Faenem Glad tru long Kraes Nomata we Mi Kambak Hom Eli long Misin blong mi

Blong go long wan misin hem i had. Be, blong kambak long misin hem i had tu, speseli taem yu kambak eli be i no olsem we oli bin plan from. Yu wari long wanem ol narawan bae i talem o wanem aksen blong olgeta raon long yu.. ?Bae oli jajem yu? ?No glad long yu? ?Stap longwe long yu? Yu wari se yu filim olsem se yu no gud inaf o no strong inaf. Yu stap tingting se sapos wan samting i rong wetem yu o sapos yu mekem wan rong desisen blong go long misin. Mi wari abaot evri samting ia.

Taem mi disaed blong go mekem misinari wok, mi bin glad tumas. Mi bin save se hemia nao wanem we Lod i bin wantem mi blong mekem. Be ol nekis manis ia oli bin ol hapi taem long laef blong mi, mo afta mi gat ol gudfala eksperiens long misinari trening senta, Mi ting se bae ful misin blong mi long Ajentina bae i gohed gud olsem. Be nogat.

Mi traehad wetem ol wari, fraet, mo mi lusum hop long misin blong mi—ol samting we mi bin eksperiensem bifo oli no bitim hemia we mi stap eksperiensem naoia. Misin presiden blong mi i traem evri samting blong helpem mi. Long en, mi disaed blong gobak hom. Desisen ia i bin isi blong mekem tetaem ia, be long haos, evri kwestin antap ia i stat kambak blong spolem mi.

Mi lanem se blong sam taem afta, Sevya i givim tugeta hiling mo lukluk blong kasem help, sapos yu lukaotem tru tugeta samting ia. Mi bilif strong se i gat wan lesen blong lanem long evri eksperiens blong laef, nomata i gud o i nogud. Mo folem taem blong Lod, Hem i bin tijim mi sam impoten lesen we tedei oli spesel long mi.

Go long wan misin i wan raet samting blong mi. Be from sam risen, mi no stap blong 18 manis. God i gat wan nara plan blong mi. Mi stil no save fulwan se laef blong mi i olsem wanem, be mi akseptem. Wanem mi save i we mi stap mekem wanem Hem i wantem mi blong mekem naoia. Long fo manis blong mi long Ajentina, testemoni mo fasin blong mi blong jenis i gro bigwan. Mi bin mitim ol gudfala pipol, mo mi mas tajem laef blong olgeta we Hem i wantem mi blong tajem. Mi nomo gat tu tingting long eksperiens blong mi ia o tingting se bae i defren. Hem i bin wanem we mi nidim mo i kam tabu long mi.

Mi jes ridim nomo toktok blong Elder Neal A. Maxwell (1926–2004) blong Kworom blong Olgeta Twelef Aposol we i putum eksperiens blong mi blong lukluk moa long hem. Hem i talem:

“Laef blong wan . . . i no save gat moa fet mo no tingting tumas. . . .

“Taswe, olsem wanem nao yu mo mi i save muv i go tru long laef, olsem blong talem, ‘Lod, givim mi eksperiens, be i no blong krae, i no blong harem nogud, i no blong harem soa, i no blong go agens, i no blong lusum tras, mo tu i no blong foget. !Kipim mi, Lod long evri eksperiens ia we i mekem Yu kam huia Yu! !Afta letem mi kam mo stap wetem Yu mo serem fulwan Glad blong Yu!’” (“Lest Ye Be Wearied and Faint in Your Minds,” Ensign, May 1991, 88).

Sevya i no bin kam huia Hem i nomata ol hadtaem we Hem i bin fesem. Hem i kam huia Hem from ol hadtaem ia. Oli help blong mekem fasin blong Hem i kam stret gud evriwan, mo oli givim Hem paoa blong save filim glad we Hem i filim naoia. Mi bin filim spesel janis ia blong gat wan eksperiens we i jenisim fasin blong mi. I no bin wanem we mi askem; i no bin wanem we mi wantem; be God i save wanem mi save mekem, mo Hem i wantem mi blong serem Glad blong Hem. Glad ia hem i wan samting we mi no save andastanem sapos mi no save wanem ia krae, harem nogud, soa, mo agens. Blong kambak long haos eli i wan long ol had samting we mi bin go tru long hem, be wetem lukluk mo help blong Sevya, i luk olsem naoia i gat wan smol praes blong pem long wanem mi kasem blong kambak.

So mas gat fet Trastem Sevya blong yu. !Mo gat bigfala hop! Laef bae i neva go stret olsem we yu plan from. Bae i no wan taem we yu ting se bae i no soa o no tingting tumas. Be glad bae i stap afta evri hadtaem. Glad i wanem Hem i wantem blong yu truaot ol taem ia.