Mara Wan Paeonia
Hem we i raet i stap long Texas, USA.
Oktoba 2018, Pno Pen, Kambodia
Mara i batenem sket blong hem mo lukluk long mira. Mi filim i fani we blong were ol klos blong jos long long wan Satedei, be hemia i bin wan spesel Satedei. !Hem i jeneral konfrens!
“?Yufala i glad from sesen blong ol woman?” Mak (mama) i askem. Hem i brasem gud mo kwik hea blong Mara i go daon. “Mi wantem blong yu traem bes blong yu blong lisin gud.”
“!Yes! Mi hop oli talem ol stori blong paeonia!” Mara i laekem tumas blong harem ol stori ia nao.
“Ating bae oli mekem,” Mak i talem. “Yu bin save se papa blong yu i wan paeonia?”
Mara i bin konfius. Papa blong hem i neva pulum wan hankat.
“?Olsem wanem nao hem i wan paeonia?” hem i askem.
Mak i tanem hed blong hem i go long windo, i go stret long reva. “Hem i bin stap huk longwe taem we hem i bin mitim ol misinari. Hem i bin faswan long famli blong hem blong kasem baptaes,” Mak i talem. “Hemia wanem we i mekem hem i kam wan paeonia! Naoia bae yumi go faenem bubuwoman blong yu.”
Yiay (Bubuwoman) i bin stap wet long olgeta long fas rum. Famli blong Mara mo bubuman mo bubuwoman, oli stap tugeta. Yiay i bin help blong lukaotem Mara afta long skul taem we ol paren blong hem oli wok. Nao Yiay i bin stanap long saed blong moto skuta we i karem tufala i go raon long siti.
“Jos i kam long Cambodia blong 25 yia nomo,” Mak i talem long Mara taem we hem i openem doa mo pusum moto ia i go aot long rod. “So yumi evriwan i ol paeonia. Mo yu tu!”
“?Olsem wanem nao mi mi wan paeonia?” Mara i stap tingting taem hem i go antap long moto ia. Mak i draevem moto skuta ia, wetem Yiay biaen mo Mara long medel. Mara i hang strong taem we oli stap ron i kamdaon mo tanem olbaot long ol rod ia we i fulap.
Taem oli pasem wan smol café (kafe), smel blong ti i kavremap olgeta. Kolosap evriwan long ples ia i dring ti. Be Mara i no dring ti. Hem i kipim Tok blong Waes. Mara i smael. !Hemia wan wei we i soem se hem i wan paeonia!
Taem moto skuta i tanem long kona, Mara i bin luk wan wat, wan tempol blong Buddha. Wan red ruf we i poen i go moa antap bitim ol nara bilding. Ol man we i biliv long Buddha oli sevem hed blong olgeta mo werem ol kaliko we i orenj mo oli sidaon mo stap stadi aotsaed long yad.
Mara i bin save se plante pipol long Kambodia oli biliv long Buddha. Oli no biliv long Jisas Kraes. Be Mara hem i biliv long Jisas Kraes. “Hemia wan nara wei, mi mi wan paeonia,” Mara i tingting olsem. !Mo tedei bae hem i mekem blong save lisin long profet!
Taem moto skuta ia i taem i go long ples blong paking blong Jos, Mara i luk plante woman i stap kam. Sam oli wokbaot o kam long ol moto skuta. Ol narawan oli kam long tuk tuk, ol kat we moto i pulum. Plante woman oli werem ol dres o simpol sket, olsem Mara. Mo sam oli werem sampot, naesfala longfala sket we kaliko blong i gat plante kala long hem.
Mara, Mak, mo Yiay oli sidaon insaed long japel wetem ol narafala woman. Konfrens i bin hapen finis ful wik i pas ia long Sol Lek Siti, Yuta, YSA.w Be naoia ol pipol blong Cambodia oli save luk brodkas ia long Kemir. Mara i toktok long tugeta Inglis mo Kemir long hom, mo hem i lanem tu Franis long skul. Be plante man Cambodia oli jes toktok lanwis Kemir.
Fas spika i no bin talem eni stori abaot ol paeonia. Be afta nambatu spika i bin talem wan stori abaot stap wokbaot stret i go long wan hip blong doti hemia afta skul taem i stap kambak. Oli singaotem “rod blong ol boe,” mo samtaem bae hem i karemaot sus mo wokbaot drae leg nomo. Hem i bin wantem mekem ol had samting blong olsem hem i save kam olsem !wan paeonia! Mara i smael taem hem stap tingting long plante wei hem i bin wan paeonia.
Las spika hem i bin profet. Hem i stanap stret. Mara i go gud klosap blong lisin gud. “Mi invaetem yufala blong ridim Buk blong Momon bitwin naoia mo en blong yia.ia,” hem i talem. “Heven bae i open blong yu. Lod bae i blesem yu.”
Mara i bin save se bae i no isi blong ridim fulwan Buk blong Momon. Hem i lukluk ol woman raon long hem. Olgeta evriwan i bin jusum blong folem Jisas Kraes. Olgeta evriwan i bin kam tunaet blong lisin long profet. Bae hem i folem profet, olsem we oli bin mekem. !Bae hem i kam wan paeonia!