Ol Eksampol blong Fet
Iona Wikaira
Kaikohe, Niu Silan
Iona i laekem spot ya waka ama—hem i lanwis blong Niu Silan we blong pul long ol bigfala kenu. Iona i laekem blong pul long Kenu blong save stap long wota, blong karemaot ol presa blong wok
Iven hem i fesem ol jalenj olsem wan koreksen ofisa, Iona i faenem paoa mo stap kwaet tru long fet long Jisas Kraes.
Christina Smith, HEM we I tekem foto
Mi wok olsem koreksen ofisa blong seven yia. Mi wok long prisen blong ol woman blong wan yia; afta oli muvum mi i go long prisen blong ol man we mi wok blong sikis yia.
Wan long ol stori we i tajem mi long taem blong mi olsem wan koreksen ofisa i we mi lukluk wan mama i joenem bak ol pikinini blong hem. Hem i no luk ol pikinini blong hem fo o faef yia. Yu save luk long ol ae blong pikinini blong hem ol wota blong ae i ron mo harem nogud from ol yia we oli no stap tugeta. Kambak tugeta ia i gud tumas, be olsem wan koreksen ofisa yu no mas soem ol filing blong yu. Mi faenem i had tumas. Mi mas tanem mi mo lukluk i go lo wan nara ples blong ronemaot ol filing ia. Olsem wan mama miwan, Mi no save hao nao bae mi stap longwe long ol pikinini blong mi blong plante yia mo blong no save luk olgeta, toktok long olgeta, o iven serem ol filing blong mi long olgeta.
Olsem wan koreksen ofisa, yu mas strong. Yu mas protektem yuwan mo blong save tekem kontrol. Samtaem ol samting i save kam moa nogud, mekem se yu mas strong taem yu toktok wetem ol narawan. Speseli taem yu toktok long ol prisena mo traem blong stretem ol jalenj mo samtaem ol taem we i nogud tumas. Hemia bae i mekem se sam pipol i ting se mi strong, wan woman we i strong tumas, be mi no olsem ia evri taem.
Long wok mi filim se wol i stap raon long mi, be taem mi lego wok mo mi stap long haos o jos, Mi filim i difren from se mi filim spirit. Wan long ol glad blong stap folem gospel i blong yu no stap long wol. Yu stap long wol, be yu no nid blong stap wetem ful wol.
Mi laekem tumas taem i kam long Sandei from se mi save go long jos mo karem kakae long saed blong spirit mo tingbaot Lod mo Sevya, Jisas Kraes blong yumi. Mi laekem se mi save gat hemia blong miwan. Mi glad blong givim seves i go long Jos mo evri samting we gospel i stap mekem blong yumi.
Long wan taem, mi bin blong wol, mo lanem fulap had lesen. Mi glad tumas we mi save kam long jos long tugeta leg blong mi long gospel blong Jisas Kraes. Mi wantem tumas se evri man long wok ples, blong oli save filim glad we mi filim olsem wan memba blong Jos.
Mi faenem aot se taem ol man we yu wok wetem oli save se yu wan memba blong Jos , bae oli gat respek long yu mo long Jos taem oli luk se yu no putum ol standet blong yu daon from nomo long ples we yu stap long hem. Hem i from wanem i impoten long mi blong traem blong stap olsem wan gudfala eksampol blong wan Lata‑dei Sent.
Long wanwan samting we i tekem ples, Mi ting se, “?Hao nao bae Sevya i wantem mi blong mi mekem?” o “?Hao nao bae Hem i wantem mi blong stretem problem ia?” Long ol eksperiens blong mi, bae mi traem blong mekem sua se ol aksen blong mi i soem wanem bae Sevya i mekem. Hemia bae i helpem mi blong mekem samting i fea mo mekem samting i kam kwaet iven sapos ol samting raon long ples blong wok i fasfas.
Mi glad tumas long Sevya mo Papa long Heven blong mi from ol jalenj mo ol hadtaem we mi save winim , blong gat fet mo blong biliv long Tufala. Evri taem mi stap go tru long ol hadtaem mo mi talem wan prea,mi filim pis long hat blong mi. Mi save se mi no save laef sapos Tufala i no stap. Mi talem tangkyu long ol han blong Olgeta long evri samting mi mekem.