Faavae o le Talalelei
Na Laveaiina i Tatou e Iesu Keriso mai le Agasala ma le Oti
Ona o Lana taulaga, ua tatou maua uma ai le avanoa e maua ai le filemu ma le olioli e faavavau.
Ua Foafoaina e Keriso le Lalolagi, saunia e Robert T. Barrett; Lou Tama e, saunia e Simon Dewey; O le Lagomauina o Keriso, saunia e Carl Heinrich Bloch; O Keriso ma Maria i le Tuugamau, saunia e Joseph Brickey; O Keriso o loo Valaauina Peteru ma Anetelea, saunia e James Taylor Harwood
Tatou te vaai atu ia Iesu Keriso o lo tatou Faaola. Aua o Ia na totogia le tau mo a tatou agasala ma faatoilalo le mana o le oti. Na Ia laveaiina i tatou! O Lana taulaga mo i tatou, ua taua o le Togiola, o le mea aupito sili lea ona taua na tupu. Ona o Ia, o le oti e le o le mutaaga lea. Ona o Ia, e mafai ai ona faamagaloina i tatou i a tatou agasala, toe faamamaina, ma tuputupu ae i aso taitasi.
O Iesu Keriso o le Ulumatua
Ae tatou te lei o mai i le lalolagi, sa tatou nonofo faatasi ma o tatou matua faalelagi. I le avea ai ma Ulumatua, sa fesoasoani Iesu Keriso e foafoa lenei lalolagi matagofie. Na filifilia o Ia e avea ma o tatou Faaola ma malie e fanau mai i le lalolagi ina ia mafai ona Ia faatuina se faataitaiga atoatoa, aoao atu Lana talalelei, ma faamaea le Togiola mo i tatou.
Sa Totogiina e Iesu Keriso a Tatou Agasala
Ina ua silafia e Iesu e le o toe mamao ae maliu o Ia, sa afio atu o Ia i se faatoaga na taua o Ketesemane e tatalo ai. I le taimi o lena tatalo, sa amata ai ona Ia totogiina le tau mo a tatou agasala. Sa Ia puapuagatia ma le naunautai ina ia aua nei o tatou puapuagatia—pe afai tatou te salamo. A o tatou liliu ese mai a tatou agasala ma mulimuli i le Faaola, o le a mafai ona tatou maua le faamagaloga ma le faamalologa. Ona o le Faaola, e mafai ona tatou alualu i luma faaleagaga i lenei olaga ma maua le ola e faavavau faatasi ma lo tatou Tama Faalelagi.
Ua Faatoilalo e Iesu Keriso le Oti
Ua Foafoaina e Keriso le Lalolagi, saunia e Robert T. Barrett; Lou Tama e, saunia e Simon Dewey; O le Lagomauina o Keriso, saunia e Carl Heinrich Bloch; O Keriso ma Maria i le Tuugamau, saunia e Joseph Brickey; O Keriso o loo Valaauina Peteru ma Anetelea, saunia e James Taylor Harwood
Ina ua maea Lana tatalo i Ketesemane, sa faalataina Iesu, pue-faapagotaina, ma faasalaina i le oti e ala i le faasatauroga. E ui lava o Ia e ona le malosi-uma lava, na faatagaina e Iesu o Ia lava e maliu i luga o le satauro. Na tuu e Ana uo Lona tino i se tuugamau. Latou te lei iloa e ui lava na oti Lona tino, ae sa ola pea lava Lona agaga i le lalolagi o agaga. E tolu aso mulimuli ane, na toe afio mai Iesu ma asiasi atu ia te i latou, ma faamaonia ai e mafai ona Ia faatoilaloina le oti. Na maea ai le Togiola. Ona sa toetu Iesu, o le a toe ola ai i tatou uma pe a mavae ona tatou oti.
O le Uiga o le Kerisimasi ma le Eseta
O le tele o le lalolagi e faamanatuina aso malolo e lua e fesoasoani tatou te manatua ai le togiola a Iesu Keriso. I le taimi o le Kerisimasi, tatou te manatua ai ma le agaga faafetai sa naunau Iesu e talia le misiona o le afio mai i le lalolagi, e ui lava na aofia ai le mafatia ma le maliu mo i tatou. O le Eseta e faamanatuina ai le manumalo o le Faaola i le agasala ma le oti, lea tatou te maua ai le faamoemoe mo se lumanai faavavau o le olioli.
O le a se Tala a Tusitusiga Paia e uiga i le Togiola a le Faaola?
Na mafatia Iesu i tiga, puapuaga ma faaosoosoga o ituaiga eseese uma. Ona e Na te silafia lelei i tatou taitoatasi, e mafai ona Ia “fesoasoani” po o le fesoasoani, ia i tatou (tagai i le Alema 7:11–12).
E malamalama le Faaola i o tatou tigā ma faanoanoaga (tagai i le Isaia 53:2–5).
Na auina mai e le Atua Iesu e laveai i tatou aua e alofa le Atua ia i tatou taitoatasi (tagai i le Ioane 3:16–17).
Sa tatalo Iesu mo Ona soo, e aofia ai i tatou, ina ia puipuia mai le leaga ma ina ia tasi ma Ia ma le Tama Faalelagi (tagai Ioane 17).
Ua valaaulia i tatou e le Faaola e mulimuli atu ia te Ia ma toe foi atu i Lona afioaga (tagai Mataupu Faavae ma Feagaiga 19:16–19, 23–24; 132:23).