Hemia i Jos blong Hem
I Kam long Elda Taniela B. Wakolo
Blong Olgeta Seventi
“Yufala i mas tekem long yufala nem blong Kraes, we i nem blong mi” (3 Nifae 27:5).
Mi bin bon long Fiji. Papa mo mama blong mi oli no bin memba blong Jos, be tufala i stap go long wan nara jos.
Taem mi kam bigwan, mi bin maredem waef blong mi Anita. Hem i bin wan memba blong Jos blong Jisas Kraes blong Ol Lata-dei Sent. Hem i bin gohed blong invaetem ol misinari blong kam mitim mi.
Wan dei mi bin talem long olgeta se oli save kam dina long nekis tri naet ia. Mi talem long olgeta se oli mas yusum Baebol nomo blong ansarem ol kwestin blong mi. Ol ansa blong olgeta i bin stret gud evriwan. Long nambatri naet, oli bin askem mi wan kwestin.
“?Sapos yu bin gat wan stoa blong kaekae, bae yu singaotem wanem?”
“Bae mi singaotem Wakolo Famli Maket Stoa from hem i stoa blong mi,” mi ansa.
“?Yu ting se bae oli singaotem jos long nem blong Hu?” oli askem.
Hemia i bin wan gudfala kwestin. Mo mi bin save ansa wetem hat mo sol blong mi. Tru Jos bae i mas karem nem blong Jisas from Hem i Jos blong Hem. !Mo Jos blong Jisas Kraes blong Ol Lata-dei Sent i karem nem blong Hem!
Mi gat wan moa kwestin nomo: “?Wanem taem mi save kasem baptaes?” Wan wik afta, mi bin baptaes.
Taem mi kasem baptaes, mi bin tekem long mi nem blong Jisas Kraes. I minim se mi bin kam wan memba blong Jos blong Hem mo promes blong folem Hem. Mi traem bes blong mi evri dei blong laef olsem Hem. Mi save se hemia hem i tru Jos blong Jisa Kraes.