faenemaot tru fasin blong yu.
Tri Kaen Fasin blong givim Seves
Mi laekem blong soem tri bigfala kaen Fasin blong givim seves we yumi wanwan i gat janis blong tek pat long hem.
1. Ol seves we oli givim long yumi o oli invaetem yumi blong mekem i olsem wan responsabiliti blong jos. Bambae yumi trae had long kaen givhan ia we oli laekem tumas, oli no mesarem, wea oli prea from, mo helpem olgeta we oli givim responsabiliti ia long olgeta.
2. Seves we yumi jusum blong mekem yumiwan nomo. Hemia i long wan blong hemia fas wan, we bae i kam nomo olsem ia long evri aksen mo samting yumi mekem olsem blong fogetem yumiwan mo blong go mo helpem ol narawan. I nogat wan asaenmen, be yumi nomo i gat tingting ia blong folem Kraes, statem wetem kaen fasin mo ting baot olgeta we oli stap raon long yu.
3. Pablik Seves Long taem we i stret, traem bes blong yu blong stap long politik wetem wan ae blong seves mo bildimwan man, woman mo komuniti. No joenem long ol politik grup we oli mekem ol man i mekem nogud long olgeta wan, fosem man, mo spolem ol komuniti, kantri, mo ol bigfala kantri. Joenem ol nara man blong politik we oli wantem blong helpem ol man. Yu save kam wan voes blong balens mo risen, mekem evri samting i stret. I gat wan nid we i stap blong yu givhan long hem, paoa blong yu long kaen samting olsem ia.
Yumi Save Jenisim Wol Blong Yumi
Taem yumi ridim ol nius, yumi filim se wol ia i stap jenis. Sapos yumi wanwan i tekem aksen long wan wei we i bigwan o i smol evri dei, yumi save jenisim wol ia yumi wan mo olgeta we i stap raon long yumi. Taem yu givim seves long neiba blong yu mo givim seves wetem ol neiba blong yu,bae yu mekem ol fren we bae olgeta tu i wantem help. Frensip ia bae i kam strong, i bildim ol brij i go long wan strong kalja mo bilif.
Sapos yu ansa long invitesen blong givhan olsem we Jisas i mekem, bae yu jenis, bae yu kam blong fogetem yuwan. Bae yu faenem aot se glad we i kam long wok blong givhan long wei blong Sevya, yu lego biaen ol fraet blong yu mo ol tu tingting blong yu mo samting we i mekem yu ting se i naf ia nao.
Sapos wan nem o wan fes bae i kamkamaot long maen blong yu. Hem i olsem wan invitesen we i kam long spirit, mo sapos yu bin kasem bifo. Pusum han, lukaotem, mo leftemap. Jusum blong ansa long ol invitesen ia, mo prea tedei blong save wanem nao yu save mekem. Taem yu luk mo filim ol blesing i karem yu i go long ol man we yu nid blong givhan long olgeta, mo bae yu wantem mekem hemia i wan paten blong evri dei laef blong yu.
Hae mo bes samting blong yumi winim i blong serem laet, hop, glad mo stamba tingting blong gospel blong Jisas Kraes wetem evri pikinini boe mo gel blong God mo helpem olgeta blong faenem rod i gobak hom. Helpem,givim seves, mo givhan long olgeta i soem gospel we oli putum long aksen. Taem yumi mekem ol samting ia, bae yumi faenem aot se yumi winim, mo hem i hao yumi save faenem pis mo glad we i bin ronwe long yumi.
Hem i hao nao Sevya i laef, hem i from wanem Hem i laef—blong i provaedem gudfala han ia mo hiling paoa tru long bigfala sakrifaes ia we i no save finis, presen blong atonmen blong yu mo mi. Bae yumi folem Kraes ia we stap laef, iven moa gud, taem yumi stap trae had blong kam olsem ol tru disaepol blong Hem tru long wok blong givhan olsem we Hem bae i wantem.