O Leo o le Au Paia o Aso e Gata Ai
Nofoa Avanoa o Tina
O Aso Sa taitasi i le Aualofa, e nofo ai lava lo’u tina i le nofoaga lava e tasi i le laina pito i luma.
Ata pue o nofoa mai le Getty Images
Sa ma nonofo ma lo’u toalua i le uarota e tasi ma lou tina agelu. O Aso Sa taitasi, i le avea ai ma se tasi o le au peresitene o le Aualofa, sa ou nofo ai i le pito i luma o le potu o le Aualofa, e faasaga i le auuso. E nofo lava lo’u tina i le nofoaga lava e tasi i le laina pito i luma.
Sa ou fiafia e vaavaai atu i lona tali i lesona ma faalogologo i ana faamatalaga. I le mae’a ai o fonotaga taitasi, na te kisi ai i lo’u alafau ma oomi lou lima. Sa ma vavalalata ma lou tina, o lea na nutimomoia ai lou loto ina ua maliu faafuasei o ia.
Ina ua mavae lona falelauasiga, sa tumau pea le vaivai o ou lagona. Ina ua oo i le Aso Sa, sa fesili mai lou toalua pe o le a lelei mea uma mo a’u i le lotu e aunoa ma ia. O Lona valaauga sa masani ai lava ona toesea ai o ia mai le matou uarota.
“O le a lelei mea uma seiloga ou te vaai i le nofoa avanoa o tina,” o la’u tala lea. “Ou te le iloa pe mafai ona ou vaai i lena nofoa gaogao ma taofi ou lagona faanoanoa.”
Na fautua mai lou toalua ou te taumafai e aua nei ou tilotilo atu i le nofoa. Na ou filifili e faia le mea sili ou te mafaia.
Sa lagolagoina ma agaalofa tagata uma i le lotu. Ina ua oo i le taimi ou te alu ai i le Aualofa, sa ou nofo i lou nofoa i le pito i luma o le potu, ae sa ou autilo atu i le fola.
Ae peitai, ina ua amata le lesona, sa le mafai ona taofia lo’u tilotilo atu i le nofoa masani a lou tina. Sa ou faamoemoe e vaai i lona nofoa o gaogao, ae na ou vaai i lo’u uso o auaunaga o nofo i lona tulaga. Sa ataata mai o ia ia te au. Sa ou lagonaina le lotofaafetai mo lona agalelei. Sa mafai ona ou aluese mai le fonotaga e aunoa ma le faatoilaloina e le faavauvau. Ina ua uma le sauniga sa ou faafetai atu ia te ia.
“O le vaaia o le nofoa avanoa o Tina o le mea lea e tasi na ou iloa e le mafai ona ou taulimaina i le aso. Na faapefea ona e iloa?” Sa ou fesili atu ai ia te ia.
“Ina ua ou savali atu ananei i totonu o le potu, sa ou maua se lagona o le vaaia o lona nofoa avanoa o le a faigata mo oe,” sa ia tali mai ai. “O lea sa tonu ai ia te au ou te nofo iina.”
O lenei gaoioiga alofa e sili atu lona taua ia te au nai lo le mea na ia iloaina. Ou te faafetai na ia ogatasi ma le uunaiga a le Agaga. Ou te iloa e oo lava i gaoioiga laiti e mafai ona i ai se aafiaga o le faamalologa ia i latou tatou te auauna atu i ai. Ou te talitonu o le auala lea e finagalo le Faaola tatou te auauna atu ai le tasi i le isi.