Auauna Atu ia i Latou e i ai Manaoga Faapitoa

Ata

women visiting in a kitchen

Ogatotonu: ata na tusia e Nancy Ann Kirkpatrick; taumatau: ata tusi mai le Getty Images

O le auauna atu i uo ma tuaoi e i ai manaoga faapitoa e mafai ona taufaamatau. E ui lava tatou te mananao e aapa atu i se ala faaKeriso, ae o nisi taimi tatou te le o mautinoa pe faapefea.

A o nofo ai i Kanana fou, Connecticut, ISA, sa faamanuiaina le au Thompsons i ni teineiti masaga. Ina ua vave ona fananau nei teneiti sa maua i le Down syndrome, na o mai le latou uarota e laveai, ma lagolagoina i laua i le taimi o le taotoga o fatu a le masaga ma le tele o masina o nonofo ai i le falemai. Sa faigofie ona vaaia e nisi na uluai manaoga. Na faatulagaina e tagata o le Ekalesia ia meaai, le vaaiga o tamaiti, tapenaina o le fale, fesoasoani i le Kerisimasi, ma isi mea.

Ae sa lei taofia le fesoasoani alofa ao tuputupu ae ia tamaiti ma na itiiti foi le iloagofie o manaoga. O uo alofa, taitai, ma uso ma tuafafine, sa faia le taumafaiga e fefautuaai ai ma le au Thompsons e uiga i le auala e mafai ona latou fesoasoani ai.

“Sa fesili mai se uo ia te au po o le a se mea faigata,” o le tala lea a Sister Thompson. “Sa ou taua o Aso Sa sa faigata ona sa masani ona ma pisi ma lou toalua i o maua valaauga ma sa tatau ai ona ma tuua toatasi le ma afafine matua e vaaia le fale. Sa vave ona ofo mai e lau uo e ave le masaga mo ni nai itula i Aso Sa taitasi. Na faapena foi ona ia faia mo le tele o masina.”

Ina ua oo atu le masaga i le au talavou, sa masani ona saofafai soo ia taitai ma matua e fuafuaina ia gaoioiga na faaaofia ai i latou e i ai manaoga faapitoa ma malie mo le masaga faapea foi ma tamaitai talavou uma. Sa valaaulia e se isi uo ia teineiti i lona fale ina ia mafai e le au Thompsons ona auai i aoga pese.

Ina ua siitia atu le au Thompsons i Iuta, sa tofia se ulugalii e auauna atu i lo la aiga. “Sa la fai mai lava i taimi uma a o lei asiasi mai i o matou manaoga ma po o le a le ituaiga savali e sili ona fetaui ma lo matou aiga,” o le saunoaga lea a Sister Thompson. “Sa latou faaaluina le taimi e iloa ai tagata uma o le aiga, lea e taua ona e le mafai ona galo i nai ou tei o i latou e i ai manaoga faapitoa.” Sa masani ona valaaulia e le ulugalii le masaga e tafafao mo ni gaoioiga faapitoa, ma tuuina atu ai le avanoa i le aiga e malolo ai.

O le a fautuaina e Sister Thompson ia uso ma tuafafine e aua le fefefe e fesili atu i matua po o le a le mea e faigata ia i latou ma pe faapefea foi ona fesoasoani atu. “Tau lava ina aapa atu. O le tele o lou iloa o se tasi, o le tele foi lena o lou malamalama i le auala e sili ona lelei e auauna atu ai ia i latou.”

Fautuaga mo le Auaunaga i Tagata Taitoatasi o i ai Manaoga Faapitoa ma o Latou Aiga

Ata

group of people supporting young woman in a wheelchair

Ogatotonu: ata na tusia e Nancy Ann Kirkpatrick; taumatau: ata tusi mai le Getty Images

1. Ia iloa le tagata o se tagata, e ese mai o latou manaoga faapitoa. Fesili i ai pe o le a se mea latou te mananao e te iloa e uiga ia i latou. O a mea e fiafia i ai?

2. Tautala ia i latou i se auala e te talanoa atu i isi o la latou tupulaga. Ia mautinoa e faaali atu le faaaloalo i lou lava leo ma amioga. Ia mautinoa e te talanoa sao atu ia i latou.

3. Aua le le amanaiaina se tasi e i ai se manaoga faapitoa. Faailoa atu ma faaaofia i latou. Fefautuaai ma le tagata ma lo latou aiga e uiga i le auala atonu latou te mananao e saofaga ai ma auauna atu ai.

4. Mo tagata laiti ifo e i ai manaoga faapitoa, o le fai atu o ni mea e pei o le “Faamatala atili mai e uiga ia Tavita” e faatagaina ai le aiga e faasoa mai mea latou te fiafia i ai.

5. O le faaaluina o le taimi ma tamaiti e i ai manaoga faapitoa e mafai ona tuuina atu ai i matua se avanoa e taulai atu ai i isi tamaiti po o le taulimaina o isi manaoga. E fausia ai foi le malamalama e uiga i le avega o loo tauaveina e matua.

6. E mafai ona tuuina atu le fesoasoani e tusa lava pe le mafai ona e i ai iina. O faamatalaga o le faamalosiauga po o se leo faauo e mafai ona tele sona taua. E mafai foi ona e faatau i luga o le initoneti mo se aso fanau po o isi manaoga.