O Tulaga Faamatua Faamaoni i Aso Nei i se Lalolagi Fesuisuiai
E alala le tusitala i Ausetalia Sisifo, Ausetalia.
E mafai ona e maua se uunaiga mamana i lau fanau, e tusa lava po o le a le mea e aoaoina ai i latou e le sosaiete.
Ata na tusia e Scott Davis
O lou lava olaga faa-tamaitiiti o se molimau o se faatosinaga mamana a se tagata matua Kerisiano e mafai ona i ai i le olaga o se tamaitiiti. Na maliu lo’u tina i le fa o ou tausaga, ma sa fesoasoani lou tinamatua e tausia au ma nai ou tei. Sa auai o ia i le Ekalesia a le Autau o le Faaolataga, ma sa ia aoao i matou ia tatalo, alofa i o matou fili, ma agalelei atu i isi. O lana taitaiga i na tausaga faigata na faataatia ai le faavae mo aʻu filifiliga i le lumanai.
O le taimi nei ua silia ma le 40 tausaga talu ona ou faaaluina o se tina ma tagata tomai faapitoa i le tausiga o tamaiti, ma ua ou vaai i tulaga faatauaina ma tulaga masani o le sosaiete ma atili ai ona tetee i aoaoga a le Faaola. O mea leaga e foliga mai e uunaia ai mea uma i tusi ma musika i gagana o aso taitasi. Ae e le manaomia lo tatou lagonaina o le lofituina. O le a taialaina i tatou e le Alii ia iloa le auala e aoao atu ai, puipuia, ma faamalolosia ai a tatou fanau i lenei ituaiga o aganuu o i ai nei. O lesona patino nei e tolu ua ou aoaoina e mafai foi ona fesoasoani i lo’u aiga.
1. Taulai Atu i Fegalegaleaiga, Ae le nao Tulafono
O loʻu tuputupu aʻe e aunoa ma le “aiga lelei” e avea o se faʻataʻitaʻiga, sa ou masalosalo lava ia te aʻu ma oʻu agavaa a o tausia le ma fanau. O lenei upusii mai ia Elder Jeffrey R. Holland o le Korama a Aposetolo e Toasefululua na faamafanafanaina au: “Afai … o le a e taumafai e alofa i le Atua ma ola i le talalelei mo outou lava; … afai e te taumafai i le mea sili ia avea ma matua sili ona lelei e te mafaia, o le a e faia mea uma e mafai ona faia e se tagata ma mea uma ua finagalo le Atua e te faia.”1 O le faia o le mea sili tatou te mafaia o le a manaomia ai le fesoasoani a le Faaola — ma afai e i ai se taimi o le talafaasolopito e tatau ai i matua ona faalagolago atu ia te Ia, o le taimi nei lava!
Nai lo le popole e uiga i le tele o tulafono ma pe o le a faataunuuina ma le atoatoa e a tatou fanau, e mafai ona tatou taulai atu i le fausiaina o la tatou sootaga ma i latou ma le Faaola. Na saunoa mai lo tatou perofeta pele, o Peresitene Russell M. Nelson, e faapea: “Aua tou te taumafai e pulea a outou fanau. Nai lo lena, faalogo ia i latou, fesoasoani ia i latou e aoao le talalelei, musuia i latou, ma taitai i latou i le ola e faavavau. O outou o sui o le Atua i le tausiga o fanau ua Ia tuuina mai ia te outou. Ia tuu atu Lana faatosinaga paia e tumau i o outou loto a o outou aoao atu ma faatauanau.”2 Mai lou aafiaga, e moni lenei fautuaga.
2. Ia Fiafia Faatasi
O se tasi auala sa ma fausia ai ni fegalegaleaiga ma le ma fanau, e ala lea i gaoioiga faaleaiga. O ni taimi faigofie na, e pei o le alu mo se savaliga po o le ‘aiga o le i’a ma le pateta [fish and chips] i le matafaga. Sa iloa e le ma fanau e moni lava sa ma fiafia e faaalu faatasi le taimi ma i latou.
Sa ma taumafai e faalogologo i le ma fanau ina ia latou lagona le toafimalie e talanoa mai ai ia i maua e uiga i o latou faafitauli. A tulai mai se luitau faaleaiga, matou te nonofo i lalo ma le ma fanau, talanoa i o matou popolega, faalogo i a latou tali, ma taumafai e ‘au faatasi i se faaiuga.
3. Fai se Faataitaiga o le Ola i le Talalelei
Sa le o au o se tagata o le Ekalesia i le taimi na laitiiti ai lau fanau — sa ou faaaluina le 18 tausaga e filifili ai e papatiso — ae o lou toalua o se tagata o le Ekalesia. Sa ia fesoasoani i le ma fanau e fausia se sootaga ma le Tama Faalelagi e ala i tatalo faaleaiga, suesueina o tusitusiga paia, ma afiafi faaleaiga. Sa matou mamao ese mai le atoatoa, ae sa tumau ma onosai lou toalua.
Ou te talitonu o le faataitaiga a lou toalua i le ola ai i le talalelei, o le faatosinaga sili lea mo le ma fanau. Sa latou vaai ia te ia o faitau i tusitusiga paia, tatalo, ma auai i le lotu — e tusa lava pe nao ia lava. O lenei mea sa sili atu ona mamana lenei aafiaga nai lo se isi lava mea sa ma aoao aloaia atu.
E tusa lava pe leai sou siosiomaga lelei faaleaiga, e mafai lava ona e taitaia lau fanau. Aua le lotovaivai.
E Mafai ona Tatou Amata i le Aso
I le avea ai ma matua, o i tatou taitoatasi o le a iu lava ina manaomia ona tuu atu a tatou fanau, ma faalagolago ia i latou e fai a latou lava filifiliga. E faamoemoe o lena taimi, o le a tatou lagona ai le toafimalie i le manatua ai o upu a le Perofeta o Iosefa Samita: “Ou te aoao atu ia i latou ia mataupu faavae sa’o, ona latou pulea lea o i latou lava.”3 E mafai ona tatou amata i le aso ona avea ma se punavai o le taitaiga o le talalelei i a tatou fanau, e tusa lava po o a mea ua aoaoina i le lalolagi o loo siomia ai i tatou.