Stap prea wetem Filip
Woman we i raetem hemia i stap long Kalifonia, YSA.
?Hem i minim wanem blong “talem gres”?
“Pea oltaem” (Doktrin mo Ol Kavenan 19:38).
Hem i fas taem blong Josef blong go long haos blong Filip. Tufala i bin gat wan gud taem blong bildim wan plen blong spes wetem katen. Tufala i bin yusum sam naes kala blong kalarem faea we i kamaot long hem. Taem mama blong Filip i singaotem tufala blong go kakae dina, Josef i folem Filip i go long kitjin.
“Bae mi talem gres,” papa blong Filip i talem.
?Hemia i minim wanem? Josef i stap tingting nao. Hem i stap lukluk Filip mo famli blong hem taem we oli stap tajem fored blong hed blong olgeta, afta long medel blong jes, afta long lef saed, afta long raet saed. Josef i neva luk wan samting olsem bifo.
Filip i putumaot han blong hem. Josef i lukluk raon mo luk se ol famli blong Filip oli holem han mo benem hed blong olgeta. Oli rere blong prea ia? Hemia nao wanem oli minim blong “talem gres”? Josef i stap tingting.
Josef i no wantem mekem Filip i harem nogud, mekem se hem i holem han blong Filip. Papa blong Filip i holem nara han blong Josef mo afta i statem blong prea.
“Blesem mifala, O Lod …”
Bifo oli sidaon, Filip mo famli blong hem i tajem fored blong hed mo jes blong olgeta olsem we oli bin mekem fastaem.
Taem we Josef i go hom, Mama i askem olsem wanem long dei blong hem.
“?Yu bin gat wan gud taem?” Mama i askem.
“Yes,” Josef i talem kwaet nomo. Hem i bin gat wan gud taem. Plen blong spes ia i naes, mo ol hambega i yami. Be wan samting i stap mekem hem i wari.
Mama i lukluk hem moa kolosap. “Yu saon olsem se yu no oraet. ?Wan samting i rong?”
“Yes …”
!Josef i bin gat plante kwestin! Hem i bin stap tingting long prea ia. ?From wanem i defren long wei we hem mo famli blong hem i stap prea?
“Mama,” hem i askem, “fastaem yu bin prea olsem wanem bifo yu joenem Jos?” Josef i bin talem long hem abaot prea blong famli blong Filip.
“Long wei we yu talem i luk olsem se oli Katolik, olsem mi bifo,” Mama i talem. “Oli stap mekem saen blong kros wetem ol han blong olgeta. ?Yu luk olsem wanem i mekem saen blong wan kros? I rimaenem se Jisas i bin ded from yumi.”
Josef i smael. “So Filip i bilivim Jisas tu?”
“Yes,” Mama i talem. “?Yu tingbaot wanem we papa blong Filip i talem long prea?”
Josef i mas tingbaot bakegen. “Hem i talem tangkyu long God from ol presen we Hem i bin givim long yumi … mo hem i tokbaot Kraes!”
“?Yu luk?” Mama i talem wetem wan smael. “Mifala i no defren nating. Mi glad se yu save prea wetem famli blong Filip.”
Sam dei afta, Filip i kam blong pleple. Tufala i stap pleple aotsaed taem we papa i singaotem olgeta blong dina. Bel blong Josef i mekem noes taem tufala i ron i go insaed long kitjin.
“Mi hanggri!” Josef i talem.
“Mi tu,” Filip i talem.
Evriwan i gat ples raon long tebol. Filip i sidaon kolosap long Josef. Filip i mekem saen blong kros mo holem han blong Josef.
“Hemia olsem wanem mifala i prea long haos blong mifala,” Josef i talem. “Mifala i foldem ol han blong mifala, sarem ol ae blong mifala, benem hed, mo prea.”
“?Hemia nomo?”
“Hemia nomo.”
“I isi,” Filip i talem.
Josef i sarem ae blong hem mo i smael. Hem i bin glad we hem i save prea wetem fren blong hem.
Mi gat ol fren long skul we oli Katolik mo Muslim, mo mifala ol bes fren from hem i olsem nao we Jisas i wantem yumi blong tritim yumi wanwan.
Elizibeth A., 8 yia, West Midlands, Inglan