?Olsem Wanem Nao Yumi Save Sastenem Ol Lida Blong Yumi?
Long ol dei blong krae we afta we waelfaea i bonem ful komuniti long Kalifonia Sonoma Kaonti long Oktoba 2017, Elda Ronald A. Rasband blong Kworom blong Olgeta Twelef Aposol i travel i go ol komuniti we faea i bonem blong stap wetem ol Lata‑dei Sents.
Hem i stap long wan misin long wok blong givhan. Hem mo Sista Melanie Rasband i givim kamfot long olgeta memba we oli safa long taem blong faea insaed long ol miting haos blong olgeta mo long ol kona blong ol hom blong olgeta.
Mo eni ples hem i go long hem, ol memba oli kam mo oli sekem han blong hem. Hem i wan fasin blong talem tangkyu. Oli talem tangkyu long Aposol from sapot blong hem. Be evri sekhan hem i semmak mesej blong toktok ia: “Mi sastenem yu.”
Wan Aksen blong Fet
Elda Gary E. Steveson i talem, blong sastenem hem i wan tabu aksen we i joen wetem membasip blong Jos i go long ol Jos lida. Wetem moa bitim 16 milian memba blong Jos blong Jisas Kraes blong ol Lata‑dei Sent, bae i gat sam memba blong Jos nomo bae i toktok fes tu fes wetem wan Aposol o bae i sekhan wetem wan Aposol. Presiden M. Russell Ballard, Akting Presiden blong Kworom blong Olgeta Twelef Aposol i talem, be evri memba i gat janis ia blong mekem wan koneksen blong hemwan wetem olgeta mo ol nara Jos lida tru long ol sastening vot blong olgeta mo evri dei sastening aksen.
“Yumi sastenem taem yumi putum han blong yumi i go antap mo tu wetem hat mo aksen blong yumi “Yumi sastenem ol Jos lida long semmak wei we yumi sastenem yumi wanwan. Yumi save se oli fasem yumi long kavenan.”
Elda Ulisses Soares i talem, prea from wan Aposol i wan impoten pat blong sastenem olgeta. “Yumi ol nomol man, mo Lod i singaotem mifala long wan samting we i moa bitim long wanem mifala i save mekem. Be mifala i filim se mifala i save mekem ol samting from yufala i stap prea from mifala.”
Fet i kam fastaem mo sastening i kam afta, Elda Soares i ademap. “Taem yu sastenem ol Aposol, yu stap helpem Sevya blong i winim wok blong Hem. Fet blong yu i helpem Lod blong winim wanem Hem i talem tru long ol profet blong Hem mo ol reveleta.”
Elda Jeffery R. Holland i talem, “mi laekem taem oli putum han andatap [sastening vot] mo mining we i stap biaen long hem. Long ol Aposol, we ol memba blong Jos oli sastenem olgeta i semmak nomo taem oli stap kasem kakae long saed blong spirit, hem i ademap. “Tingting mo voes blong evriwan oli kaontem mo evri man we i wantem help blong givim seves bae oli letem olgeta. I nogat wan man we i givim seves hemwan long Jos, long wanem koling we yumi gat.”
Wan Longtaem Praktis
Blong sastenem ol Aposol hem i wan praktis we i go long taem we oli Putumbak gospel blong Jisas Kraes. Long taem we Jos i jes stat, ol eli Sent oli invaetem olgeta blong agri long koling blong ol lida blong Jos mo blong sastenem olgeta.
Long 6 Epril, 1830, Josef Smit mo ol pipol we oli jes baptaes oli kam tugeta long smol fam haos we hem i blong Pita Witma Senia, long Faytee, Seneka Kaonti, Niu Yok.
Josef i stanap mo askem olgeta we oli stap long taem ia se spos oli wantem Jos blong Jisas Kraes blong Ol Lata-dei Sent bae i stanap.
Blong praktisim prinsipol blong ful sapot, ol niufala memba ia i putum han antap mo agri long vot. Afta oli agri blong akseptem Josef Smit mo Oliva Kaodri olsem ol tija blong olgeta mo ol advaesa long saed blong spirit.
Elda Holland i talem, “membasip insaed long Jos hem i wan samting blong yuwan. Wanwan man, woman oli kaontem olgeta. Hemia from wanem yumi wok long prinsipol blong givim ful sapot. Yumi wantem evriwan blong gat wan tingting, blong save talemaot tingting blong hemwan, mo blong stap wan blong muv i go fored.”
Wan Aksen We Bae I Leftemap Yumi Evriwan.
Elda Dale G. Renlund i talem, taem yumi akseptem koling ia long tabu rol ia, ol memba blong Kworom blong Olgeta Twelef Aposol “oli mas” folem wanem nao Lod i wantem blong oli mekem. Blong jusum blong sastenem Olgeta Twelef, ol memba oli soem sapot blong olgeta long wanwan long ol Aposol ia blong obei long Sevya.
Elda Cook i talem, ol Lata‑dei Sent we oli givim ol sastening vot blong olgeta i go wanwan long ol Aposol ia semtaem oli stap mekem Kworom ia i kam strong.
Tabu vot ia i leftemap mo i blesem ol Aposol ia—be i Leftemap olgeta we oli sastenem olgeta tu, Elda Cook i ademap. “I givim paoa mo i blesem olgeta mo i soem rod long olgeta.”
Hemia i minim se olsem ol memba blong Santa Rosa we faea i spolem olgeta oli givim sapot blong olgeta i go long Elda Rasband, ol memba raon long wol i save kam antap spos oli leftemap Olgeta Twelef ia.