Faatuatua i Tulaga Uma o le Tomai
E mafai e i tatou uma taitoatasi ona fesoasoani e fausia le malo o le Atua i ni auala tulaga ese ma le mamana.
O tagata taitoatasi i le lalolagi e eseese o latou malosiaga ma vaivaiga, vaega o tomai faapea ma tapulaa. O lenei tusiga o loo faaalia ai tagata e toatolu o le Ekalesia o e o loo nonofo ma tulaga tau-soifua maloloina o loo ta’ua o ni manaoga faapitoa. O a latou galuega lelei e faamaonia ai e faapea, aemaise lava pe a oo i le mulimuli i le Faaola, e mautinoa lava lo latou mafai—ona fesoasoani e fausia Lona malo, mafai ona faia se eseesega, ma mafai ona faia se faataitaiga mo isi e mulimuli ai.
Auauna atu ma le Alofa
O Peresitene Juan Medina o loo auauna atu o se peresitene o le paranesi mo le taimi lona lua, ae o lenei aafiaga e ese teisi. O le taimi lea, na te le mafai ona vaai ia i latou o loo ia auauna atu i ai. “Na faasolosolo lava ina leiloa laʻu vaai, ae leʻi leiloa le agavaa e auauna atu lea na ofoina mai pea e le Alii ia te aʻu” o le saunoaga lea a Peresitene Medina mai lona fale i Sonora, Mekisiko. “O le mafai ona auauna atu i ou uso ma tuafafine o se avanoa le au maua.”
I le taimi o le faamai oti o le KOVITI-19, sa valaau ai e Peresitene Medina tagata taitasi o lana paranesi e vaai pe na a mai. Sa ia fai mai e le gata ina fesoasoani atu lenei mea i isi ae na fesoasoani foi ia te ia ia faaitiitia lagona o le le mautonu ma le faanoanoa. “E ala atu i auaunaga, pe na auauna mai se tasi ia te au po o ou auauna atu i isi, ina ia ou iloa le alofa moni o Keriso.”
Fai mai Peresitene Medina e fiafia tele o ia e galulue ma tagata fou faatoa papatiso. “E mafai ona e vaai i se eseesega manino i le va o o latou olaga a o lei papatiso ma le maea ai o le papatisoga,” na ia saunoa ai. “Ua suia i latou i le alofa.”
Ina ua fesiligia e uiga i luitau sa feagai ma ia, sa lei taua e Peresitene Medina lana vaai e faaletonu. Nai lo lena, o ana faamatalaga e taulai atu i tagata o e o loo misi mai le sauniga faamanatuga i vaiaso taitasi ma le auala e manao o ia latou te iloa ai le tele o mea ua latou misia.
“O le faamanuiaga sili ua ou mauaina, ua suia lou olaga e ala i le talalelei,” o lana tala lea. “O le tauaso e le suia ai lena mea.”
Aumaia o le Faitau Selau i le Malumalu
Ata o le Malumalu o Los Angeles Kalefonia na pueina e Jamie Dale Johnson
E i ai nai nofoaga e sili atu ia Heather Nilsson ona i ai nai lo le malumalu.
“O se nofoaga matagofie tele aua o le maota moni lava o le Alii,” o lana tala lea. O le Malumalu o Los Angeles Kalefonia e faapitoa lava le pele ia te ia ona o le mea sa ia auauna ai i se misiona. O le tele o galuega o sauniga sa ia faamaeaina iina e mo tagata o lona lava aiga.
Heather Nilsson
“Sa lei mafai ona ou feiloai i lou tamamatua, ae sa ou faamasani ia te ia i le malumalu,” o lana tala lea.
O le ola ai ma le supa o le faiai ua mafai ai ona tele vaega o le olaga e faigata ona fai. Fai mai Sister Nilsson sa ia lagona le lotovaivai i nisi o taimi e uiga i mea e taofia o ia mai le faia ona o lenei ma’i, e pei o le aveina o se taavale po o le tamoe saoasaoa atu faataamilo i le poloka. Ae o lona faalagolago i le fuafuaga a le Atua, e maua ai e ia se faamoemoe mamana atu nai lo le faanoanoa. Na te manatuaina lelei lava le aso na ia faatoa aoao ai e uiga i le Toetu. Sa ono ona tausaga i lena taimi ma sa vaetamaina o ia e se aiga o le Au Paia o Aso e Gata Ai.
“O mea e le mafai ona ou faia nei o le a mafai ona ou faia mulimuli ane ona o le Togiola a Iesu Keriso,” sa ia molimau mai ai.
