Bae Yumi Prea Kolosap long Tempol
Juan Beltrame
Buenos Aires, Ajentina
Pikja i kam long Allen Garns
Taem boe blong mitufala, Marko, i gat tri yia, hem mo mi i safa long posen kaekae. Marko i kam sik tumas, mekem se ae blong hem i tudak. Waef blong mi, Marianela, mo mi, i tekem hem kwik i go long hospital. Taem mifala i kasem longwe, i olsem se hem i ded finis. Nao, afta samples fo aoa, hem i wekap bakegen.
Stat long tetaem ia i go, Marko i stat blong gat bodi i seksek wanwan taem, blong samples faef yia. Taem mitufala i stap tekem hem i go long bed evri naet, mitufala i i stap askem mitufala sapos, long medelnaet, bae mitufala i mas tekem hem i go long hospital o no. Mitufala i no save slip gud long ol yia ia blong hadtaem, mo mitufala i dipen long prea, fet, fasin blong livim kaekae, mo ol prishud blesing.
Taem Marko i gat sikis yia, Marianela i ringim mi long wok mo talem blong hariap go long hospital. Bodi blong Marko i seksek bakegen mo i stap long koma. Taem hem i ring, mi stap wok blong mekem Ajentina Misinari Trening Senta, we i stap kolosap long Buenos Aires Ajentina Tempol.
Bifo mi aot blong go long hospital, wan fren we mi stap wok wetem, i talem: “Yumitu stap kolosap long haos blong Lod finis, ?bae yumitu prea tugeta fastaem?” Tempol i klos blong oli mekem i kam niu mo bigwan, be mitufala i go go kolosap long haos blong Lod, mo mi bin prea from Marko.
Nomata evri samting we mifala i bin gotru long hem wetem Marko, mi talem tangkyu long God from taem ia we Marianela mo mi i bin gat wetem hem. Taem mi stap prea, mi talem long Papa long Heven se mitufala i bin traem blong stap ol gud papa mo mama, mo mitufala i bin tekem gud kea long Marko folem bes wei we mitufala i save. Mi talem long hem tu se bae mitufala i akseptem tingting blong Hem sapos Hem i singaotem Marko i gobak hom.
Taem mi kasem hospital, mi no bin save se bae Marko i laef afta long koma ia, o, sapos hem i wekap, bae hem i save wokbaot o toktok bakegen o nogat. Afta we hem i stap blong tu aoa, hem i wekap. Hem i bin taet tumas, be hem i oraet i stap. Stat long taem ia, olsem merikel, hem i stap kam oraet. Long en, Marko i nomo tekem meresin mo oli letem hem i aot long hospital i gobak long haos.
Marianela mo mi i lukbak long hadtaem ia, mo talem tangkyu se mitufala i gat Marko yet, mo talem tangkyu from ol samting we mitufala i bin lanem. Tes ia i mekem mitufala i wan, mo strong moa long saed blong spirit. Sapos i no gat hemia, maet bae mitufala i no lanem blong luksave ol plante rod we Lod i stap soem han blong Hem long laef blong yumi.
Olsem we Marianela i talem: “Mitufala i luk wan hil blong ol pruf mo ol eksperiens we i bin givim yumi wan testemoni se God i stap, se Hem i stap wetem yumi, mo Hem i stap lisin long yumi. Sapos yumi stap strong mo save wet longtaem, ol blesing oli save kam taem yumi no ting long hem nating.”