Wan Promes I Go long Wan Pikinini
Lluvia Paredes Cabrera
Yukatán, Meksiko
Droing i kam long Pascal Campion
Samfala yia i pas, bigfala sista blong mi i sik bigwan long tingting blong hem. Wan samting nomo we mi save tingting long hem i we hem i besfren blong mi mo ol pikinini blong hem. Mitufala i stap go wokbaot long ol wiken, we mi bin laekem. Wetem taem, mitufala i nomo stap wokbaot tumas, gogo, i go wanwan taem nomo. Mi stat blong misim fren blong mi mo famli blong hem. Afta long hemia, mi bin lanem se mitufala i nomo wokbaot tumas from fren blong mi mo famli blong hem oli statem wan praktis we oli bin stopem plante yia bifo—stap go long jos.
Wan dei, oli bin invaetem mi blong go kakae long lunj. Taem mi luk olgeta, mi harem mi hapi tumas. Mi talem long olgeta se mi misim olgeta. Fren blong gel blong fren blong mi, we i gat sikis yia, i talem se bae yumi stretem problem ia sapos mifala evriwan i go long jos tugeta. So hem i no tingting tu taem, hem i invaetem mi blong go wetem hem.
!O no! ?Olsem wanem bae mi mekem famli ia i andastanem se, blong go long jos, i stret long olgeta, be mi no laekem nating? Mi no bin go long Jos blong plante yia, ?be hao bae mi talem no long wan pikinini? Mi talem se bae mi go, be trutok i we, mi no gat tingting blong kipim promes ia.
Long Sandei ia, mi go kakae brekfas wetem papa blong mi. Mobaelfon blong mi i wokem ring, i talem long mi se mi bin promesem wan smol gel se bae mi go long Jos wetem hem. Mi no lisin long mobaelfon gogo kasem taem papa blong mi i askem se from wanem mi no ansa. Mi talem se oli bin invaetem mi blong go long wan miting blong Jos, be mi no bin wantem go. Hem i smael mo talem: “Lluvia, neva mekem wan promes long wan pikinini sapos yu no wantem mekem folem promes ia.” Mi disaed se bae mi kipim promes blong mi.
Taem mi kasem jos, mi filim wan samting i defren, wan samting we mi no save tokbaot. Mi stil no save eksplenem se i hapen olsem wanem, be long Sandei afta, mi go bakegen, mo long nekiswan mo long nekis Sandei bakegen, kasem taem mi bin andastanem wanem ia we mi stap filim: Tabu Spirit.
Ol memba blong Jos oli stat blong mekem mi mi filim se mi stap hom. Mi no gat tu tingting, mi wantem save abaot Jos. Mi stat blong mit wetem ol misinari, mo tu, mi stat blong kasem wan testemoni. Visit blong ol misinari oli kam moa plante, mo save blong mi long gospel i bin gro kasem taem mi filim bigwan blong wantem kasem baptaes. Mi kasem baptaes smol taem afta, mo naoia mi glad long ol blesing blong gospel. From hemia, mi glad tumas se mi kipim promes blong mi long wan gel blong sikis yia.