O le taimi nei, o loo faaauau pea ona fesoasoani Sister Nilsson i le Atua e laveai agaga i le faaaogaina o lana taleni mo le galuega o talafaasolopito o aiga. Sa ia sailiili ma fesoasoani e faamaea ia sauniga mo le faitau selau o tagata i lona aiga na vaetamaina i ai o ia ma lona aiga na fanau mai ai. A oo mai aso faigata, na te faitauina lona faamanuiaga faapeteriaka. Na te faafouina lona faatuatua ma faamanatu atu ia te ia e vaai i luitau o loo i ai nei i se vaaiga e faavavau.
Fai mai Sister Nilsson, o le a ia faamoemoe ia iloa e tagata uma o e faitauina lenei tusiga le tele o lo latou alolofa i ai. “Afai e i ai se savali se tasi ou te fia faasoa atu, e le o tuua na o oe, tusa lava pe e te lagonaina i nisi taimi. E alofa le Tama Faalelagi ia te oe. O oe o Lona atalii/afafine.”
Faasalalauina o le Lototele ma le Faamalosiauga
A o amata ona tulimatai atu Bridger Pons e fesoasoani e faamanuia le faamanatuga, sa i ai foi se mea sa ia fefe i ai: faitauina ma le taulotoina o tatalo o le faamanatuga. E maua Bridger i le dyslexia, o se manaoga faapitoa e aafia ai le auala e aoao ai lea e faigata ai ona faitau ma sipela.
“Sa ou matua galue malosi ina ia avea ma se tagata e lelei le faitau, ae ou te popole lava pe a ou faitau leotele i luma o se faapotopotoga,” o le tala lea a Bridger. “Pe a ou popole, ou te faia ni mea sese, lea e atili ai ona ou popole.”
Bridger Pons
O lea na lolomi ai e Bridger ma lona tina se vaega o tatalo o le faamanatuga lea na faigofie ona faitau i ai. E faaaoga ai mataitusi tetele ma na tuueseeseina i ni fuaitau pupuu. Ina ua mavae le tele o faataitaiga, sa mafai ona ia taulotoina ia tatalo e aunoa ma ni mea sese.
“O le mafai ona faatoilaloina le luitau o le faitau i luma o se vaega toatele atonu e le o se mea e taua i le toatele o tagata, ae mo au e taua,” o le tala lea a Bridger.
O lana taumafaiga faaopoopo na iu ina faamanuiaina ai isi i auala e lei faamoemoeina. Ina ua maea le sauniga, sa o mai nisi o tagata o le uarota ia te ia ma faapea mai, o lona tautala lemu fuafuaina, na fesoasoani ia i latou e taulai atu i le Agaga i le taimi o na tatalo paia. E le gata i lea, a o fesoasoani i taitai ia malamalama i ona luitau, sa iloa ai e Bridger o loo manaomia foi e isi alii talavou i le siteki se fesoasoani faapena. O le fefe e faitau sa aafia ai lo latou auai i le Ekalesia ma lo latou lototoa i le saunia mo le galuega faafaifeautalai. Ua faasoa mai nei e aiga o Pons le faitauina o punaoa ma isi i soo se taimi e mafai ai.
Fai mai Bridger na te faamoemoe ia tele atu tagata o le a iloa o le lelei o le faitau a se tagata e le atagia ai lo latou tulaga o le atamai. Sa ia faasoa mai foi upu nei o le faamalosiauga mo i latou o e na faitauina luitau e pei ona ia faia: “E le o tuua na o oe. Ma o oe o se tagata atamai.”
Fausiaina Faatasi o Siona
Ua aoao mai e tusitusiga paia ua tuuina atu i tagata uma se meaalofa faaleagaga mai le Atua (tagai Mataupu Faavae ma Feagaiga 46:11). E aofia ai tagata o tulaga gafatia uma. Mo se faataitaiga, atonu o le a i ai se aso o le a tatou aoao ai e uiga i tatalo le leoa a o tatou uso ma tuafafine o e e le mafai ona tautatala e ofo mo i tatou po o se vaega faaopoopo o le Agaga sa latou valaauliaina i totonu o o tatou aiga.
Ua tatou maua le avanoa e faaauau ai le fausia faatasi o Siona, saofaga atu i soo se tomai tatou te ofoina atu. Seiloga lava ua aofia ai ma talisapaia ia tagata uma , o le a atoatoa lo tatou aiga i le Ekalesia.