Sau, Mulimuli Mai ia te A’u

E faapefea ona faapotopotoina i tatou e le Atua?

37–40 Aperila

Ua poloaiina i tatou e le Faaola ia “tasi.” Na Ia fetalai mai, “Ia tasi outou; ma afai tou te lē tasi e lē a aʼu outou” (Mataupu Faavae ma Feagaiga 38:27). O se tasi auala e avea ai i tatou ia tasi, o le faapotopotoina.

Na aoao mai Peresitene Henry B. Eyring, Fesoasoani Lua i le Au Peresitene Sili: “O loo naunau lo tatou Tama Faalelagi ia faapotopoto ma faamanuia Lona aiga atoa.”¹ O auala nei e tolu e mafai ona tatou faapotopoto ai ma avea ma tagata lotogatasi i le faatuatua.

1. Faapotopotoina i se nofoaga e tasi

I aso popofou o le Toefuataiga, na poloaiina ai e le Atua Lana Au Paia ina ia “faapotopotoina i latou i le mea e tasi … e saunia ai o latou loto ma saunia i mea uma” (Mataupu Faavae ma Feagaiga 29:8).

O uluai Au Paia o Aso e Gata Ai sa faapotopoto i le tele o nofoaga, e pei o Ohaio, Misuri, Ilinoi, Iuta, ma Egelani. O le faapotopotoina faatasi na fesoasoani e faamalolosia ai tagata o le au paia ma fausia ai le Ekalesia.

2. Faapotopotoina i le mea o e i ai

I le aluga o taimi, na amata ai e taitai o le Ekalesia ona uunaia tagata ina ia faapotopoto ma atiina ae le Ekalesia i o latou lava atunuu. Po o fea lava le mea e faapotopoto faatasi ai tagata, e mafai ona latou auai i le faapotopotoina o Isaraelu ua faataapeapeina. Na folafola mai e le Alii, “Ua ia te au se galuega tele ua teuina, ona o le a faaolaina Isaraelu” (Mataupu Faavae ma Feagaiga 38:33).

3. Faapotopotoina i itu uma e lua o le Veli

Ua valaauina i tatou e le Atua “e faataunuu le faapotopotoina o [Lana] au filifilia” (Mataupu Faavae ma Feagaiga 29:7). E aofia ai i latou tatou te faapotopoto i ai e ala i le galuega faafaifeautalai ma i latou tatou te faapotopoto ai i le isi itu o le veli. Na a’oa’o mai Elder Dale G. Renlund o le Korama a Aposetolo e To’asefululua: “A tatou aoina o tatou talafaasolopito o aiga ma o i le malumalu e fai ma sui o o tatou tuaa, o le a faataunuu e le Atua le tele o … faamanuiaga folafolaina i le taimi lava lena i itu uma e lua o le veli.”²

Talanoaga

O a ni faamanuiaga ua e maua e ala i le faapotopoto faatasi ma isi Au Paia? Na faapefea ona faamanuiaina oe e ala i le fesoasoani atu i le Atua e faapotopoto mai Ana fanau?