“?Bae Yu Kam long Baptaes blong Mi?”
Hem we i raet i stap long Kent, Inglan, mo Yuta, YSA.
!Oliva i wantem singaot strong antap long ruf blong haos blong ful Inglan i harem!
“Yu yu wan yang man nomo, be i nogud yu letem ol man oli luklukdaon long yu from samting ya. Oltaem yu mas soemaot gudfala eksampol long ol Kristin man” (Fas Timoti 4:12).
Oliva hem i no save wet blong wik ia i finis. Nekis wik i wan dei we hem i bin wet from taem hem i bin gat fo yia. Hem i bin stap rere blong kasem baptaes.
!Oliva i bin glad tumas from baptaes blong hem we i mekem se hem i wantem singaot strong antap long ruf blong haos blong ful England i harem! Hem i no save wet blong talem long fren blong hem Dylan long skul.
!Mi no save bilivim! Dei blong baptaes blong mi saye klosap nao,” Oliver i talem. “Bae i gud tumast!”
“Mi ting se ol bebi nomo oli kasem baptaes.” Dylan i luk konfius.
“Ol pikinini oli mas gat 8 yia blong save baptaes insaed long Jos blong Jisas Kraes blong Ol Lata-dei Sent,” Oliver i talem. “Hemia Jos blong mi.”
“I fit wantaem,” Dylan i talem.
Stret afta nomo Oliver i bin tingting. “?Yu laekem blong kam long baptaes blong mi?”
“Sua,” Dylan i talem. “Be mi nidim blong askem papa mo mama blong mi fastaemt.”
“OK!”
Oliver i bin glad tumas we Dylan bae i kam long baptaes blong hem. Hemia i givim hem wan nara tingting. “Mi no wantem serem baptaes blong mi wetem wan fren nomo. !Mi wantem invaetem plante man we mi save invaetem!” Oliver i hariap blong go hom mo talem Mama se hem i gat wan plan.
Long fast Sandei bifo dei blong baptaes blong hem, Oliver i statem plan blong hem. Hem i serem testemoni blong hem long fored blong pulpit; afta hem i talem, “Bae mi baptaes nekis Satedei, !mo mi wantem evriwan blong kam! ?Plis yufala i save invaetem eniwan we yufala i save we i no wan memba, o we i no stap kam long jos, long baptaes blong mi?” Mi filim olsem se mi wan misinari. !Hem i laekem tumas filing ia!
Long nekis wik ia, Oliver i invaetem ol fren, ol famli memba, mo ol tija long baptaes blong hem.
“!Bae i minim wan big samting long mi sapos yu save kam!” hem i talem.
Taem Satedei i stap kam klosap, Oliver i bin stat blong tingting nao se hamas man ia bae oli kam long taem ia. ?Wanem i hapen sapos oli bisi tumas o oli no wantem blong kam?
Hem i mekem wan sot prea se sapos sam man we hem i invaetem ia oli save kam. Afta hem i stop blong wari se huia bae i kam. Hem i save se hem i bin mekem wan gud samting finis blong invaetem olgeta. Mo tu samting we i moa impoten, hem i abaot kasem baptaes.
Taem hem i kasem jos long dei blong baptaes blong hem, Oliver i no save bilivim wetem ol ae blong hem. Plante long ol fren blong hem oli bin stap blong sapotem hem. Hem i bin luk sam hip blong man we hem i no save olgeta. Hem i sakem han blong hem taem hem i luk Dylan i kam insaed wetem papa mo mama blong hem.
Taem i kam long taem blong baptaes, Oliver i bin go insaed long wom wota ia. Papa blong hem i holem han blong hem, olsem we tufala i bin praktisim. Afta hem i talem sotfala prea blong baptaes mo draonem Oliver i go insaed long wota. Bifo hem i save, Oliver i kamaot bakegen long wota—i wetwet mo smael. Hem i save se hem i bin folem eksampol blong Jisas.
Afta Oliver i jenis i go long drae klos, papa blong hem mo sam nara man oli konfemem hem i kam memba blong Jos, mo oli givim hem wan spesel blesing, we oli invaetem hem blong kasem presen ia we i Tabu Spirit. Afta, oli askem hem blong serem testemoni blong hem.
“Tangkyu tumas blong kam sapotem mi long spesel dei ia. Mi wantem tumas blong luk hem bakegen. I minim wan bigfala samting long mi,” Oliver i talem.
Afta long hemia, ol pipol i bin kam antap blong kongratuletem Oliver.
“!Tangkyu blong invaetem mi!” Dylan i talem. “Mi bin gat wan gud filing insaed long mi.”
“!Evriwan oli kaen tumas!” Mama blong Dylan i talem. “Mifala i filim gud taem oli welkamem mifala.”
Long naet ia, Papa i sidaon long en blong bed blong Oliver. “!Hem i wan spesel dei tedei!” Papa i talem.
Oliver i sakem hed blong agri. “Mi glad we mi save serem wetem ol fren blong mi.”