!Alo i kam long Kambodia!
Alo, Mi mi Paolo. Mo hemia hem i Margo.
Mitufala i stap visitim Kambodia. !Hemia wanem we mitufala i lanem!
Kambodia i wan kantri long Saotis Esia. Kolosap 15 milian pipol i stap longwe, wetem kolosap 14,000 Jos memba.
Hemia wan Buk blong Momon blong Kambodia. Lanwis blong Kambodia oli singaotem Khmer (Ke-mi). Ol alfabet blong olgeta i gat 74 leta—oli gat moa alfabet bitim eniwan long wol.
Ol Jos memba ia oli stap talem alo long olgeta wanwan long kastom fasin blong olgeta we oli singaotem sampeah. Moa yu leftemap han blong yu, i soem moa respek we yu gat.
Plante long ol pikinini blong Kambodia oli go long skul mo jos long moto wetem wan mama o papa. O oli save tekem wan tuk tuk—wan kat we moto i pulum.
Plante long ol kaekae blong Kambodia, oli yusum prahok, wan konkon sos blong fis. Ol Jos memba ia i bin mekem wan bigfala sospen sup blong kakae tugeta long stek senta afta wanwan sesen blong konfrens.
Plante pikinini blong Praemeri long Kambodia oli ol pikinini ia nomo we oli Kristian long skul blong olgeta. Hemia from plante pipol long Kambodia oli praktisim wan relijin we oli singaotem Budis. Relijin ia blong olgeta, i tijim olgeta blong stap ones, gat pis, mo waes. Hemia wan Budis aedol long Kambodia we pipol truaot long wol i stap visitim.
Las yia Presiden Nelson i bin anaonsem se fas tempol blong Kambodia bae oli bildim long Phnom Penh, !kapitol siti! Tempol ia bae i helpem ol famli olsem hemia blong oli sil tugeta blong oltaem.
Tangkyu blong wokbaot long Kambodia wetem mifala. !Lukim yu nekis taem!