Taem we Fasin blong Hang Strong long Samting I Mekem Yu Harem I Soa

Wan hot dei blong manis Julae, mi bin helpem tawi blong mi blong bildim wan wol. Projek ia i putum mi agensem ol rus blong wan jeri tri we i stap givim flaoa, we i stap long rod blong mi.

Mi tingting long miwan: “Bae i isi.”

Mi karem ol tul we mi nidim, mo digim raon long ol rus blong mekem rum blong wok. Afta, mi holem wan so, mo mi no tingting tu taem, i go wok blong katem ol rus ia. Ol smol rus, mi katem isi, be taem mi muv i go long ol bigfala rus, kwiktaem mi luksave se bae i no isi tumas. Wan rus ia, i strong tumas.

Mi kakae tut blong mi, be mi gat strong tingting blong katemaot rus ia. Swet i ron long fes i kam daon long nek andanit long hot san antap long hed taem mi stap holem strong so ia. So ia i seksek gogo kasem taem ful bodi blong mi i seksek wetem. Mi save filim raet han blong mi—hemia we i skwisim baten—i stat blong i bon, mo mi harem i soa. Mi no tingting long soa ia mo mi gohed blong holemtaet.

Nao, so i katemaot rus ia. Mi lego baten, mo mi filim glad ia we mi win. Taem mi karemaot hanglav blong mi, mi luk wan smol pis blong skin i bin brok aot long han blong mi.

Taem mi tingting long eksperiens ia, mi luksave se, blong hang strong long so ia, long wan wei, i olsem blong hang strong long aean rel. Oli talem long yumi blong hang strong long aean rel taem yumi stap muv i go tru long laef. Be jes from se yumi stap holem strong, i no minim se bae yumi no gotru long ol taem we yumi harem i soa. Mi kasem kil long han blong mi taem mi bin stap hang strong long so ia. Long wan semmak wei, bae yumi pas tru long ol tes mo ol hadtaem taem yumi stap gohed blong hang strong long aean rel ia.

Papa long Heven i bin save se rod i gobak long Hem bae i fulap long ol denja. Taswe, Hem i bin givim yumi ol skripja mo ol toktok blong ol profet blong helpem yumi. Taem yumi stap hang strong long ol samting ia tru long ol tes mo hadtaem blong yumi long laef long wol ia, bae wan dei, yumi gobak long ples we Hem i stap long Hem.

Taem yumi gobak long Hem, bae yumi lukluk ol han blong yumi, we i bin hang strong long aean rel, samtaem we yumi harem i soa i stap, o harem se i had tumas. Mo yumi save se, wetem help blong Papa long Heven, mo tru long paoa we i pemaot man we i blong Jisas Kraes, yumi bin hang strong moa, i nomata wanem stong yumi fesem.